Շրջակա միջավայրի միջազգային օրվան նվիրված Հայաստանում վայրի բնության և մշակութային արժեքների պահպանման հիմնադրամը և ՎիվաՍել-ՄՏՍ-ը համատեղ իրականացնում են համահայկական նկարչական մրցույթ: Ինչպես Aysor-ին տեղեկացրեց հիմնադրամի հասարակայնության հետ կապերի պատասխանատու Անի Եղիազարյանը` հունիսի 7-ին համահայկական նկարչական մրցույթի կիզակետը կդառնա «Նկարչական օր» միջոցառումը:
«Անգլիական այգում կհամախմբվեն հազարից ավելի երեխաներ Հայաստանի ողջ տարածքից ու Արցախից` նկարելու իրենց երազանքների բնությունը: Երեխաները բացահայտում են բնության գույները, բայց նկարում են ոչ թե սովորական թղթերի, այլ սեղանների ու ավտոբուսների վրա», - բացատրեց Ա. Եղիազարյանը:
Տեղեկացնենք, որ պատանի բնասերները իրենց բնապահպանական նկարներով կգունազարդեն մանկապարտեզներից ու կրթօջախներից բերված սեղանները: Փոքրիկներն իրենց նկարների միջոցով կբարձրաձայնեն Հայաստանի բնությանն ու կենդանական աշխարհին սպառնացող վտանգների մասին:
Նշենք նաև, որ նկարազարդ սեղանները` համապատասխան մշակումից հետո, կվերադարձվեն կրթօջախներ: Դառնալով դասասենյակների մի մասը, երեխաների նկարները գալիք սերունդներին անըդհատ կհիշեցնեն բնության ու դրա հանդեպ հոգատար վերաբերմունք ունենալու կարևորության մասին:
Միջոցառման բացօթյա լինելու հանգամանքը Նկարչական օրվա մասնակից կդարձնի նաև պատահական անցորդների. նրանք նույնպես հնարավորություն կունենան նկարել սեղանների վրա:
05.06.2009, 12:41
No comments:
Post a Comment