«Միասեռականությունը ոչ պայմանավորված է հորմոնալ խախտումներով, ոչ էլ գենետիկ կառուցվածքի փոփոխությամբ: Այն ուղղակի վարժանք է, սովորություն, ինչպես որ ոչ ոք անառակ չի ծնվում, այլ դառնում է»,- հայտարարեց հասարակական-քաղաքական գործիչ Խաչիկ Ստամբոլցյան:
Խ. Ստամբոլցյանը հիշեցրեց, որ ՁԻԱՀ-ի դեպք առաջին անգամ հայտնաբերվել է ամերիկյան մի նահանգում, որտեղ ապրում էին ամուսնության իրավունք ստացած համասեռամոլները: Համասեռամոլությունը համարելով Աստծո պատվիրանների ոտնահարում, իսկ ՁԻԱՀ-ը դրան համապատասխան աստվածային պատիժ` Խ. Ստամբոլցյանն ընդգծեց, որը խոսքը միայն առողջական խնդիրներին չի վերաբերում, այլև «միասեռականությունը կոչված է ազգը քայքայելուն և պառակտելուն»:
Ասուլիսին ներկա Հելսինկյան ասոցիացիայի նախագահ Միքայել Դանիելյանի կարծիքով, սակայն, յուրաքանչյուր պետությունում «տարեկան ծնվում են 5-7 տոկոս համասեռամոլներ և նրանց այդպիսին ստեղծում է բնությունը»: Նա նաև խոստովանեց, որ ինքը «նատուրալիստ է»` պատասխանելով իր հասցեին Խաչիկ Ստամբոլցյանի կողմից հնչած մեղադրանքներին:
«Մարդ պիտի հանդուժող լինի, կարող են լինեն միասեռներ, դա իրենց պրոբլեմն է, թող ապրեն իրենց համար, ինձ թվում է չեն խանգարում ոչ ոքի»,- ասաց Դանիելյանը և հավելեց, որ «նրանք չեն կարողանա ազդեցություն ունենալ մարդկանց վրա, եթե մարդ չի ուզում դառնա այդպիսին»:
Ասուլիսին ներկա երրորդ բանախոս, Կառավարման փորձագետ Հարություն Մեսրոպյանը, միջամտելով աստիճանաբար կռվի վերածվող խոսակցությանը, հստակեցրեց, որ «չխանգարելը իրավական նորմ չէ և նշեց, որ իրավաբանության մեջ գոյություն ունենցող իրավունքների դիմաց միշտ էլ գրվում են համապատասխան պարտավորություններ»:
«Նա, ով առաջ է քաշում միասեռականների իրավունքները, հենց նա էլ պետք է ներկայացնի այդ իրավունքներին համապատասխան պարտավորություններ»,- մանրամասնեց Հ. Մեսրոպյանը և հավելեց, որ «պետք է հստակեցվեն, թե ինչքանո՞վ են սեռական փոքրամասնությունների իրավունքները համահունչ մեր ազգային պատմամշակութային ժառանգությանը և ազգային անվտանգության պաշտոնական դրույթներին»:
Հելսինկյան ասոցիացիայի նախագահը միայն փորձում էր հասկացնել, որ ինքը չի պաշտպանում կամ բարձրացնում սեռական փոքրամասնությունների իրավունքները, ավելին, չի հասկանում, թե ի՞նչ իրավունքների մասին կարող է խոսք գնալ:
«Ես պաշտպանում եմ նրանց ոչ թե այն բանի համար, որ իրենք համասեռամոլ են, այլ որովհետև նրանց կարող են տասնյակ ժամերով պահել ոստիկանական բաժանմունքում, ծեծի ենթարկել` առանց արձանագրություն կազմելու: Ես պաշտպանում եմ այն մարդուն, ով առանց պատճառի ծեծի է ենթարկվել և ոչ թե նրան, ով արվամոլ է»,- բացատրեց Մ. Դանիելյանը:
Ստամբոլցյանը շարունակում էր դիմել իր «սիրելի ժողովրդին` զգուշացնելով, որ եթե այսպես շարունակվի, եթե մենք շարունակենք հանդուրժել համասեռամոլներին, ապա կնմանվենք համասեռամոլությունն ընդունած Եվրոպական այնպիսի երկրների, ինչպիսիք են Դանիան և Հոլանդիան, որտեղ ազգն այլևս չի բազմանում, քանի որ բոլոր տղամարդիկ գրեթե իմպոտենտ են կամ միասեռական»: Նա նաև նշեց, որ անչափահասներին մատուցվող սեռական դաստիարակության մասին գրքերը, որոնցում «բնական են ներկայացվում միասեռականները, բերում են կոմպլեքսավորման, ինչն էլ հանգեցնում է ազգերի ոչնչացմանը»:
«Այսինքն կարմիր խնձորը չի կոմպլեքսավորում, այդ դասագրքերը կոմպլեքսավորու՞մ են»,- Միքայել Դանիելյանի այս հարցադրմանը Խ. Ստամբոլցյանը պատասխանեց. «Դու կարմիր խնձորից բան չես հասկանում: Իհարկե, որովհետև դու դեռ չգիտես, որ կենդանիներից ոչ մեկը իր սեռական օրգաններում կուսաթաղանթ չունի, միայն մարդուն է Աստված այդպիսին ստեղծել»:
Մ. Դանիելյանն էլ իր հերթին հարցրեց. «Ո՞րն է ավելի լավ, ա՞յն երկիրը, որտեղ արվամոլներ կան, թե ա՞յն երկիրը, որտեղ մարդ են սպանում»:
Վերջինս սակայն Խ. Ստամբոլցյանի կողմից որակվում էր «ազգի դավաճան, ազգը ոչնչացնող միջազգային օտարերկրյա կազմակերպության լրտես-գործակալ, համասեռամոլների պաշտպան, միասեռականության քարոզիչ, մասոնական, սատանայի հետևորդ»: Մ. Դանելյանն, ով բանավեճի սկզբում հանգիստ տոնով «կարգի էր հրավիրում» Խ. Ստամբոլցյանին, հետզհետե սկսեց զգուշացնել, որ «իր հասցեին հնչող զրպարտությունների համար դատական գործ է հարուցելու», իսկ զրույցի վերջում այնքան էր բարկացել, որ սպառնաց ոչ թե դատի տալ Ստամբոլցյանին, այլ «հենց հիմա վեր կենալ ու ծեծել»:
