«Հերոսն օգնում է դուրս գալ վիրտուալ աշխարհներից»

«Ֆիլմում կա հերոս-իդեալը, որը գիտի ինչ է կատարվում կյանքում և ուղորդող ու ուսուցանող դեր է կատարում»,- լրագրողների հետ հանդիպման ժամանակ հայտնեց «Մետամորֆոզ» ֆիլմի ռեժիսոր Ռուբեն Քոչարը` պատասխանելով Aysor-ի այն հարցին, թե ինչպե՞ս է լուծված մեր ժամանակների հերոս-իդեալի խնդիրը ֆիլմում:

Հիշեցնենք, որ Ռ. Քոչարի «Մետամորֆոզ» գեղարվեստական ֆիլմի պրեմիերան կայանալու է հունիսի 12-ին և 13-ին: Նշենք, որ ֆիլմում քննադատության են ենթարկվում երիտասարդների կողմից ընդունված մարտաֆիլմերն ու համակարգչային խաղերը, ինչպես նաև` դրանցով տարված լինելն ու վիրտուալ աշխարհներում ապրելը:

Ռեժիսորի խոսքերով, ֆիլմը, ունենալով ուսուցողական ու քննադատական բնույթ, չի քարոզում, օրինակ, չտարվել և չմտնել վիրտուալ աշխարհ: Ֆիլմում ասվում է, որ «կան շատ վիրտուալ աշխարհներ, դու պետք է մտնես, իր հետ ապրես, բայց կարողանաս այնտեղից դուրս գալ»:

«Եթե մենք վաղն ընկնենք Բալզակի ստեղծած վիրտուալ աշխարհը, հետո այնտեղից դուրս կգանք հագեցած, իսկ կան վիրտուալ աշխարհներ, որտեղից դժվար ու, անգամ, անհնար է դուրս գալը»,- մանրամասնեց Ռ. Քոչարը:

Ասուլիսին ներկա դերասան Հովհաննես Բաբախանյանը, ով «Մետամորֆոզ» ֆիլմում մարմնավորում է մոտոցիկլավար Քրիստ Դևիդսոնի կերպարը, նշեց, որ ինքն է վիրտուալ աշխարհներին տիրապետողը և ուղղորդոմ է որդուն` վիրտուալ աշխարհներից դուրս գալու համար: Նա նաև ընդգծեց, որ, որքան էլ ֆիլմը ժամանակակից է, նրանում «արվեստի սահմանները խախտված չեն»:

Հ. Բաբախանյանը խոսեց նաև ֆիլմում տեղ գտած նորարարություններից` նշելով, որ «ցանկացած նոր բան արդարացված է և ունի պահանջ»: Նա համոզված է նաև, որ ֆիլմը դիտողը հետո խորհուրդ կտա իր ընկերներին այն դիտել և, որ ամենակարևորն է, չի խուսափի իր երեխաների հետ դիտելուց:

Ֆիլմի գլխավոր դերասանուհի Նարինե Լալայանը, հավելելով, հայտնեց, որ ռեժիսոր Ռուբեն Քոչարը ֆիլմում «շատ խելացի և խորամանկ քայլ է արել` միացրել է երկու տարբեր ժանրեր»:

«Առաջին հայացքից այն մարտաֆիլմ է` գործողություններ, դինամիկա, ժամանակակից պատկերներ, արագություն, մյուս կողմից` խորը փիլիսոփայություն: Այնպես որ, և´ ինտելեկտուալ կինոդիտողները, և´ երիտասարդները, դահլիճից գոհ դուրս կգան և ամենքը իրենը կվերցնի»,- բացատրեց Ն. Լալայանը:

03.06.2009, 16:30

Aysor.am