Քա՞նի անձով է պայմանավորված ԳՄ-ում տիրող մթնոլորտը

«Այսօր գրողներին խանգարում է մի մարդ, երբ այդ մարդը չքվի ասպարեզից, եղբայրությունը, հաշտությունը կտիրեն գրողների միությունում, կեղծիք, շանտաժ չի լինի, բարձր անհատականությունները չեն հեռացվի աշխատանքից, միջակությամբ չի լցվի գրական դաշտը, և դուք բոլորդ կսիրեք գրականությունը, կճանաչեք մեր ազգի լավագույն գրողներին, կշտամբանքը և իրար հանդեպ վատ վերաբերմունքը առհավետ կանհետանա», - այսպես սկսեց այսօրվա ասուլիսը գրող, գրականագետ Աբգար Ափինյանը, ի նակատի ունենալով Լևոն Անանյանի անձը:

Ա. Ափինյանը տեղեկացրեց, որ այսօր գրողները զբաղված են ոչ թե ստեղծագործական աշխատանքով, այլ դատաիրավական: Նա նշեց, որ իրենք նյութեր են նախապատրաստում Դատախազության համար, որը զբաղվում է Հայաստանի Գրողների միության նախագահ Լևոն Անանյանի գործով:

Ի տարբերություն Ա. Ափինյանի` ասուլիսին ներկա ՀՀ մշակույթի նախարարության Գրահրատարակչության գործակալության պետ, Գրողների միության քարտուղար Էդվարդ Միլիտոնյանը գտնում է, որ մի անձով չէ պայմանավորված Գրողների միությունում տիրող մթնոլորտը:

«Մշակույթի ասպարեզի մարդիկ բարության, հոգևոր մերձակցության դաշտում պետք է գործակցեն, իսկ ԳՄ-ում` որպես ստեղծագործական միությունում, մի հոգին չի կարող խանգարել, որքան էլ այդ մեկ հոգին համարվի բացասական», - կարծում է Է. Միլիտոնյանը:

Գրողների միության քարտուղարը համոզված է, որ ԳՄ նախագահը «կազմակերպչական որոշ առումներում գուցե խանգաիչ հատկանիշներ ունենա, բայց չի կարող խանգարել, որպեսզի մարդն իր գիրքը գրի, որպեսզի մարդն արվեստագետ լինի, բարձր քաղաքացիական կերպար լինի, չի կարող խանգարել, որ նրան գնահատեն»:

«Միևնույն ժամանակ ստեղծագործողները նուրբ մարդիկ են, և եթե աշխատանքային գործունեության ընթացքում լինում են խոտոր բաներ, հնարավոր է, որ դրանք չափազանցվեն, ծանր ազդեն մարդու հոգեբանության վրա», - մանրամասնեց Է. Միլիտոնյանն ու ընդգծեց, որ այնուամենայնիվ, իրեն «անձը չի հետաքրքրում, այլ` գրողը»:

Է. Միլիտոնյանի խոսքերի համաձայն` մեկ անձին ամեն ինչ վերագրելը շատերին ազատում է պատասխանատվությունից: Գրականագետ Ա. Ափինյանը, ով խոստովանեց, որ շատ հարցերում համամիտ է իր գործընկերոջ հետ, միևնույն ժամանակ նշեց, որ ԳՄ-ում տիրող բացասական բոլոր երևույթներն «իր հետ բերել է Լ. Անանյանը»:

Ա. Ափինյանը հայտնեց, որ գրողների միջև տեղի ունեցող բազմաթիվ կռիվները սկիզբ են առել 2001 թ-ի ԳՄ համագումարից, որի ժամանակ «11 հոգի, ԳՄ անդամ չլինելով, քվեարկել են ԳՄ ներկայիս նախագահ Լևոն Անանյանի օգտին, այն դեպքում, երբ իրենց միջև ձայների տարբերությունը 10 ձայն է կազմել»:

Նա նշեց նաև մի շարք այլ խախտումների մասին, որ «իրականացրել է Լ. Անանյանն» ու հայտնեց, որ այդ հարցերով այժմ զբաղվում է Հայաստանի Դատախազությունը:

Ա. Ափինյանի կարծիքով` այն, որ ԳՄ-ն ղեկավարում է «ապօրինի ընտրվածը» իրեն չի խանգարում, այլ խանգարում է հասարակությանը` լուրջ գրականություն ունենալու համար: Նա համոզված է, որ եթե «պահպանվի այս կառուցվածքը, ապա ԳՄ-ն կգնա սխալ ճանապարհով»:

Գրողների միության քարտուղար Է. Միլիտոնյանը, չցանկանալով անձնավորել ԳՄ խնդիրները, հայտնեց, որ եթե նույնիսկ այսօր կազմակերպվի ընտրություններ, ոչ ոք չի կարող ասել, որ նախագահի պաշտոնում կընտրվի որևէ «լուրջ գրող»:

«Եթե լուրջ գրող իր թեկնածությունը դնի, հնարավոր է, որ չանցնի, քանի որ գաղտնիք չէ, որ մեր գրականության ասպարեզում բոլորը չեն, որ լավ գրողին հարգում, սիրում ու դնում են իրենց գլխին, և պարտադիր չէ, որ լավ գրողը կարողանա կազմակերպչական հարցերով զբաղվել»,- մանրամասնեց Է. Միլիտոնյանը:

Է. Միլիտոնյանը հայտնեց նաև, որ հայ գրողների զգալի մասը 65 տարեկանից բարձր տարիք ունեցող, հիվանդ մարդիկ են և նրանք չեն էլ համաձայնվի նախագահի պաշտոն զբաղեցնել, քանի որ ցանկանում են այդ ժամանակը նվիրել գրականության ստեղծմանը:

«Անշուշտ նախագահի կերպարը պետք է միավորող լինի, նա պետք է հակված լինի միասնականության մթնոլորտ ստեղծելուն, բայց ես կարծում եմ, որ Գրողների միություն ասելը և այն անձնավորելը` սխալ է», - բացատրեց Է. Միլիտոնյանը:

ԳՄ քարտուղարն, արձագանքելով Ա. Ափինյանի այն խոսքին, որ Լ. Անանյանի դեմ լույս են տեսել շուրջ 165 հոդվածներ, հարցրեց` «Իսկ ինչու՞ մեզ չի մտահոգում, որ լույս չեն տեսնում գոնե 100 հոդվածներ` գրականության, լավ գրողների մասին»:

Է. Միլիտոնյանը, չժխտելով ԳՄ-ում առկա բացերը, կարծում է, որ չի կարելի «անտեսել նաև այն դրականը, որ կատարվել է վերջին ժամանակներում»: Գրականագետ Ա. Ափինյանը, սակայն, գտնում է, որ ԳՄ-ում Լ. Անանյանի նախագահության ժամանակ «բացասականից բացի լավ բան չի կատարվել»:

Լրագրողների այն հարցին, թե հուլիսի 4-ին կայանալիք ԳՄ համագումարում հնարվո՞ր է, որ նախագահ ընտրելու համար Ա. Ափինյանը ներկայացնի իր թեկնածությունը, գրականագետը պատասխանեց, որ «երկրորդ անգամ նման քայլի չի դիմի` մեկ անգամն էլ իր համար բավական էր»: Միևնույն ժամանակ Ա. Ափինյանը նշեց, որ ԳՄ նախագահի պաշտոնում չի տեսնում ոչ մեկին` բացառությամբ գրող Ռազմիկ Դավոյանի:

22.06.2009, 15:32

Aysor.am

Համերգ` նվիրված բարեգործական ակցիայի մասնակիցներին

Այսօր «Քաղաքացիական հասարակության ինստիտուտ» հասարակական կազմակերպությունը կազմակերպում է դասական երաժշտության երեկո, որը տեղի կունենա Նարեկացի արվեստի միությունում, երեկոյան ժ. 18:00-ին: Համերգը նվիրված է ՀԿ-ի կազմակերպած «Գրքեր կալանավորների համար» ակցիային օժադակած քաղաքացիներին և կազմակերպություններին:

Ինչպես Aysor-ին տեղեկացրեց կազմակերպության կամավոր անդամ լիտվացի Լաուրա Վալոսկայտեն` «Գրքեր կալանավորների համար» նախաձեռնություն-ակցիան անցկացվել է մարտից մինչև մայիսի վերջն ընկած ժամանակահատվածում, որի հիմնական նպատակն է կալանավայրերի գրադարանները համալրել տարբեր տեսակի գրքերով և բարելավել գրադարանների պայմանները:

Նախաձեռնության հեղինակների հավաստմամբ Խորհրդային Միության փլուզումից հետո կալանավայրերը մատնվել են անտարբերության, չկա ընդհանուր կանոնակարգ կամ որևէ մարմին, որը հոգ կտանի այդ մասին:

Կազմակերպությունը ցանկություն ունի ի վերջո փոխել այդ իրավիճակը և այդ ուղղությամբ տանող քայլերից մեկն էլ հանդիսացավ «Գրքեր կալանավորների համար» բարեգործական ակցիան, որի իրականացումը հնարավոր դարձավ շնորհիվ այն մարդկանց, ովքեր մեծահոգաբար իրենց անձնական գրադարաններից նվիրեցին գրքեր, ամսագրեր, տեղեկատվական հրատարակումներ և այլ նյութեր:

Լաուրա Վալոսկայտեն հայտնեց, որ իրենց հաջողվել է հավաքել 2 000-3 000 կտոր գիրք: Գրքերի համակարգումից հետո դրանք այս և մյուս շաբաթվա ընթացքում հանձնվելու են Հանրապետության 5 կալանավայրերի:

Նվիրատվությունը հիմնականում կատարել են հասարակ մարդիկ, ինչպես նաև այնպիսի կազմակերպություննր, ինչպիսիք են` ՄԱԿ-ի Հայաստանյան գրասենյակը, ԵԽ Հայաստանյան գրասենյակը, Հայաստանում ԱՄՆ դեսպանատունը, հայկական մի շարք կրթօջախներ, հիմնադրամներ և այլն:

«Քաղաքացիական հասարակության ինստիտուտ» ՀԿ-ի կազմակերպած դասական համերգի ծրագրում հնչելու են հայ և արևմտաեվրոպական կոմպոզիտորների ստեղծագործություններ` Լևոն Առաքելյանի (թավջութակ) և Օլգա Արզումանյանի (դաշնամուր) կատարմամբ:

22.06.2009, 12:39

Aysor.am

Տոնն ամփոփվեց «Հարգանքի տուրք Կոմիտասին» համերգով

Երեկ Հայաստանը ողողված էր երաժշտությամբ. Երևանում և Հանրապետության բոլոր մարզերում նշվում էր Երաժշտության տոնը:

Հիշեցնենք, որ արդեն երրորդ տարին է, ինչ Հայաստանում ՀՀ մշակույթի նախարարությունը և Հայաստանում Ֆրանսիայի դեսպանությունը կազմակերպում են Երաժշտության տոն` կենդանի հնչողությամբ և բազմաժանր կատարումներով: Տոնն առաջին անգամ նշվել է Ֆրանսիայում` մշակույթի նախարարության նախաձեռնությամբ 1982 թ-ին:

Տարեց տարի այս տոնն ընդլայնում է իր աշխարհագրությունն ամբողջ աշխարհում` դառնալով համաշխարհային տոն: ՀՀ մշակույթի նախարարության և Հայաստանում ֆրանսիայի դեսպանության համագործակցության շնորհիվ այս տարի տոնը Հայաստանում նշվեց առանձնակի շուքով:

Երևանում տոնը մեկնարկեց ժ. 12-ից: Համերգներ տեղի ունեցան Սիրահարների այգում, որտեղ հանդիսատեսն ունկնդրեց հայկական մի շարք ռոք խմբերի կատարումներ: Ռոք երաժշտությունն էր թևածում նաև Շառլ Ազնավուրի անվան հրապարակում:

Ջազի սիրահարները անզուգական կատարումներ ընբոշխնեցին Պապլավոկ սրճարանում` հայ ջազ կատարողների, ինչպես նաև ֆրանսիացի ջազմեններ Ստեֆան Բելմոնդոյի (շեփոր) և Էրիկ Լենինի (դաշնամուր) մասնակությամբ:

Հաղթանակի զբոսայգում հայ հանդիսատեսը հնարավորություն ունեցավ վայելելու ֆրանսիական շանսոն` ֆրանսիացի երգչուհի Նատալի Ժոլիի կատարմամբ: Բացի այդ բազմաժանր երաժշտություն էր հնչում Հյուսիսային պողոտայում, ինչպես նաև բացօթյա սրճարաններին հարող տարածքներում:

Համերգային ծրագիրն ամփոփվեց Կոմիտասի անվան պետական կոնսերվատորիայի այգում` «Հարգանքի տուրք Կոմիտասին» խորագրով համերգով: Նշենք, որ համերգը կազմակերպվել էր մեծն Կոմիտասի 140-ամյակին նվիրված միջոցառումների շրջանակում:

Համերգին, որին ներկա էր նաև ՀՀ մշակույթի նախարար Հասմիկ Պողոսյանը, մասնակցում էին Երևանի պետական կամերային երգչախումբը (գեղարվեստական ղեկավար` Հարություն Թոփիկյան), Հայաստանի պետական կամերային երգչախումբը (գեղարվեստական ղեկավար` Ռոբերտ Մլքեյան), «Հովեր» պետական կամերային երգչախումբը (գեղարվեստական ղեկավար` Սոնա Հովհաննիսյան) և Հայաստանի մենակատարներ պետական նվագախումբը (գեղարվեստական ղեկավար` Զավեն Վարդանյան):

«Հարգանքի տուրք Կոմիտասին» համերգը բացեց Երևանի Կոմիտասի անվան պետական կոնսերվատորիայի նվագախումբը (գեղարվեստական ղեկավար Տիգրան Ավագյան), որը հանդիսատեսին ներկայացրեց դասական երաժշտության մի շարք հայտնի կատարումներ:

Ինչպես Aysor-ի հետ զրույցում հայտնեց Հայաստանի Պետական ֆիլհարմոնիայի տնօրեն Գագիկ Մանասյանը` երաժշտական ծրագիրը հիմնականում կազմված էր Կոմիտասի ստեղծագործություններից և մի քանի այլ դասական ստեղծագործություններից, քանի որ տոնը միջազգային է:

Գ. Մանասյանը կարևորեց տոնի կազմակերպումը, քանի որ «երաժշտությունն ամենամասսայական արվեստն է. այն լեզու չունի և բոլորի համար հասկանալի է»:

Ֆիլհարմոնիայի տնօրենը ողջունեց այն հանգամանքը, որ տոնը կազմակերպվում է պետական մակարդակով: Մշակույթի հանդեպ ունեցած պետական ուշադրությունը ևս, ըստ Գ. Մանասյանի, «գոհացուցիչ է»:

«Այսօր ելույթ ունեցող այս խմբերը վերջին մեկ տարում են պետական կարգավիճակ ստացել, սրանք այնպիսի խմբեր են, որ տարիներ շարունակ երազում էին այդպիսի կարգավիճակ ստանալու մասին», - ընդգծեց Գ. Մանասերյանն ու հավելեց, որ պետական կարգավիճակ ստանալը կարևոր է, քանի որ այն զուտ կոչում չէ, այլ` հաստատուն աշխատավարձ, ֆինանսական աջակցություն և այլ:

Նշենք, որ խմբերը պետական կարգավիճակ են ստացել ՀՀ նախագահ Սերժ Սարգսյանի նախաձեռնությամբ:

22.06.2009, 10:56

Aysor.am

«Իսլամ մնալով` հայ դառնալ չեն կարող»

«Մենք իրավունք չունենք ասելու իսլամացած հայեր, այլ պետք է ասենք իսլամացված հայեր, քանի որ պատմությունը ցույց է տալիս, որ կրոնափոխությունը տեղի է ունեցել բռնի պայմաններում»,- կարծում է պատմական գիտությունների թեկնածու Գևորգ Յազըճյանը, ում խոսքերով, հայ ասելուց էլ պետք է հասկանալ, որ «մենակ հայախոս կամ մենակ քրիստոնյա լինելով չի կարելի հայ համարվել»:

Նշենք, որ Գ. Յազըճյանն այն պատմաբաններից է, ով դեմ է այն տեսակետներին, որ տարբեր կրոնների պատկանող, սակայն հայ ծագում ունեցողները, հավասարապես հայ են: Նա մի շարք պատմաբանների հետ համարում է, որ այդպես մտածելը և «իսլամացված հայերին» հայ իրականության մեջ ինտեգրելը` ազգային անվտանգության լուրջ խնդիրներից է:

Պատմաբանը համոզված է, որ «մուսուլման հայ չի կարող լինել»: Նրա խոսքերով, մահմեդականացված հայերը լավագույն դեպքում հիշում են, որ իրենց մեջ հայ կա, բայց «երբ հարցնում ես` կվերադառնա՞ս Հայաստան, փոխադարձ հարցնում են` ինչու՞»: Ըստ նրա, սա նշանակում է, որ չկա ազգային ինքնագիտակցությունը, ինչի հետևանք է նաև այն, որ Հայաստանում երկքաղաքացիության մասին օրենքի ընդունումից հետո արտրեկրի քաղաքացի հայերից միայն 1800 հոգի է դիմել քաղաքացիություն ստանալու համար:

«Եթե 3000-ից միայն 1-ն է դիմել, նշանակում է, որ իրենք ՀՀ-ի և իշխանությունների նկատմամբ չունեն հավատ»,- ընդգծեց պատմաբանը:

Ւնչ վերաբերում է իսլամացված հայերին, ապա, մասնագետի կարծիքով, նրանց մոտ կան հայկական էթնիկական մտածելակերպի տարբեր տեսակի դրսևորումներ:

«Շատերն ատում են հայերին և կատաղում են, որ իրենց ասում ես իրենց հայ արմատների մասին: Կան այնպիսիք, որ ուզում են վերադառնալ Հայաստան, և նրանցից շատերն այդպես էլ անում են կամ գնում են հայկական պատրիարքարան և մկրտվում են»,- հայտնեց Գ. Յազըճյանը և ընդգծեց, որ «Այդ քայլին դիմում են, քանի որ շատ լավ հասկանում են, որ իսլամ մնալով` իրենք չեն կարող հայ դառնալ»:

Պատմական գիտությունների թեկնածուն համոզված է նաև, որ կրոն փոխելիս` փոխում ես մի ամբողջ աշխարհայացք ու ինքնություն: Նա նշեց, որ այդ առումով` «մեզանում ահռելի տգիտություն կա կրոնի էթնոդավանական, էթնոլեզվական և էթնոմշակութային հարցերի վերաբերյալ»:

Խոսելով քրիստոնեության և մահմեդականության միջև գոյություն ունեցող պայքարի մասին` Գ. Յազըճյանը նշեց, որ «աշխարհի բոլոր վայրերում, ամենամեծ հրապարակներում, ամենամեծ եկեղեցիների կողքին բարձրացվում են մուսուլմանական մզկիթներ` ցույց տալու, որ մուսուլմանությունը հաղթում է քրիստոնեությանը»: Նա ընդգծեց այն, որ ՀՀ-ն միակ երկրներից է, որտեղ իսլամական համայնք գոյություն չունի` գրանցված չէ, և դա «շատ լավ է, քանի որ նրանք քաղցկեղի նման են և մի քանի տասյակ տարի եհետո կգրավեին ամեն ինչ»:

«Մեր պետությունը պատրաստ չէ դրան, քանի որ մենք ազգային անվտանգություն չունենք: Օրինակ, Թուրքիայում այս հարցերով զբաղվում են պետության ազգային անվտանգության համապատասխան ստորաբաժանումները, և այն պետական և ազգային անվտանգության խնդիր է: Ես չգիտեմ, թե մեր ազգային անվտանգությունը նման հարցրով արդյո՞ք զբաղվում է»,- հարցրեց պատմաբանն ու որպես լուծում առաջարկեց խնդրի շուրջ մասնագիտական խորն ուսումնասիրություն անցկացնել:

20.06.2009, 17:19

Aysor.am

«Չկա մահմեդական հայ այնպես, ինչպես չկա քրիստոնյա թուրք»

«Չի կարելի օգտագործել մահմեդական հայ հասկացությունը, քանի որ այդպիսի բան չկա, ինչպես չի կարող լինել քրիստոնյա թուրք: Դրա փոխարեն մենք պետք է կիրառենք մահմեդականացված հայերի սերունդներ, որից հետո մենք կարող ենք խոսել այդ սերունդների մոտ ազգային ինքնագիտակցության գոյության կամ չգոյության մասին»,- համոզված է պատմական գիտությունների թեկնածու Թամարա Վարդանյանը, ով լրագրողների հետ հանդիպման ժամանակ մանրամասն բացատրեց, թե ինչ է նշանակում իսլամացած և իսլամացված հայեր և ինչ խնդիրներ կարող է ունենալ Հայաստանը նրանց ինտեգրման հետ կապված:

Նշենք, որ հանդիպման նպատակն էր հակադրվել մի շարք պատմաբանների այն տեսակետին, որ «իսլամացած հայերը` նույն հայերն են, և մենք պետք է ռազմավարություն ունենանք այդ հայերին ներգրավելու մի շարք համահայկական ծրագրերում»:

Հայկական ինքնությունը շատ ավելի կայացած է, և, ըստ Թ. Վարդանյանի, հայերի պարագայում չի կարելի առաջնորդվել նույն սկզբունքներով, ինչ ամերիկացիների դեպքում, քանի որ այնտեղ գոյություն ունեն «ամերիկացիներ և ոչ թե էթնիկ ինքնության հիմքով ազգեր»: Նրա կարծիքով, մտածելը, որ բոլոր կրոնների տեր, ծագումով հայերը հայ են, ոչ միայն հակագիտական է, այլև ազգային մեծ վտանգ է ներկայացնում:

«Կոպենհագենյան դպրոցը ինքնության մասին ասում է, որ այն առաջին հերթին ազգային անվտանգության կատեգորիա է և ինքության լղոզումը լուրջ մարտահրավեր է ազգային անվտանգությանը, և ինքնությունն անաղարտ պահելը ազգային անվտանգության հիմնախնդիրներից է»,- հայտնեց Թ. Վարդանյանն ու զարմանք հայտնեց, որ «պատմաբաններն, իրենց աչքի առաջ ունենալով այդ ուսումնասիրությունը, գնում են սխալ ճանապարհով»:

«Մեր հարևան երկրները, մասնավորապես Թուրքիան և Ադրբեջանը, առաջ են քաշում «Մեկ ազգ, մեկ կրոն» գաղափարը, որով լուծում են այն խնդիրը, ինչը մենք լուծել ենք մեր պատմության ողջ ընթացքում` ազգային ինքնության պահպանման խնդիրը»,- ընդգծեց Թ. Վարդանյանը, ում խոսքերով, մեր հարևանները գնում են մեր անցած ճանապարհով, քանի որ իրենք իրենց պատմական անցյալում չեն հասցրել լուծել այդ խնդիրը:

Խոսելով մահմեդականացված հայերի սերունդների մասին` պատմաբանը նշեց, որ դրանք բաժանվում են երեք խմբի` նրանց մի մասը չի ընդունում, որ ինքը հայ է, մյուս մասը կարծում է, որ ունի երկու հայրենիք` Հայաստանը և այն երկիրը, որտեղ ապրում է, իսկ երրորդ խումբը գտնում է, որ իր հայրենիքը Հայաստանն է:

Թ. Վարդանյանի կարծիքով, պետք է մտածել հենց այդ երրորդ խմբի պահպանման մասին, քանի որ մեր սփյուռքը կանգնած է ձուլվելու վտանգի առաջ: Նա նշեց, որ մեր խնդիրը պետք է դառանան քրիստոնյա հայերը, և հավելեց, որ մահմեդականացվածները, կրոնով պայմանավորված, ունեն այլ աշխարհընկալում: Նա նույնիսկ մեջբերեց արտասահմանյան ուսումնասիրողների հետազոտությունների արդյունքները, որոնց համաձայն` Թուրքիայում ապրող հայերի 50 տոկոսն իրեն թուրք է համարում:

«Եթե մենք ընկնենք մի 10 հոգու ետևից, ովքեր աղոտ հիշում են, որ իրենք արմատներով հայ են, ապա մենք կկորցնենք մի ամբողջ սփյուռք»,- համոզված է պատմաբանը:

20.06.2009, 16:48

Aysor.am

Ներկայացված ընկերություններն առաջարկում են բիզնես լուծումներ

Ինֆորմացիոն տեխնոլոգիաների ձեռնարկությունների միության և Microsoft ընկերության հայաստանյան գրասենյակի կազմակերպած «Դիջիտեք էքսպո» ցուցահանդեսին, որը մեկնարկեց այսօր առավոտյան, մասնակցում է շուրջ 25 կազմակերպություն: Ցուցահանդեսին, որը գործելու է այսօր և վաղը, տեղեկատվական և հեռահաղորդակցման տեխնոլոգիաների բնագավառում գործող ընկերությունները ներկայացնում են իրենց բիզնես լուծումները բանկային և ֆինանսական սեկտորի, հանքարդյունաբերության, փոքր և միջին ձեռնարկատիրության, զբոսաշրջության, պահեստավորման և առևտրի, շինարարության, տրանսպորտի, բեռնափոխադրումների, բժշկական և դեղագործական սեկտորի, հասարակական սեկտորի և այլ ոլորտների համար:

Այսպես, օրինակ, «Սայմոտեկ» ընկերությունը ճարտարագիտական ծառայություններ մատուցող կազմակերպություն է: Այսօր ընկերությունը ներկայանում է նաև բժշկության ոլորտում հեռահար բժշկության սոնոգրաֆիայի նախագծով, որը կգործարկվի այս տարվա վերջում:

«Արդյունքում ծրագիրն իրենից ներկայացնելու է մի համակարգ, որի միջոցով հիվանդը կարող է իր սոնոգրաֆիան կամ այլ վիդեոինֆորմացիան ուղարկել աշխարհի ցանկացած վայրում գտնվող բժշկին և խորհրդատվություն ստանալ: Այն կարող է ծառայել նաև բժշկական կենտրոնների միջև կապի համար, բժշկական խորհրդակցությունների, ինֆորմացիայի փոխանակման համար: Հատկապես կիրառելի է դժվար հասանելի վայրերի համար, որտեղ անհրաժեշտ կլինի միայն համակարգչի և ինտերներտի առկայությունը»,- բացատրեց «Սայմոտեկ» ընկերության տնօրեն Հրաչյա Խաչատրյանը:

Հ. Խաչատրյանի խոսքերով, նման միջոցառումները նախ և առաջ միջոց են հանդիսանում կազմակերպությունների` իրար հետ ծանոթանլու համար, տեսնելու, թե որ կազմակերպությունն ինչով է զբաղվում:

«Այսպիսի միջոցառումներն արդիական են հատկապես Հայաստանի համար, քանի որ Հայաստանում կազմակերպությունների միջև գոյություն չունի տեղեկատվության փոխանակման համակարգ և շատ հաճախ կազմակերպություններին թվում է, թե միայն իրենք են զբաղվում տվյալ աշխատանքով»,- համոզված է Հ. Խաչատրյանը:

«Սորսիո» ընկերության ներկայացուցիչ Արսեն Առաքելյանը ևս կարծում է, որ նման միջոցառումները հնարավորություն են տալիս ոլորտի ընկերություններին ավելի մոտիկից ծանոթանալու: Նա տեղեկացրեց, որ իրենց կազմակերպության ներկայացրած համակարգը նախատեսված է մոնիթորինգի համար` թե’ արտաքին վեբ-կայքերի համար, թե’ ցանցային սարքավորումների համար:

«Մոնիթորինգը բավականին մատչելի է և հեշտ կիրառելի: Նրա իմաստն ավելի արդիական է դառնում առաջարկվող սարքավորումներով, ինչը, միացված լինելով ցանցում, առանց միջամտության սկսում է մոնիթորինգի գործընթացը»,- մանրամասնեց Ա. Առաքելյանը:

Ա. Առաքելյանը տեղեկացրեց նաև, որ ընկերությունն իր գործունեությունը Հայաստանում ծավալում է 2005 թ-ից և յուրաքանչյուր անգամ մեծացնում ու ավելացնում է հնարավորությունները:

Հիշեցնենք, որ ցուցահանդեսի բացումը կատարել է ՀՀ վարչապետ Տիգրան Սարգսյանը, ով, շրջելով տաղավարներով, ծանոթացել է ցուցահանդեսին ներկայացված ընկերությունների մատուցած ծառայություններին:

19.06.2009, 20:09

Aysor.am

Փառատոնի պատվավոր հյուրերը նաև վարպետության դասեր կանցկացնեն

«Երբ փառատոնն ունի և’ կշիռ, և’ վարկանիշ աշխարհում, ապա կարողանում է իր ցանկացած գործիչներին հրավեր անել»,- հայտարարեց «Ոսկե ծիրան» միջազգային կինոփառատոնի գեղարվեստական հարցերով տնօրեն Սուսաննա Հարությունյանը:

Ս. Հարությունյանը հայտնեց, որ «Ոսկե Ծիրան» 6-րդ միջազգային կինոփառատոնի պատվավոր հյուրերից է Յեժի Սկոլիմովսկին, ում մասին կինոհասարակությունը վերջին ժամանակներում հաճախ է պատիվ ունենում լսել: Հայ հանդիսատեսը հնարավորություն կունենա դիտելու ռեժիսորի վերջին` նախորդ տարի նկարահանած «4 գիշեր Աննայի հետ» ֆիլմը:

Պատվավոր հյուրերի թվում է նաև ֆրանսիահայ պրոդյուսեր Ալան Թերզյանը, ով առաջին անգամ է լինելու Հայաստանում: Ա. Թերզյանի «Մերձավոր շրջապատը» ֆիլմն է, որ ազդարարելու է կինոփառատոնի բացումը:

Հայ հանդիսատեսը կդիտի նրա 2 ֆիլմերը: Հուլիսի 14-ին «Ֆրանսիական օրը» կբացվի ռեժիսորի նկարահանած «Ծրագրերի փոփոխում» ֆիլմով:

Պատվավոր հյուրերի թվում են նաև ամերիկացի անկախ ռեժիսոր Ռոբ Նիլսոնը, ով հիմք է դրել թվային կինոյին, լեհ Յեժի Սկոլիմովսկին, ամերիկահայ Տատյանա Նազարյանը, ռուս Սերգեյ Սոլովյովը, Ռոման Բալայանն ու Տատյանա Դրուբիչը:

Ս. Հարությունյանը նշեց, որ պատվավոր հյուրերի ֆիլմերը ցուցադրելուց զատ, կինովարպետները անցկացնելու են վարպետության դասեր:

19.06.2009, 19:52

Aysor.am

«Մասնակիցները չպետք է ամաչեն իրենց գնահատողներից»

«Փառատոնի ժյուրի անդամները պետք է լինեն հեղինակավոր անձիք, որպեսզի մասնակիցներին ամոթ չլինի ասել, թե ով է գնահատել իրենց և ումից են ստացել մրցանակը»,- համոզված է «Ոսկե ծիրան» միջազգային կինոփառատոնի ծրագրերի ղեկավար Միքայել Ստամբոլցյանը, ով այսօր լրագրողներին ներկայացրեց փառատոնի ժյուրիի կազմը:

Տեղեկացնենք, որ «Ոսկե ծիրան» կինոփառատոնն այս տարի նույնպես ներկայացնում է երեք մրցութային ծրագիր` միջազգային խաղարկային ու վավերագրական ֆիլմերի և Հայկական համայնապատկեր: Փառատոնին ներկայացված ֆիլմերը, սակայն, դիտելու են 5 ժյուրիներ` Միջազգային խաղարկային, միջազգային վավերագրական, հայկական համայնապատկերներ, ինչպես նաև` «Ֆիպրեսի» կամ Կինոքննադատների միջազգային ֆեդերացիայի և «Էկումենիկ» կամ եկեղեցիների անկախ հասարակական ժյուրիները:

Ինչպես տեղեկացրեց Մ. Ստամբոլցյանը, միջազգային խաղարկային ֆիլմերի ժյուրին կնախագահի ճապոնացի հանրահայտ ռեժիսոր և սցենարիստ Կոհեյ Օգուրին: Կ. Պգուրին մի շարք փառատոների մրցանակակիր է, իսկ նրա «Կեղտոտ գետը» լիամետրաժ ֆիլմը 1981 թ-ին ներկայացված է եղել Օսկարի «Լավագույն արտասահանյան ֆիլմ» անվանակարգում:

Միջազգային խաղարկային ֆիլմերի ժյուրիի կազմում են նաև Գերմանիայից Ալբերտ Վիդերշպիլը, Իսպանիայից Պակո Պոշը, Վրաստանից Նանա Ջորջաձեն, և մեր երկու հայրենակիցները` Էրիկ Պողոսյանը ԱՄՆ-ից և Արմինե Խանջյանը Կանադայից:

Միջազգային վավերագրական ֆիլմերի ժյուրին այս տարի նախագահելու է ռուս կինոռեժիսոր Ալեքսանդր Ռոդնյանսկին: Ժյուրիի կազմում կլինեն նաև Մեծ Բրիտանիայից Յան-Հայդեն Սմիթը, Գերմանիայից` Մայքլ Վիդեման, Թուրքիայից` Էնիս Ռիզան, Հայաստանից` Արտյոմ Մելքումյանը:

Հայկական համայնապատկեր մրցույթի ժյուրին գլխավորելու է Նիդերլանդերից Հայկ Բալյանը: Ժյուրիի կազմում են նաև ԱՄՆ-ից Էրիկ Նազարյանը, Գերմանիայից Նորիկ Քեշիշյանը, Հայաստանից` Անետա Երզնկյանն ու Գրիգոր Հարությունյանը:

Այն, որ Հայկական համայնապատկեր մրցույթի ժյուրին կազմված է միայն հայազգի կինոգործիչներից, լրագրողների մոտ հարց առաջացրեց, թե ավելի ճիշտ չէ՞ր լինի, որ օտարազգիները հայերին գնահատեին: Ի պատասխան փառատոնի գեղարվեստական հարցերով տնօրեն Սուսաննա Հարությունյանը հայտնեց, որ նրանց միայն ազգանունը կարող է հուշել, որ նրանք հայ են, իսկ իրենք, «իրականում, այլ մշակույթի կրողներ են»:

«Օրինակ Հայկ Բալյանը, ով ներկայացնում է Նիդերլանդերը, եվրոպական կինոյի խոշորագույն պրոդյուսերներից է, և, առաջին հերթին, կապված է եվրոպական կինոյի հետ: Էրիկ Նազարյանը մեծացել է Ամերիկայում, այդ շրջանակներում է կինոկրթություն ստացել: Նորիկ Քեշիշյանը գերմանական պրոդյուսերական ցանցի մեջ է, միայն այստեղ գալով պետք է ծանոթանա հայ ազգի ռեժիսորների հետ»,- մանրամասնեց Ս. Հարությունյանը:

Միջազգային կինոլրագրողների և կինոքննադատների ասոցիացիաների միջազգային ֆեդերացիայի` Ֆիպրեսի ժյուրին, այս տարի ևս կինոփառատոնում իր մրցանակներն է հանձնելու: Ժյուրիի կազմում են Ժան-Մաքս Մեժանը Ֆրանսիայից, Ջովաննի Օտտոնեն Իտալիայից, Արծվի Բախչինյանը Հայաստանից:

Փառատոնի բոլոր ֆիլմերն է դիտելու և իր գնահատականն է տալու Համաշխարհային եկեղեցական խորհրդի ժյուրին` Էկումենիկ ժյուրին, որի կազմում ընդգրկված են Գվիդո Կոնվենտսը Բելգիայից, Դենիս Մյուլլերը Ֆրանսիայից, իսկ Հայ Առաքելական Եկեղեցու ներկայացուցիչը դեռևս պարզ չէ:

19.06.2009, 19:44

Aysor.am

Երաժշտության տոնը` «համաժողովրդական տոն»

«Այդ օրը յուրահատուկ է նրանով, որ երաժշտությունը դառնում է օրվա հերոս. ովքեր ցանկունում են մասնակցել տոնին, կարող են բացօթյա համերգներով հանդես գալ իրենց կատարումներով»,- լրագրողների հետ հանդիպման ընթացքում հայտարարեց ՀՀ մշակույթի նախարար Հասմիկ Պողոսյանը` հունիսի 21-ին անցկացվող Երաժշտության տոնի կապակցությամբ:

Նշենք, որ արդեն երրորդ տարին է, ինչ Հայաստանում ՀՀ մշակույթի նախարարությունը և Հայաստանում Ֆրանսիայի դեսպանությունը կազմակերպում են Երաժշտության տոն` կենդանի հնչողությամբ և բազմաժանր կատարումներով: Տոնն առաջին անգամ նշվել է Ֆրանսիայում` մշակույթի նախարարության նախաձեռնությամբ 1982 թ-ին:

«Մեզ համար այս տոնը շատ կարևոր է, քանի որ Հայաստանում երաժշտության նկատմամբ հատուկ վերաբերմունք կա, և հասարակությունն ակտիվ արձագանքում է երաժշտական բոլոր ծրագրերին», - հայտնեց Հ. Պողոսյանը:

Նախարարը տեղեկացրեց նաև, որ ՀՀ կառավարության աշխատանքների շնորհիվ` այս տարի միջոցառմանը մասնակցելու են նաև Հանրապետության մարզերը` 24 քաղաքներով, և հատուկ համերգաշար է նվիրվելու հայ մեծանուն կոմպոզիտոր Կոմիտաս վարդապետի 140-ամյակին: Երևանի Կոմիտասի անվան պետական կոնսերվատորիայի պուրակում` Կոմիտասի արձանի մոտ, կանցկացվի «Հարգանքի տուրք Կոմիտասին» խորագրով դասական երաժշտության համերգ, որին մասնակցություն են ունենալու հայկական դասական երաժշտության հայտնի ներկայացուցիչներ և երգչախմբեր:

«Այն դառնում է համաժողովրդական տոն, որին մենք մասնակցում ենք և որպես մասնակիցներ, և որպես ունկնդիրներ», - ընդգծեց մշակույթի նախարարը:

Հիշեցնենք, որ համերգները մայրաքաղաքում մեկնարկելու են ժ. 12-ից և մինչև կեսգիշեր մայրաքաղաքի կենտրոնական փողոցներում, զբոսայգիներում ու հրապարակներում, բացօթյա սրճարանների հարակից տարածքներում կհնչի բազմաժանր երաժշտություն` ջազ, ռոք, դասական, ժողովրդական, էլեկտրոնային և այլ:

Նախարար Հ. Պողոսյանը նշեց նաև, որ միջոցառումների մեծ մասը կազմակերպվել են մշակույթի նախարարության և Ֆրանսիայի դեսպանության կողմից, սակայն իրենք ակնկալում են, որ այդ օրը կլինեն նաև այնպիսի համերգներ, որոնք նախապես ծրագրված չէին և անհատների նախաձեռնության արդյունք կդառնան:

Ստորև ներկայացնում ենք միջոցառումների ցանկը`

• 18.30-21.30 - Ռոք համերգ Շառլ Ազնավուրի հրապարակում` «Empyray», «Dogma», «The Beautifield Project», «Vordan Karmir», «E.V.A.», «Road Movie» ռոք խմբերի մասնակցությամբ,

• 00.00-24.00 - Ռոք համերգ Սիրահարների այգում (Պողոսյան պարտեզներ)` «The Beautifield Project», «Menq, Loorr»,

• 22.00-23.30 - Դասական երաժշտության համերգ Կոնսերվատորիայի այգում` «Հարգանքի տուրք Կոմիտասին»,

• 21.00-22.30 - Ֆրանսիական շանսոն Հաղթանակի զբոսայգում` ֆրանսիացի երգչուհի Նատալի Ժոլի,

• 21.00-24.00 - Ջազ համերգ Պապլավոկ սրճարանում` հայ ջազ կատարողներ, ֆրանսիացի ջազմեններ Ստեֆան Բելմոնդո` շեփոր, և Էրիկ Լենինի` դաշնամուր,

• 18.00-24.00 բազմաժանր համերգներ տեղի կունենան նաև Հյուսիսային պողոտայում, «Մարիոթ Արմենիա» հյուրանոցի հարակից տարածքում, «Les amis de Jean-Jacques» (Թումանյան փողոց), ռեստորանի հարակից տարածքում, ինչպես նաև «Փարիզյան սուրճ», «Studio Café», (Աբովյան 25), «Square One» (Աբովյան 1), «Art Bridge» (Աբովյան 20) սրճարաններին հարող տարածքներում:

19.06.2009, 15:32

Aysor.am

ԱԺ-ն ընդունեց համաներման մասին որոշում

ԱԺ-ն այսօրվա արտահերթ նիստում ընդունեց ՀՀ նախագահի համար ընդունելի առաջարկների հիման վրա կազմված «Համաներում հայտարարելու մասին» ԱԺ որոշումն ընդունելու մասին հարցը: ԱԺ 98 պատգամավորներ կողմ քվեարկեցին որոշմանը, 1 պատգամավոր` դեմ, 3 պատգամավոր` ձեռնպահ:

Տեղեկացնենք, որ համաներման մասին հարցի քննարկումից հետո ՀՀ Արդարադատության նախարար Գևորգ Դանիելյանը, ով ԱԺ-ում ներկայացնում էր նախագիծը, 30 րոպե ժամանակ խնդրեց պատգամավորների առաջարկներն ընդունելու և նախագծի լրամշակված տարբերակը քվեարկության ներկայացնելու համար:

Գ. Դանիելյանը մանրամասն ներկայացրեց այն փոփոխություններն ու լրացումները, որոնք քննարկման ընթացքում առաջարկվել էին ԱԺ պատգամավորների կողմից: Հենց փոփոխված տարբերակն էլ դրվեց քվեարկության և ընդունվեց:

19.06.2009, 18:00

Aysor.am

Հանրապետականը կողմ է քվեարկելու համաներման մասին նախագծին

«Այս համաներումը տարբերվում է մյուսներից, քանի որ այն հասարակական պահանջի հետևանք էր և այն մեծ առաջընթաց է ժողովրդավարական սկզբունքների առումով: Սա սայթակողների նկատմամբ համաներում է, այսինքն` որևէ պահի, երևույթի ազդեցության տակ հանցանք կատարած մարդկանց համաներում է»,- հայտարարեց «Հանրապետական» խմբակցության ղեկավար Գալուստ Սահակյանը:

Գ. Սահակյանը նշեց, որ փաստաթուղթը «քաղաքական կամքի արդյունք է և հետևանքներն էլ քաղաքական են լինելու, բայց այն իրավաբանական է: Նա նաև տեղեկացրեց, որ փաստաթուղթը «վերաբերում է նաև մարտի 1-2-ից առաջ կատարված բոլոր դեպքերին»:

«Այս փաստաթուղթը քաղաքական բարձր գնահատական ունի և ես կարծում եմ, որ սրա հրամայականը ոչ թե պետք է տեսնեն եվրոպաներում, ոչ էլ այն, որ նախագահը մեղանչողական մի գործողություն է կատարում: Ես կարծում եմ, որ մեր երկրի նախագահը որդեգրել է մի քաղաքականություն` իր յուրաքանչյուր քայլը հասցնում է ժողովրդին, ինչը ժողովրդավարության ամենակարևոր տարրն է, որի հետևանք է այս փաստաթուղթը»,- մանրամասնեց Գ. Սահակյանը:

Հանրապետական խմբակցության ղեկավարը քաղաքական բոլոր ուժերին կոչ արեց հանդուրժող լինել և «պայքարել` տարբեր եղանակներով լուծելու մեր երկրում անարդարության երևույթները»: Նա նշեց, որ Հանրապետական կուսակցությունն այդ եղանակները տեսնում է և խնդիրների լուծման համար լուրջ քայլեր է ձեռնարկելու, իսկ «մեր հասարակությունն, իրոք, առողջացման ճանապարհ է անցնելու նաև այս համաներման որոշման ընդունումից հետո»:

«Շատ բնական պետք է դիտի հասարակությունը, որ մենք կողմ ենք քվեարկելու որոշմանը»,- ամփոփելով իր խոսքը` նշեց Գ. Սահակյանը:

19.06.2009, 17:51

Aysor.am

«Համաներումը մեծ երևույթ է և այն պետք է ընդունել»

«15 ամիս է անցել այն ժամանակից, երբ մեր երկրում քաղաքական փնտրտուք սկսվեց, որի նպատակն էր երկրում հաստատել քաղաքացիական համերաշխության, ազգային համաձայնության և հասարակական համաձայնության մթնոլորտը»,- հայտարարեց ԱԺ պատգամավոր Արամ Սաֆարյանը` ներկայացնելով «Բարգավաճ Հայաստան» խմբակցության դիրքորոշումը ՀՀ նախագահի կողմից ներկայացված համաներման մասին նախագծի վերաբերյալ:

Ա. Սաֆարյանը հիշեցրեց, որ անցած բոլոր ամիսների ընթացքում ԲՀԿ-ն մշտապես հանդես է եկել «Մի վնասիր» սկզբունքով, հետևողականորեն նպաստել է հանդուրժողական մթնոլորտի կայացմանը:

«Այսօր ունենք մի փաստաթուղթ, որն անշուշտ իրավական է, քաղաքական և մարդասիրական է: Այս փաստաթուղթը միայն չի վերաբերում մարտի մեկի իրադարձությունների հետևանքով ձերբակալվածներին, այն ավելի լայն է և վերաբերում է գթասրտությանը կարոտ շատերին»,- իր ելույթում ընդգծեց Ա. Սաֆարյանը:

Ա. Սաֆարյանը նշեց, որ համամիտ է այսօրվա նիստում հնչած մի շարք պատգամավորների հետ այն առումով, որ «միայն ուժեղը կարող է լինել մարդասեր, հանդուժող և բարի, և ՀՀ իշխանությունը, հայտարարելով համաներման մասին ակտը, ցույց կտա, որ ուժեղ է, մարդկային և պատրաստ է կառուցողական, օգտակար ու փոխշահավետ քննարկումների»:

«Հրապարակներից պետք է քաղաքական քննարկումները տեղափոխել քաղաքական դահլիճներ, որտեղ պետք է ընթանան ամենաթեժ մարտերը, որոնք կվերջանան փոխհամաձայնության և հանդուրժողական մթնոլորտում»,- կարծում է պատգամավորը, ով համոզված է, որ «Հայաստանում չկա այնպիսի քաղաքական հարց, որը հնարավոր չէ լուծել քաղաքական հանդուրժողական մթնոլորտի վրա»:

Ա. Սաֆարյանը նշեց նաև, որ ԲՀԿ-ն «կողմ է եղել ԵԽԽՎ բոլոր բանաձևերի կատարմանը և ուրախ է, որ այս ակտով կատարում ենք այն պահանջներից մեկը, որը խանգարում էր կառուցողական երկխոսության մթնոլորտին»:

«Հարյուրավոր մարդիկ ազատություն կստանան իշխանության մեծահոգության շնորհիվ, սա մեծ երևույթ է և այն պետք է ընդունել»,- ամփոփելով իր ելույթն` ընդգծեց Ա. Սաֆարյանը:

19.06.2009, 17:09

Aysor.am

Համաներումը ոչ բոլորի վրա կտարածվի

Այսօր Ազգային Ժողովի արտահերթ նիստում քննարկվում է համաներման հարցը: Նիստին ներկա արդարադատության նախարար Գևորգ Դանիելյանը, ներկայացնելով համաներման մասին ՀՀ նախագահի որոշման նախագիծը, հայտնել է, որ մարտի 1-ի իրադարձությունների հետևանքով ձերբակալված պատգամավոր Սասուն Միքաելյանի վրա համաներումը չի տարածվի, քանի որ վերջինս մեղադրվում է մեկ այլ հոդվածով:

Հիշեցնենք, որ Սասուն Միքաելյանը մեղադրվում է 225 հոդվածի 1-ին մասով՝ «Զանգվածային անկարգություններ կազմակերպելը» եվ 235 հոդվածի 1-ին եվ 2-րդ մասերով՝ «Ապօրինի զենք զինամթերք պահելը եվ կրելը»:

Սակայն համաներում կտարածվի Գագիկ Ջհանգիրյանի, Սմբատ Այվազյանի, Հակոբ Հակոբյանի և Մյասնիկ Մալխասյանի վրա:

Հետախուզման մեջ գտնվող Խաչատուր Սուքիասյանի և Նիկոլ Փաշինյանի վրա համաներումը կարող է տարածվել, եթե նրանք վերադառնան և նրանց հանդեպ կայացվի դատարանի վճիռ, ինչից հետո միայն պարզ կլինի թե ինչ չափով կարող է նրանց վրա տարածվել համաներումը:

Նշենք, որ Ազգային ժողովի առջև ինքնաբուխ հավաքվել են մի խումբ մարդիկ, ովքեր վանկարկում են «Ազատություն» և պահանջում են, որ ԱԺ-ն ընդունի համաներման մասին որոշում:

19.06.2009, 14:41

Aysor.am

«Իրանի մասնատումը կսկսվի էթնիկ միավորների զարգացումից»

«Ով էլ Իրանի ընտրությունների արդյունքում նախագահ նշանակվի, Հայաստանի հանդեպ Իրանի քաղաքականությունը չի փոխվելու, որվհետև այն որոշակի ռազմավարության վրա է հիմնված, և առանձին անձերը չեն կարող այդ քաղաքականությունն արմատապես փոխել», - լրագրողների հետ հանդիպման ժամանակ կարծիք հայտնեց Երևանի պետական համալսարանի իրանագիտության ամբիոնի վարիչ Գառնիկ Ասատրյանը:

Հիշեցնենք, որ ընտրությունների արդյունքները դժգոհություն են առաջացրել, և Իրանի խոշոր քաղաքներում անցկացվում են զանգվածային ցույցեր` ընտրությունների արդյունքները չեղյալ հայտարարելու պահանջով:

Գ. Ասատրյանը Իրանի նախագահական ընտրություններում «կարևոր առանձնահատկություն է նկատել, ինչը առաջին անգամ է կատարվել Իրանի նորագույն պատմության մեջ»:

«Առաջին անգամ ընտրություններում Իրանի էթնիկական միավորումները դարձան ներքին քաղաքական մանիպուլիացիայի առարկա», - հստակեցրեց Գ. Ասատրյանը:

Գ. Ասատրյանն ընդգծեց, որ Իրանում ազգային փոքրամասնություններ չկան, կան կրոնական փոքրամասնություններ, ինչն էլ բավական ակտիվ ձևով օգտագործեցին թեկնածուները` ձայներ ստանալու համար: Գ. Ասատրյանը հայտնեց, որ Մուսավին առաջինն է սկսել «մանիպուլիացիաների կիրառումը», երբ խոստումներ տվեց դպրոցներ բացելու, էթնիկ միավորների լեզուն տարածելու մասին:

«Այս իմաստով դպրոցների բացումը, կամ տեղական լեզուներով գրականության հրատարակումը, թերթերի հիմնադրումը և այս երևույթի խորացումն ու զարգացումը վտանգավոր է նրանով, որ հենց այս գործընթացը սկսվի, կսկսվի Իրանի մասնատման գործընթացը», - համոզված է Գ. Ասատրյանը:

Գ. Ասատրյանը մասնատման մասին ենթադրությունները բացատրում է նաև այն հանգամանքով, որ երկրի տարածքում սփռվող բազմաթիվ հեռուստաըներությունների, զանգվածային այլ լրատվամիջոցների միջոցով էթնիկական բնույթը շեշտադրող նյութեր են հեռարձակվում, ինչը «էթնիկական հակասություններ ակտիվացնելու միտում ունի»:

«Իրանի մասնատումը, ըստ Գ. Ասատրյանի, կբերի անկանխատեսելի հետևանքների և Իրանում, և տարածաշրջանում, և Հայաստանում», - ամփոփելով խոսքը` հայտնեց Գ. Ասատրյանը:

18.06.2009, 15:54

Aysor.am

Իրանի հետընտրական զարգացումները «գունավոր հեղափոխություն չէ»

«Երեկ գիշերվա տվյալներով Իրանի գրեթե բոլոր խոշոր քաղաքներում, այդ թվում Թեհրանում, Շիրազում, տեղի են ունենում մասսայական ցույցեր, որոնց հիմնական պահանջն է` չեղյալ հայտարարել ընտրությունների արդյունքները», - Իրանում հետընտրական իրավիճակի, դրա զարգացումների ու հնարավոր հանգուցալուծումների մասին այսօր լրագրողների հետ իր գնահատականներով կիսվեց Երևանի պետական համալսարանի իրանագիտության ամբիոնի վարիչ, բանասիրական գիտությւոնների դոկտոր-պրոֆեսոր Գառնիկ Ասատրյանը:

Հիշեցնենք, որ Իրանի նախագահական ընտրությունների արդյունքում Մահմուդ Ահմադինեժադի օգտին քվեարկել են ընտրությանը մասնակցածների 62, 6 տոկոսը, իսկ Միր-Հոսեյն Մուսավիի օգտին` 33, 8 տոկոսը:

Գ. Ասատրյանը, մանրամասն ներկայացնելով ընտրությանը մասնակից թեկնածուներին, նրանց գաղափարախոսությունը, հայտնեց այն համոզմունքը, որ հետընտրական զարգացումները միևնույն` «իսլամական հեղափոխության ծնունդ երկու ուժերի բախում է»: Նա նշեց, որ ընդհարման հիմնական կողմերը` վերընտրված նախագահ Մահմուդ Ահմադինեժադը և Իրանի նախկին վարչապետ Հոսեյն Մուսավին, գաղափարական և արմատական խնդիրների առումով զգալի տարբերություններ չունեն:

Դոկտոր-պրոֆեսորը համոզված է, որ Իրանում տեղի չի ունենում գունավոր հեղափոխություն, քանի որ ներքին ընդվզումները չեն ուղղորդվում դրսից: Սակայն այն, որ հետագայում, հնարավոր է, որ դրանք դառնան միջոց` մասնատելու Իրանը, ըստ Գ. Ասատրյանի, հնարավոր է: Նա նշեց, որ այս պարագայում Իրանի իշխանությունները «պետք է իմաստնություն դրսևորեն և գան ընդհանուր հայտարարի` թույլ չտալու, որ արտաքին ուժերը որևէ ազդեցություն ունենան»:

«Վաղը Թեհրանում տեղի կունենա մեծ նամազը, որը կկարդա երկրի առաջնորդ Այաթոլլա Ալի Համենեին, և իշխանությունները հույս ունեն, որ Ալի Համենեին կոչ կանի ընդդիմությանը դադարեցնել ցույցերը կամ գալ ընդհանուր հայտարարի», - հայտնեց Գ. Ասատրյանը:

Թե ե՞րբ ավարտին կհասնեն և ինչպիսի լուծում կստանան զանգվածային ցույցերը Գ. Ասատրյանի խոսքերով` ոչ ոք չի կարող ասել:

18.06.2009, 14:08

Aysor.am

Հանդիսատեսը ներկա է լինում` նույնիսկ պատուհանագոգին նստած

Այսօր Նարեկացի արվեստի միությունում «Կինոերեկոներ չորեքշաբթի օրերին» ծրագրի շրջանակներում ցուցադրվելու են հայ ժամանակակից ռեժիսոր Արսեն Գասպարյանի վավերագրական «Թռիչք» (21 րոպե, 2004թ), «Դավիթ և Լալա» (27 րոպե, 2005 թ.), «Դեպի Էրգիր» (21 րոպե, 2006 թ.) ֆիլմերը: Այս մասին Aysor-ին տեղեկացրեց ՆԱՄ «Կինոերեկոներ չորեքշաբթի օրերին» ծրագրի պատասխանատու ղեկավար Րաֆֆի Մովսիսյանը:

Տեղեկացնենք, որ ՆԱՄ-ը կինոդիտումներ կազմակերպում է արդեն շուրջ 4 տարի: Յուրաքանչյուր չորեքշաբթի ցուցադրվում են ինչպես կինոյի դասականների գործեր, այնպես էլ ժամանակակից ռեժիսորների ստեղծագործություններ` ամենատարբեր ոճերում: Կինոդիտումներից հետո կազմակերպվում են քննարկումներ:

Ր. Մովսիսյանը հայտնեց, որ կինոդիտումներին հաճախելիությունը մեծ է: Նա նշեց, որ 60 հոգու համար նախատեսված դահլիճը բավարար չէ և հանդիսատեսը, ֆիլմերը դիտելու համար, ստիպված նստում է նույնիսկ արվեստի կենտրոնի պատուհանագոգերին:

Ֆիլմերը գտնելու և հանդիսատեսի դատին հանձնելու համար ՆԱՄ-ը համագործակցում է մի շարք կազմակերպությունների հետ, որոնց հետ «համագործակցության եզր գտել է»:

«Եղել է, որ հեղինակային իրավունքների հետ կապված խնդիրներ ենք ունեցել, սակայն հաջողվել է համագործակցության եզր գտնել և ֆիլմերը շարունակել են ցուցադրել անվճար հիմունքներով»,- մանրամասնեց Ր. Մովսիսյանը:

Նշենք, որ այսօրվա կինոդիտումից հետո կազմակերպվելիք քննարկմանը ներկա է գտնվելու նաև ներկայացվելիք ֆիլմերի ռեժիսորը` Ա. Գասպարյանը: Տեղեկացնենք նաև, որ ռեժիսորը 2004 թ-ին ավարտել է Երևանի թատրոնի և կինոյի պետական ինստիտուտի վավերագրական ֆիլմերի ռեժիսուրայի բաժինը (ռեժիսոր Ռուբեն Գևորգյանցի արվեստանոց): 2003 թ-ից ռեժիսոր է վավերագրական ֆիլմերի «Հայկ» կինոստուդիայում:

17.06.2009, 18:43

Aysor.am

Երաժշտության տոնն այս տարի կնշվի նաև ՀՀ մարզերում

Այս տարի ևս` արդեն երրորդ անգամ, Հայաստանում հունիսի 21-ին ՀՀ-ում Ֆրանսիայի դեսպանությունը և ՀՀ մշակույթի նախարարությունը Երևանում և հանրապետության մարզերում անց են կացնում Երաժշտության տոն միջոցառումը` բացօթյա, կենդանի հնչողությամբ և բազմաժանր կատարումներով: Այս մասին Aysor-ին հայտնեց ՀՀ մշակույթի նախարարության հասարակայնության հետ կապերի վարչության պետ Գայանե Դուրգարյանը:

Տեղեկացնենք, որ այս տարի տոնը նվիրվում է հայ մեծանուն կոմպոզիտոր, երգահան Կոմիտասի 140-ամյակին: Այն մայրաքաղաքում կմեկնարկի ժամը 12:00-ին և կշարունակվի մինչ կեսգիշեր:

Ինչպես նշեց Գ. Դուրգարյանը` տոնին կարող են մասնակցել և փողոցում իրենց ունկդիրներին երաժշտություն մատուցել և պրոֆեսիոնալ, և սկսնակ, և սիրողական երաժիշտները` ստեղծագործող ինչպես դասական երաժշտության, այնպես էլ երաժշտության ժամնակակից ոճերում:

«Մասնակցությունն ազատ է. յուրաքանչյուրը քաղաքի ցանկացած թաղամասում կամ փողոցում կարող է հանդես գալ, միայն համակարգվում է այն, որ նույն տեղում և միևնույն ժամին միանգամից մի քանի խմբեր չնվագեն», - մանրամասնեց Գ. Դուրգարյանը:

Վարչության պետը նշեց նաև, որ միջոցառումներից շատերը կազմակերպման նախաձեռնությունը հենց մշակույթի նախարարությանն ու Ֆրանսիայի դեսպանությանն է պատկանում: Երևանում համերգներ կկայանան սիրահարների այգում, Ազնավուրի հրապարակում, Կոնսերվատորիայի կից այգում, Հաղթանակի զբոսայգում և մի շարք սրճարաններում ու փողոցներում:

Տեղեկացնենք նաև, որ համերգներով հանդես կգան «Empyray», «The Beautified Project» ռոք խմբերը, Երևան ժամանած ֆրանսիացի երգչուհի Նատալի Ժոլին և ջազ երաժիշտ Ստեֆան Բելմոնդոն, բացի այդ առանձին համերգով հարգանքի տուրք կմատուցվի Կոմիտասին:

17.06.2009, 15:21

Aysor.am

«Հաշվետվությունը կօգնի հասնել միջազգային չափանիշներին»

«Հաշվապահական հաշվառման և աուդիտի ոլորտը ֆինանսատնտեսական ոլորտի կարևոր օղակներից է, և դրա արդյունավետ աշխատանքը մեծապես կապված է երկրի տնտեսության զարգացման հետ», - հայտարարեց ՀՀ ֆինանսների նախարար Տիգրան Դավթյանը` Համաշխարհային բանկի Ստանդարտների և կաննոնների պահպանման հաշվապահական հաշվառման և աուդիտ ոլորտի հաշվետվության շնորհանդեսի և կոնֆերանսի ժամանակ:

Տ. Դավթյանը նախ ողջունեց կոնֆերանսի մասնակիցներին և շնորհակալություն հայտնեց միջազգային գործընկերներին` հաշվապահական հաշվառման և աուդիտ ոլորտի խնդիրների հետ կապված մի շարք հարցեր քննարկելու համար:

Նախարարը տեղեկացրեց, որ արդեն մի քանի տարի է, ինչ ՀՀ Կառավարությունը հետամուտ է լինում այս ոլորտը միջազգային չափանիշներին հասցնելու համար, և կատարվել են մի շարք բարեփոխումներ: Նա նշեց, որ եղել է նաև համագործակցություն միջազգային կառույցների հետ, այդ թվում` Համաշխարհային բանկի և դրան հարակից կառույցների հետ:

«Մեզ համար կարևոր է իմանալ, թե այդ բարեփոխումներով մենք որտե՞ղ ենք գտնվում, ի՞նչ պետք է անենք, ինչպիսի՞ ճանապարհ պետք է անցնեք, որպեսզի կարճ ժամանակահատվածում կարողանանք հասնել միջազգային չափանիշներին»,- հայտնեց Տ. Դավթյանը և նշեց, որ Համաշխարհային բանկի կողմից կատարված ուսումնասիրությունն էլ տալու է հենց այդ հարցերի պատասխանները:

Տ. Դավթյանի խոսքերով` նախարարությունն, այնուամենայնիվ, «սպասողական կեցվածք չի դրսևորել և մինչ հաշվետվության ներկայացումը շարունակել է սկսված բարեփոխումները»:

Նախարարն, անդրադառնալով հնարավոր համագործակցություններին, նշեց, որ ոլորտը «բաց է համագործակցության համար և պատրաստ է ընդունել միջազգային կազմակերպությունների աջակցությունը, ինչի համար աշխատանք է տարվում` ազատ, ռեալ մրցակցային իրավիճակ ստեղծելու նպատակով»:

17.06.2009, 11:58

Aysor.am

Ներկայացվեց Համաշխարհային բանկի հաշվետվությունը

Այսօր տեղի ունեցավ Համաշխարհային բանկի Ստանդարտների և կաննոնների պահպանման հաշվապահական հաշվառման և աուդիտ ոլորտի հաշվետվության շնորհանդեսը: Շնորհանդեսին ներկա էր ՀՀ ֆինանսների նախարար Տիգրան Դավթյանը, Համաշխարհային բանկի Երևանյան գրասենյակի ղեկավար Արիստոմենե Վարուդակիսը:

Միջոցառմանը մասնակցում էին նաև ՀՀ պետական մարմինների, հասարակական կազմակերպությունների, դոնոր կազմակերպությունների, մասնագիտական ծառայություններ մատուցող և այդ ծառայություններից օգտվող կազմակերպությունների ներկայացուցիչներ:

Կազմակերպիչների խոսքերի համաձայն` միջոցառումը կազմակերպվել է «քննարկելու հաշվապահական հաշվառման և աուդիտի ոլորտը, դրա դերը, զարգացումներն ու խնդիրները»:

Միջոցառման ընթացքում ներկայացվեց Համաշխարհային բանկի մասնագետների կողմից կազմված հաշվապահական հաշվառման և աուդիտի ոլորտի հաշվետվությունը, այնուհետև քննարկվելու են մասնագիտական եզրահանգումները, ինչպես նաև լինելու են առաջարկություններ այդ ոլորտի բարեփոխումների վերաբերյալ:

Ոլորտի մասնագետները ներկայացնելու են նաև աշխարհում և տարածաշրջանային երկրներում ֆինանսական հաշվետվողականության բնագավառում իրականացվող բարեփոխումները, անդրադարձ են կատարելու այդ բարեփոխումների վրա ֆինանսական և տնտեսական ճգնաժամի ազդեցության խնդիրներին:

17.06.2009, 11:19

Aysor.am

Արցախը Երևանի կենտրոնում` նկարիչների կտավներում

Այսօր Հայաստանի Նկարիչների միությունում Լեռնային Ղարաբաղի Հանրապետության Նկարիչների միության հետ համատեղ տեղի ունեցավ Արցախի նկարիչների ցուցահանդեսի բացումը: Բացման արարողությանը ներկա էին Հայաստանի և Արցախի Ազգային ժողովների նախագահներ Հովիկ Աբրահամյանը և Աշոտ Ղուլյանը, ՀՀ մշակույթի նախարար Հասմիկ Պողոսյանը և այլ պաշտոնատար անձինք:

«Այսօր բացվում է մի ցուցահանդես, որի նմանը վաղուց չենք ունեցել: Սա պետք է դիտել ոչ միայն որպես մշակութային երևույթ, այլև որպես մեր ազգի մի մասի հոգու խոսք, մտքի իղձեր` արտահայտված կերպարվեստում»,- բացման խոսքում հայտնեց Հայաստանի Նկարիչների միության նախագահ Կարեն Աղամյան:

Ցուցահանեսում ներկայացված էին արցախցի 35 նկարիչների շուրջ 115 ստեղծագործություններով: Ստեղծագործությունների հիմնական թեման Արցախն էր, Արցախյան ազատամարտը, կյանքը պատերազմի տարիներին, ինչպես նաև` Արցախի վրածնունդը:

Արցախի Նկարիչների միության նախագահ Լենորդ Զաքարյանը իր խոսքում նշեց, որ արդեն մի քանի տարի է, ինչ Հայաստանի և Արցախի նկարիչները համագործակցում են, ինչը նպաստում է արցախյան նկարչության զարգացմանը:

«Շատ ուրախ եմ, որ Արցախի հիասքանչ պատկերը լինելու է Երևանի կենտրոնում: Ես` որպես մշակույթի նախարար, ցանկանում եմ, որ մյուս ոլորտներում ևս Արցախի և Հայստանի համագործակցությունը կայանա»,- հայտնեց մշակույթի նախարար Հասմիկ Պողոսյանը:

Ցուցահանդեսի մասնակից Արկո Բաղդասարյանը լրագրողների հետ զրույցում հայտնեց, որ ինքը լավատես է և վստահ, որ կգա մի ժամանակ, որ «Հայաստանի երկու մասերը միասին կլինեն»: Նա նշեց, որ արցախցին հանգիստ է, քանի որ ոչ թե «հող է գրավել, այլ իրենց հարազատ հողերն է հետ վերցրել, ինչը նշանակում է, որ արցախյան հիմնահարցը, ի վերջո, դրական լուծում է ստանալու»:

16.06.2009, 19:16

Aysor.am

Նախագահները կքննարկեն հայ-սիրիական հարաբերությունները

«Թեև առաջին հայացքից թվում է, թե հայ-սիրիական հարաբերությունները պարզ են ու հասկանալի, բայց շատ հարցեր կան, որոնք լուսաբանման կարիք ունեն»,- կարծում է արևելագետ Սուրեն Մանուկյանը, ով լրագրողների հետ խոսեց Հայաստանի և Սիրիայի փոխհարաբերությունների մասին` Սիրիայի նախագահի` Հայաստան սպասվելիք այցի համատեքստում:

Հիշեցնենք, որ Սիրիայի Արաբական Հանրապետության նախագահ Բաշար Ալ-Ասադը երկօրյա պաշտանական այցով Հայաստան է ժամանելու վաղը:

Արևելագետի խոսքերով, հայ-սիրիական հարաբերություններն, ի սկզբանե, ընկալվում են` որպես բարեկամական, դաշնակցային, ռազմավարական, որովհետև պատմականորեն հայ-սիրիական հարաբերությունները շատ խորն արմատներ ունեն:

Ս. Մանուկյանը հանգամանալից ներկայացրեց հայ-սիրիական հարաբերությունների սկիզբը`Հայոց ցեղասպանության արդյունքում հայերի` Սիրայում բնակվելու ժամանակներից սկսած, զարգացումը Խորհրդայիւն Հայաստանի ժամանակաշրջանում և Հայաստանի անկախությունից հետո: Նա նշեց, որ Սիրիայի կողմից հայերն «ընկալվում են` որպես հավատարիմ, գործունյա, սիրիական հասարակությունում առավելապես ինտեգրված ազգային փոքրամասնություն»:

«1991 թ-ին դեկտեմբերին Սիրիան առաջին հանրապետություններից էր, որ ճանաչեց Հայաստանի նորանկախ Հանրապետությունը, իսկ արդեն հաջորդ տարի մենք Դամասկոսում ստորագրեցինք հայ-սիրիական դիվանագիտական հարաբերությունների հաստատման վերաբերյալ պայմանագիր»,- մանրամասնեց Ս. Մանուկյանն ու ընդգծեց, որ այդպիսի խոստումնալից սկիզբը պետք է հուշեր, որ հարաբերություններն ընթանալու էին դրական զարգացմամբ:

«90-ականների վերջերից հայ-սիրիական հարաբերություններում որոշակի սառեցում և պասիվություն նկատվեց, ինչը արտաքուստ հակառակ դրսևորումներ ուներ: Սակայն այն պայմանավորվածությունները, որոնք ստորագրվում էին, ամբողջ ծավալով չէին իրականանում, և միակ ոլորտը, որտեղ կարող ենք նշել դրական զարգացումներ` հայ-սիրիական մշակութային ոլորտն է»,- հայտնեց արևելագետը:

Այս սառեցումը, ըստ Ս. Մանուկյանի, պայմանավորված է մի շարք խնդիրներով, որոնցից մեկը քաղաքական, դիվանագիտական ներկայացուցչությունների խնդիրն է: Նա նշեց, որ 2002 թ-ից Սիրիան իջեցրեց Հայաստանում Սիրիայի դեսպանի կարգավիճակը, և այդուհետ մենք Հայաստանում ունենք դեսպանի ժամանակավոր հավատարմատար: Այս քայլին դիմել է նաև Հայաստանը` դրանից 2 տարի հետո:

«Երկրորդ խնդիրը տնտեսական կապերի գրեթե բացակայությունն է»,- կարծում է Ս. Մանուկյանը, ով հույս հայտնեց, որ հայ-սիրիական բանակցությունների ընթացքում մեծ դեր կհատկացվի նաև տնտեսական հարաբերությունների զարգացման ուղղությամբ քննարկումներին:

Խնդիրներից է նաև Հայաստանի կողմից կիրառվող վիզայի ռեժիմը և վերջին տարիներին Սիրիայում Հայոց ցեղասպանության ոգեկոչման վերաբերյալ միջոցառումների ոչ լիարժեք իրականացումն ու կազմակերպումը:

«Հայ-սիրիական հարաբերությունների նոր զարկը տրվեց փետրվարից, երբ Դամասկոսում էր Հայաստանի արտգործնախարարը, որտեղ էլ նախնական համաձայնություն ձեռք բերվեց Սիրիայի նախագահի` Հայաստան կատարելիք այցի մասին»,- նշեց Ս. Մանուկյանը:

Ս. Մանուկյանը համոզված է, որ երկու երկրներն էլ «հասկանում են, որ անցել է ժամանակը դեկլարատիվ բարեկամության և գալիս է ավելի հիմնավորված և ավելի առարկայական հարաբերությունների անցնելու ժամանակաշրջան»: Նրա կարծիքով, հենց վերոնշյալ խնդիրներն են, որ դառնալու են երկու երկրների նախագահների քննարկման թեմա:

16.06.2009, 17:51

Aysor.am

Արևելագետը մեկնաբանում է հայ-սիրիա-թուրքական հարաբերությունները

«Վերջին ժամանակներում թուրք-սիրիական ջերմ հարաբերությունները սերտորեն կապված են հայ-սիրիական հարաբերությունների սառեցման հետ»,- լրագրողների հետ հանդիպման ժամանակ հայտնեց արևելագետ Սուրեն Մանուկյանը:

Պատմական ակնարկ կատարելով` Ս. Մանուկյանը հիշեցրեց, որ մինչև 2000 թ-ը` Բաշար Ալ-Ասադի նախագահությունը, թուրք-սիրիական հարաբերությունները բավականին վատ էին: Նա նշեց, որ նույնիսկ կար ժամանակ, երբ խոսք էր գնում ռազմական բախման մասին:

«2000 թ-ից հետո նկատելի է անշեղորեն զարգացում: Համաձայնություններ կնքվեցին սիրիայի և Թուրքիայի միջև գոյություն ունեցող բոլոր վիճելի հարցերի շուրջ»,- մանրամասնեց Ս. Մանուկյանը:

Արևելագետի կարծիքով, հայ-սիրիական հարաբերությունների սառեցումը և Հայոց ցեղասպանության հետ կապված դիրքորոշումների փոփոխությունը կապված է հենց թուրք-սիրիական հարաբերությունների զարգացման հետ:

Միևնույն ժամանակ Ս. Մանուկյանը վստահ է, որ Սիրիայի նախագահի` Հայաստան կատարելիք այցելությունը չի խոչընդոտի Թուրքիայի հետ հարաբերություններին:

«Սիրիայի արտգործնախարաը Հայաստանում ունեցած մամուլի ասուլիսի ժամանակ հատուկ շեշտեց, որ Սիրիան շատ ոգևորված է հայ-թուրքական հարաբերությունների ջերմացումով: Այս այցը տեղավորվում է հայ-թուրքական հարաբերություններում տեղի ունեցող որոշակի փոփխությունների մեջ և սա ամենահարմար առիթն է, երբ Սիրիայի նախագահը կարող է գալ Հայաստան` չնեղացնելով իր դաշնակից երկիր Թուրքիային»,- մանրամասնեց Ս. Մանուկյանը:

Ս. Մանուկյանը տեղեկացրեց նաև, որ սիրիական մամուլն ակտիվ քննարկում է վերոնշյալ հարցը: Մամուլում ի հայտ են գալիս այնպիսի տեսակետներ, ինչպիսին է հայ-թուրքական հարաբերություններում Սիրիայի` որոշակիորեն միջնորդի դեր ստանձնելու հարցը:

Հայ-սիրիական հարաբերությունների սառեցման գործընթացում, ըստ արևելագետի, պակաս դերակատարում չունի Սիրայում հայկական համայքի փոքրացումը: Ս. Մանուկյանը նշեց, որ Սիրիայի հայկական համայնքը վերջին ժամանակներս մեծ ծավալներով տեղափոխվում է բնակություն հաստատելու Կանադայում և ԱՄՆ-ում:

Ս. Մանուկյանը գտնում է, որ հայ-սիրիական հարաբերությունների զարգացման համար կարևոր է Սիրիայում հայկական համայնքի պահպանումը, ինչին կնպաստի հայ ուսուցիչների` Սիրիա գործուղումը:

16.06.2009, 17:27

Aysor.am

Մանրանկարչական ցուցահանդես` «Հայարտ» մշակութային կենտրոնում

«Հայարտ» մշակութային կենտրոնում հունիսի 19-ին տեղի է ունենալու գեղանկարիչ Նարինե Գրիգորյանի անհատական ցուցահանդեսը: Այս մասին Aysor-ին տեղեկացրեց «Հայարտ» մշակութային կենտրոնի ադմինիստրատոր Նախշուն Սահակյանը:

Նշենք, որ Նարինե Գրիգորյանի ստեղծագործությունները մանրանկարչության ոճում են: Այս ցուցահանդեսում ներկայացվելու են հեղինակի «Հայոց Այբուբենը», «Հավերժություն», «Կոմիտաս» շարքերը, ինչպես նաև հոգևոր թեմաներով այլ ստեղծագործություններ:

Սա Նարինե Գրիգորյանի երկրորդ անհատական ցուցահանդեսն է: Առաջինը տեղի է ունեցել 2006 թ-ին Բեյրութում` Հայ կաթողիկե Մեսրոպյան բարձրագույն վարժարանի հրավերով`տեր և տիկին Թերզյանների հովանավորությամբ:

Հեղինակի աշխատանքները ցուցադրվել են ԱՄՆ-ում, Ֆրանսիայում, Բուլղարիայում, Ռուսաստանում, Իտալիայում: Ն. Գրիգորյանը զբաղվում է նաև տիկնիկագործությամբ, հագուստի մոդելավորմամբ և դիզայնով, ստեղծագործում է երաժշտության և գրականության ասպարեզում, «Խատուտիկ» մանկական պարային համույթի գեղարվեստական ղեկավարն ու պարուսույցն է:

Ինչպես տեղեկացրեց «Հայարտ» մշակութային կենտրոնի ադմինիստրատոր Նախշուն Սահակյանը` ցուցահանդեսի բացումը տեղի է ունենալու 16:00-ին, և այն գործելու է մինչև հունիսի 29-ը: Մուտքն ազատ է:

16.06.2009, 13:10

Aysor.am

«Գերնպատակը որակյալ հանրակրթությունն է»

«Այս տարի կրթական բնագավառում իրականացվում են բազմապիսի բարեփոխումներ, որոնց բարեհաջող ընթացքի համար շատ կարևոր է, որպեսզի այդ բարեփոխումները կրթական համակարգում իրագործող մարդիկ լինեն նոր չափանիշներին համապատասխան», - լրագրողների հետ ունեցած զրույցի ժամանակ հայտնեց ՀՀ կրթության և գիտության նախարար Արմեն Աշոտյանը` անդրադառնալով այսօր մեկնարկած մասնագիտական որակավուրումների բարձրացման դասընթացների կարևորությանը:

Նախարարը նշեց, որ դպրոցների` հատկապես ավագ դպրոցների ուսուցիչների և տնօրենների վերապատրաստման այս ծրագիրը դիտվում է` որպես հանրակրթական դպրոցների կայացման հարցում «անկյունաքարային միջոցառում, որովհետև մեր վաստակաշատ մանկավարժների առջև դրված են նոր որակի, նոր ծրագրերի, նոր մեթոդաբանության պահանջներ»:

«Սա այն ամենն է, ինչը մեզ պետք է թույլ տա հուսալ, որ ավագ դպրոցների համակարգը կայանալու է», - նշեց Ա. Աշոտյանը:

Ա. Աշոտյանը բացատրեց նաև, որ դասընթացների կազմակերպման ժամանակահատվածի համար ընտրվել է «օպտիմալ տարբերակը, որպեսզի ավարտվի բուն ուսումնական գործընթացը և դեռևս չսկսվի նոր ուսումնական տարին»:

«Հնարավոր չէ ընտրել մի ժամանակահատված, որ բոլորին հարմար լինի, և ընտրել ենք մի ժամանակահատված, որտեղ, կարծես թե, որևէ գործըթաց տապալելու ռիսկերը մինիմալացվել են», - պարզաբանեց նախարարը:

Նախարարի տեղեկացմամբ` հաջորդ տարիների համար պետք է մտածել վերապատրաստման որակի վերահսկողության նոր մեխանիզմներ ներդրնելու մասին, որպեսզի հնարավոր լինի գնահատել կատարված աշխատանքի արդյունավետությունը:

Խոսելով ավագ դպրոցների համակարգին անցնելու մասին` Ա. Աշոտյանը նշեց, որ դա կատարվել է մի շարք պատճառներով` հանրակրթական ոլորտի կրթության մակարդակի բարձրացման, իրականում հանրակրթությունը այնպիսի սեգմենտ դարձնելու, որից հետո «բաց ճակատով կարելի է դիմել բարձրագույն ուսումնական հաստատություն, միջին մասնագիտական ուսումնական հաստատություն, զինված լինել մասնագիտական գիտելիքներով»:

«Սակայն գերնպատակը որակյալ հանրակրթությունն է, և այստեղ մենք այլընտրանք չունենք», - ընդգծեց նախարարն ու հավելեց, որ «աշխարհը գնացել է այդ ճանապարհով և աշխարհին հաջողվել է, մենք էլ պետք է գնանք այդ ճանապարհով»:

Հաջողության հասնելու համար Ա. Աշոտյանը կարևորեց «բոլորիս ցանկությունը», ինչպես նաև ֆինանսական գործոնը, որը, չնայած ֆինանսատնտեսական ճգնաժամին, ապահովվելու է ՀՀ Կառավարության կողմից, քանի որ «գերակա է այս ոլորտում ներդրումներ կատարելու կարևորությունը»:

Ամփոփելով իր խոսքը` նախարար Ա. Աշոտյանը նշեց, որ ավագ դպրոցը պետք է «ապահովված լինի` նյութատեխնիկական և ուսումնառական տեսանկունից, պետք է ունենա որակյալ մանկավարժական կոլեկտիվ, պետք է ունենա հասարակական վստահություն, որպեսզի այս ռեֆորմը դիտվի` որպես հօգուտ արվող, ոչ թե փորձնական նորարարություն»:

15.06.2009, 13:33

Aysor.am

Վերապատրաստման դասընթացներ` ուղղված ավագ դպրոցների կայացմանը

Խաչատուր Աբովյանի անվան Հայաստանի պետական մանկավարժական համալսարանում այսօր մեկնարկեցին Հանրապետության մի շարք դպրոցների ուսուցիչների վերապատրաստման` մասնագիտական որակավորումների բարձրացման դասընթացները:

«Ուզում եմ ձեզ հավաստիացնել, խնդրել, հորդորել, որ հանրակրթական դպրոցներում տեղի ունեցող գործընթացների մեր ընդհանուր հաջողությունը ավագ դպրոցների կայացման մեջ է, և ձեզանից կախված է լինելու այն հանգամանքը, թե որքանով ենք մենք կարողանում կառուցել հիրավի 21-րդ դարի պահանջներին համապատասխանող գիտելիքների մատուցող, արդիականությունը պահպանող հանրակթական համակարգ»,- ողջունելով վերապատրաստման դասընթացին մասնակցող ուսուցիչներին, ասաց ՀՀ կրթության և գիտության նախարար Արմեն Աշոտյանը:

Ինչպես տեղեկացրեց համալսարանի ռեկտոր Արտյուշ Ղուկասյանը` վերապատրաստման դասընթացներին մասնակցելու են ավագ դպրոցների մոտ 600 ուսուցիչներ: Վերապատրաստմանը զուգահեռ դասընթացներ կլինեն նաև Գյումրիում, Վանաձորում, որտեղ շրջանային դպրոցները կանցնակցնեն իրենց վերապատրաստման դասընթացները:

Ա. Աշոտյանը հիշեցրեց, որ վերջերս ՀՀ Կառավարությունը հաստատել է 38 ավագ դպրոցների ցանկ, որոնք գալիք ուսումնական տարվա մեջ «մեկ քայլ առաջ են կատարում բարեփոխումների շրջանակում»:

«Այն, ինչ կատարվում է նման դասընթացների ընթացքում, իրականում դժվար է գերագնահատել, որովհետև մեր բռնած բարեփոխումների ուղին իրականում բանիմաց, պատրաստված, նոր մարտահրավերներին դիմադրող մանկավարժական կադրերի առկայությունն է», - բացատրեց Ա. Աշոտյանը:

Նախարարը նշեց, որ երկար տարիներ հայկական մանկավարժական կոլեկտիվմները մեծ հաջողությամբ հաղթահարել են իրենց առաջ դրված տվյալ ժամանակների դժվարությունները, և այսօր էլ հանրակրթությունը «պետք է լինի գիտելիք մատուցող իրական սեգմենտ, որտեղ պետք է աշխատեն մարդիկ, ովքեր պարբերաբար վերապատրաստվում են` ոչ միայն գիտելիքների մատուցման տեսակետից, այլև առհասարակ հանրակրթական դպրոցների ծրագրային պահանջների տեսակետից»:

«Իրականում հանրակրթական դպրոցը պետք է դառնա այն վայրը, որտեղից բարձրագույն ուսումնական հաստատություն ընդունվելու համար հավելյալ գիտելիքների կարիք չի լինի: Եվ այստեղ է կայանում ձեր նվիրյալ աշխատանքի և այս ոլորտ պարբերաբար ներմուծվող նոր մեթոդաբանությունների համադրման խնդիրը», - ամփոփելով իր խոսքը` նշեց Ա. Աշոտյանը:

15.06.2009, 13:08

Aysor.am

Իմացողի հետ գնացեք խանութ

«Գնեցի ապրանքը, ուշադիր չնայեցի, հետո տանը նկատեցի, որ վնասված է: Տարա վաճառման կետ, բայց հրաժարվեցին ետ վերցնել կամ նույնիսկ փոխանակել»,- նման բողոքով Aysor-ին դիմել են բազմաթիվ սպառողներ:

Նմանատիպ խնդիրներ սպառղներն ունենում են հատկապես այն խանութներում, որտեղ փակցված է «Գնված ապրանքը ետ չի ընդունվում» հայտարարությունը: Սակայն ՀՀ «Սպառողների իրավունքների պաշտպանության մասին» օրենքի 16-րդ հոդվածի համաձայն` «գնորդը կարող է ապրանքը ետ վերադարձնել, եթե այն անորակ կամ անհարմար է»:

Այս առիթով Aysor-ը այցելեց մի քանի խանութ, որտեղ կարելի է հանդիպել վերոնշյալ հայտարարությունը: Դրանցից մեկում հայտնեցին, թե, այնուամենայնիվ, գնորդներին զգուշացնում են անհրաժեշտության դեպքում գնված ապրանքը 5 օրվա ընթացում ետվերադարձի մասին` նշելով սակայն, որ անհրաժեշտությունը «ոչ թե գնորդի քմահաճույքն է, այլ եթե այն ինչ-որ թերություն ունի»:

Մեկ այլ` հագուստի խանութում էլ հավաստիացրեցին, որ «ամեն ինչ անում են, որպեսզի գնորդը բավարարված լինի, այդ պատճառով էլ ետ են ընդունում ապրանքը»:

Սակայն այստեղ էլ նշեցին, որ հաճախորդներին հորդորում են ապրանքը գնելուց առաջ անպայման փորձել հանդերձարանում և առկա թերությունները գտնել խանութում` մինչ այն տուն տանելը:

«Մենք ասում ենք, որ անպայման հագնեն ու ուշադիր նայեն: Ի՞նչ իմանանք` շորը վնասված է եղել, թե տարել է տուն, նորից հագել է ու նոր է վնասել»,- մանրամասնեց խանութի սպասարկման բաժնի պատասխանատուն:

Խանութներից մեկում նույնիսկ ականատես եղանք, թե ինչպես էին վիճում վաճառողուհին և գնորդը: Վերջինս փորձում էր ապացուցել, որ իր գնած տեխնիկական իրը վնասված է եղել, ինքը պարզապես գնելուց առաջ այն չի ստուգել:

«Խանութում իրենք պայմաններ չունեին, որպեսզի փորձեի, տարա տուն, պարզվեց, որ փչացած է»,- Aysor-ի հետ զրույցում ասաց գնորդը:

Երկար բանակցություններից հետո, իհարկե, հաջողվեց ապրանքը փոխարինել նորով: Սակայն գնորդը վաճառողի կողմից կշտամբանքի արժանացավ` «մյուս անգամ փորձեք, նոր առեք»:

Շատ սպառողներ խոստովանում են, որ իրենք չեն էլ ցանկանում իրենց գնած անորակ ապրանքը ետ վերադարձնել` խուսափելով վաճառողների հետ ունենալիք վեճից: Սա էլ շատ հաճախ նպաստավոր պայման է հանդիսանում որոշ վաճառողների համար` իրացնելու անգամ անորակ ապրանքը:

Սպառողների ազգային ասոցացիայից տեղեկացրեցին, որ իրենք ամեն օր առնչվում են նման բազմաթիվ խնդիրների, և հայտնեց, որ «շատ հաճախ վաճառողները չեն վերադարձնում ապրանքի համար վճարված գումարը կամ այն չեն փոխում նորով, եթե գնորդը չգիտի, որ իր այդ իրավունքը ամրագրված է օրենքով»:

«Երբ մենք ենք գնորդի հետ գնում, ու մանրամսան ներկայացնում ենք օրենքի պահանջն ու սպառողի իրավունքը, երբ տեսնում են, որ իրենց առաջ օրենք իմացող մարդ է կանգնած, մեր այցելությունն անարդյուքն չի լինում»,- ասաց Սպառողների ազգային ասոցացիայի աշխատակից Սուրեն Հարությունյանը:

13.06.2009, 21:45

Aysor.am

«Մետամորֆոզ»-ը հանձնվեց հայ հանդիսատեսի դատին

Երեկ կայացավ «Մետամորֆոզ» ֆիլմի պրեմիերան: Ֆիլմի պրեմիերային ներկա էին հայ կինոարվեստի կարկառուն ներկայացուցիչներ, ինչպիսիք են դերասաններ Ռաֆայել Քոթանջյանը, Ազատ Գասպարյանը, Հարություն Մովսիսյանը, Հրանտ Թոխատյանը, Լուիզա Ներսիսյանը, Հովհաննես Բաբախանյանը և այլոք:

Մինչ ֆիլմը ցուցադրելը ֆիլմի ռեժիսոր Ռուբեն Քոչարը Aysor-ի հետ զրույցում կիսվեց հայ հանդիսատեսի` ֆիլմն ընկալելու ակնկալիքներից: Նա նշեց, որ կարևոր է, որ իր ստեղծագործությունների մասին խոսվում է:

«Ես շատ եմ սիրում, որ վիճաբանություն է լինում, երբ որ խոսակցություն չի լինում ֆիլմի վերաբերյալ, ես շատ տխրում եմ: Այս մեկի մասին շատ ավելին պետք է խոսվի. սա նորամուծություն է` ֆիլմ-կոլաժ, և բավական համարձակ բաներ կան այստեղ, և ես կուզենայի, որ հանդիսատեսը դիտելուց դրական բաներ նկատի և հարցնի, թե ինչու՞է այսպես արել Քոչարը»,- մանրամասնեց ռեժիսորը:

Ֆիլմի գլխավոր դերակատար Հովհաննես Բաբախանյանը հայտնեց, որ, իր կարծիքով, «Մետամորֆոզը» պետք է ընդունվի հայ հանդիսատեսի կողմից, քանի որ ֆիլմը հենց այն մասին է, ինչը բոլորիս հետ է տեղի ունենում:

«Մետամորֆոզ, փոխակերպություն, վիրտուալ աշխարհներ, վիրտուալ աշխարհներին տիրապետելու ունակություն, ունենալ քո իսկ սեփական վիրտուալ աշխարհը կամ օգտվել նրանից… Ահա այն, ինչ առաջարկվում է ու, ամենակարևորը, անհատականության ձևավորում»,- մանրամասնեց Հ. Բաբախանյանը:

Հենց նորը տեսնելու ակնկալիքով էլ հանդիսատեսները մուտք գործեցին կինոդահլիճ: Առաջին դրականը, որ նկատեցինք ֆիլմի սկզբից, այն է, որ դերասանները խոսում են ականջին հաճելի գրական հայերենով: Գրական խոսքն այստեղ չէր հնչում շինծու կերպով, ինչպես արվում է հայկական բազմաթիվ ֆիլմերում:

Ֆիլմի գլխավոր հերոսներից մեկը` Ստեֆանին (նրան մարմնավորում է դերասանուհի Նարինե Լալայանը), երկու տարի առաջ անհետացել է «սատանայական վիրտուալ աշխարհում»: Մյուս հերոսը` Քրիս Դևիդսոնը (Հովհաննես Բաբախանյանի մարմնավորած կերպարը), ով դարձյալ «սատանայական վիրտուալ աշխարհներում» կորցրել է իր կյանքի կեսին` Մարիային (դերակատար` Մարի Մսրյան-Բաբախանյան), նրան գտնելու համար վիրտուալ աշխարհ է ստեղծում Վանի (դերակատար` ամերիկացի դերասան Էդդի Դե Լեոն) համար, որպեսզի համոզի վերջինիս` միասին փնտել և´ Ստեֆանիին և´ Մարիին` իրական աշխարհ տեղափոխելու համար:

Ֆիլմի ընթացքում հասկանում ենք, որ Վանը կարողանում է վիրտուալ աշխարհերից դուրս գալ, եթե այդ աշխարհներում մասնակցություն չի ունենում, և այն բանի շնորհիվ, որ ինքն իր խոստումին հավատարիմ է մնում` ամեն գնով իրական աշխարհ տեղափոխել Ստեֆանիին: Իսկ Վանին ուղղորդում է Քրիսը, ով խրատներով ու դաստիարակչությամբ է հանդես գալիս: Նա օգնում է երիտասարդ Վանին հասկանալ, որ կան դրական և բացասական աշխարհներ, որոնցում կարող ենք հայտնվել մեր երևակայության ու մտքի արագության շնորհիվ:

Մի աշխարհից մյուսը տեղափոխվելուն օգնում է արագությունը, որը հնարավոր է ստանալ` օգտագործելով մոտոցիկլի արագությունը և ազատվելով մտքի կապանքներից: Սա հենց այն մտքի ու մարմնի կապանքներից ազատումն է, որին հասնում է Ռիչարդ Բախի հայտնի հերոսը` Ջոնաթան անունով ճայը: Ֆիլմի գաղափարախոսությունն, ըստ էության, խրատական է. այն օգնում է տարբերակել դրական աշխարհները բացասականից, և ընտրել ու ստեղծել միայն դրականը: Սակայն, այն ամբողջությամբ հասկանալի չի դառնում, քանի որ դրականը ներկայացվում է բացասականի ֆոնին:

Զանազան բացասական երևույթների ցուցադրումը` ինչպիսիք են բռնությունը, ծեծը, պոռնոգրաֆիան, սուտը, ահաբեկչությունը և այլն, ավելի ազդեցիկ տպավորություն են գործում հանդիսատեսի վրա, քան դրականը, որը ֆիլմում նույնքան գերակշռող ու ազդեցիկ չէր: Հենց այս հանգամանք էլ ինչ-որ առումով խոչընդոտ էր, որպեսզի ֆիլմի գլխավոր գաղափարախոսությունը հասկանալի ու ընկալելի դառնա շատերի համար:

13.06.2009, 15:12

Aysor.am

Վ. Հովհաննիսյանը վերլուծում է երկրի արտաքին հարաբերությունները

«Մենք տեսնում էինք, որ առաջընթաց չկա: Խաբելու են` ո´չ ճանապարհն են բացելու, ո´չ էլ դիվանագիտական հարաբերություններ են հաստատելու: Մենք նկատեցինք, թե ինչպես մի մասը քողարկված, մի մասը բացահայտ, բայց երեք հիմնական նախապայմանները գերկշռող կերպով ներկա են և բանակցությունների հիմնական ֆոնը դրանք են»,- մեկնաբանելով Հայաստան-Թուրքիա հարաբերությունները` հայտնեց ԱԺ ՀՅԴ խմբակցության ղեկավար Վահան Հովհաննիսյանը:

Ըստ Վ. Հովհաննիսյանի, խնդիրը Թուրքիայի հետ բանակցությունները հրապարակայնացնելու մեջ է:

«Թուրքիայի հետ խոսել, իհարկե, պետք է, և Թուրքիայի հետ խոսվում էր, բայց դա չէր արվում հրապարակային, որովհետև հրապարակայինից է, որ Թուրքիան օգտվել և օգտվում է, հրապարակային բանակցություներն է, որ Թուրքիան` որպես դրոշ, ծածանում է եվրոպական պետությունների մոտ ու, հատկապես, ԱՄՆ-ին ասում` դուք էլ մի խառնվեք, մենք հայերի հետ լեզու ենք գտնում, դուք այլևս ձեր` Ցեղասպանության ճանաչումով, բլոկադայի վերացումով մեր վրա ճնշում մի գործադրեք, որովհետև մենք հայերի հետ արդեն պայմանավորվում ենք»,- մանրամասնեց Վ. Հովհաննիսյանը:

Խմբակցության ղեկավարի խոսքերով, երբ այդ բանակցությունները դարձան բացահայտ, հրապարակային, Հայաստանը «սկսեց կորցնել, իսկ Թուրքիան ամրապնդեց իր դիրքերը` մեզ հետ հարաբերությունների մեջ»:

«Սա քաղաքական ծանրագույն ստրատեգիական սխալ էր մեր իշխանությունների կողմից: Հիմա Թուրքիան հասել է նրան, ինչին ուզում էր, իսկ Հայաստանը չի հասել և հնարավորություն էլ չունի, որվհետև ապրիլի 23-ին արել է հայտարարություն Թուրքիայի հետ համատեղ` ասելով, որ մենք բավարարված ենք, գործընթացը լավ ընթանում է»,- ամփոփելով խոսքը` հայտնեց Վ. Հովհաննիսյանն ու ընդգծեց. ««Դե բավարարված ես` սուս նստի»,- ասում են Հայաստանին այսօր»:

Ինչ վերաբերում է ԵԽԽՎ ամառային նստաշրջանի ակնկալիքներին` խմբակցության ղեկավարը նշեց, որ «ամեն ինչ կախված է նրանից, թե ինչ բագաժով է այնտեղ գնում մեր պատվիրակությունը, այսինքն` այն, ինչ այնտեղ կներկայացնենք` մեր հաջողությունները, մեր ինքնաքննադատությունները, մեր կատարած աշխատանքներն ու դրանց հեռանկարային դրական արդյունքները… այս ամենից է առաջանալու որոշումը կամ բանաձևը»:

«Նմանօրինակ խորհրդարանական վեհաժողովներում շատ մեծ դեր է խաղում լոբիստական աշխատանքը, որովհետև տարբեր երկրներից ընտրված մարդիկ շատ հաճախ խորը չճանաչելով այս կամ այն երկրի խնդիրը, կարող են բացարձակապես պոպուլիստական որոշումներ կայացնել»,- ասաց Վ. Հովհաննիսյանն ու ավելացրեց, որ ինքը «վիճակն անելանելի չի տեսնում, որովհետև այնպես էլ չէ, որ Հայաստանում որևէ բան չի կատարվել»:

Վ. Հովհաննիսյանի կարծիքով ԵԽԽՎ-ում որոշիչ դեր կարող է խաղալ նաև համաներման կիրառումը, ինչը «դրական ազդեցություն կունենա որոշման վրա»:

12.06.2009, 19:18

Aysor.am

«Համագործակցությունն անհնար է պապայի դեր ստանձնած ՀԱԿ-ի հետ»

«Հայաստանում համագործակցությունը քաղաքական ուժերի մեջ դժվարեցված է, բավականին պրոբլեմատիկ է, որովհետև շատ մեծ դեր են խաղում ամբիցիաները: Ես նման ամբիցիաներ չունեմ և պատրաստ եմ անելու առաջին քայլը»,- հայտարարեց ՀՅԴ խմբակցության ղեկավար Վահան Հովհաննիսյանը լրագրողների հետ ունեցած ճեպազրույցի ժամանակ:

Վ. Հովհաննիսյանը ողջունեց «Ժառանգություն» կուսակցության` միասին աշխատելու կոչը: Նա հայտնեց, որ իրենց կարծիքով, առնվազն խորհրդարանում անհրաժեշտ է միասնական աշխատանքը, հենց թեկուզ խորհրդարան եկող օրինագծերը միասին քննարկելու և համատեղ մոտեցումներ ձեռքբերելու առումով:

«Իշխանությունների հետ ` որպես խորհրդարանական կուսակցություն, բնականաբար համագործակցելու ենք, իշխանության հետ կհամագործակցենք բոլոր այն հարցերում, որոնք համահայկական նշանակություն ունեն, որտեղ իշխանությունների գնահատականը մեր տեսանկյունից ճիշտ է»,- հնարավոր համագործակցությունների մասին խոսելիս` հայտնեց Վ. Հովհաննիսյանը և ընդգծեց, որ «իրենք Հայաստանին երբեք չեն զրկի իրենց ծառայությունից, ով էլ իշխանություն լինի»:

Վ. Հովհաննիսյանն անդրադարձավ նաև մամուլում տեղ գտած այն հրապարակումներին, որ ՀԱԿ-ը «Ժառանգություն» կուսակցությանն անվանել է արբանյակ ուժ, որը փորձում է դոմինանտ ուժին` ՀԱԿ-ին դուրս մղել և զբաղեցնել նրա տեղը»: Խմբակցության ղեկավարը նման հայտարարությունը «ամբիցիոզ» անվանեց, որովհետև «Ժառանգություն» կուսակցությունը խորհրդարանական ընտրությունների ժամանակ «անցել է 5 տոկոսի պատնեշը և հայտնվել է խորհրդարանում, իսկ Կոնգրեսի և ոչ մի քաղաքական ուժ, այդ թվում և Լևոն Տեր-Պետրոսյանի ղեկավարած քաղաքական ուժը, այդ պատնեշը հաղթահարել չի կարողացել»:

Վ. Հովհաննիսյանը ՀԱԿ-ի կողմից «Ժառանգությանը» արբանյակ անվանելն, առնվազն, անխոհեմ համարեց, եթե հետագա համագործակցության ծրագիր ունեն: Սակայն, նրա կարծիքով, հետագա համագործակցության ծրագիր ՀԱԿ-ը չունի, ինչը ևս բացատրության արժանացավ:

«Լևոն Տեր-Պետրոսյանը և նրա իրական արբանյակները չեն կարող որևէ մեկի հետ համագործակցել` չլինելով պապայի դերում, իսկ նրան պապայի դերում ՀՀ ոչ մի նորմալ քաղաքացի չի կորող տեսնել: Այս առումով, մենք, իհարկե, նրանց հետ այս պայմաններով ո´չ խոսելու թեմա ունենք, ո´չ էլ համագործակցելու դաշտ»,- բացատրեց Վ. Հովհաննիսյանը:

Վ. Հովհաննիսյանը նաև հայտնեց, որ «ընդդիմադիր, ինչպես նաև` իշխանական դաշտում, չպետք է լինեն առաջատարներ և արբանյակներ, քանի որ յուրաքանչյուրն ունի իր քաղաքական օրակարգը»: Նա նաև նշեց, որ չի կարծում, թե «Ժառանգության» վրա «հոգեկան մեծ ազդեցություն կունենան նման վիրավորանքները, իսկ մենք դրանք ընդհանրապես չենք նկատում»:

12.06.2009, 18:47

Aysor.am

ԱՄՆ պետդեպարտամենտի զեկույցը «չափազանցված է»

ԱԺ ՀՅԴ խմբակցության ղեկավար Վահան Հովհաննիսյանի կարծիքով` ԱՄՆ պետդեպարտամենտի տարեկան զեկույցում «թացը չորի հետ է խառնված»: Այս մասին պատգամավորը լրագրողներին հայտնեց ճեմազրույցի ժամանակ:

«Կան կետեր, որոնք վեճի առարկա չեն, մեզ էլ բոլորիս հայտնի է, որ 2008 թ-ի նախագահական ընտրությունները ոչ ամենալավ կերպով անցան: Փոխադարձ անհանդուրժողականությունը բերեց բախումների, բախումներում եղան զոհեր և առաջացավ քաղաքական ճգնաժամ», - մանրամասնեց Վ. Հովհաննիսյանը:

Ըստ խմբակցության ղեկավարի` վիճելի է այն դրույթը, թե քաղաքական ճգնաժամը մինչ օրս հաղթահարված չէ: Սա Վ. Հովհաննիսյանը «չափազանցություն» համարեց:

Նա նաև նշեց, որ մյուս կողմից այս ընտրությունների «տհաճ և անընդունելի հետևանքները մինչ հիմա իրենց զգացնել են տալիս և դեռ երկար են իրենց զգացնել տալու»:

Վ. Հովհաննիսյանն անհասկանալի համարեց այն, որ «այս ամենի պատճառով տուժում են Հայաստանի փոքր համայնքները, որոնց ճանապարհաշինարարական ծրագիրը ձախողվեց այս զեկույցի հիման վրա»:

Անդրադառնալով համաներման կիրառման հարցին` Վ. Հովհաննիսյանն ընդգծեց, որ այն «վերին աստիճանի դրական ազդեցություն կունենա»:

12.06.2009, 15:55

Aysor.am

«Հանրապետականը ցանկացած օրինագիծ կարող է անցկացնել»

«Այս գարնանային նստաշրջանում, աշխատանքային առումով, շատ խոշոր հաղթանակ եմ համարում հարկային փաթեթի քննարկումը և դրական եմ մոտենում կառավարության մեր գործընկերներին և առավել ևս ԱԺ պատգամավորներին», - հայտարարեց ԱԺ Հանրապետական խմբակցության ղեկավար Գալուստ Սահակյանը լրագրողների հետ ունեցած ճեպազրույցի ընթացքում:

Գ. Սահակյանը հստակեցրեց, որ ինքը չի ասել, թե որ կողմ կքվեարկի հարկային փաթեթին:

«Ես ընդամենը Հարկային փաթեթի առումով ասել եմ, որ մեծ տեղ եմ հատկացնում քննարկումներին, բայց և այնպես այն արդեն քաղաքական վերլուծությունների է ենթարկվում և քաղաքական կոնսուլտացիաներից հետո մենք կփորձենք լուծումներ տալ», - մանրամասնեց Գ. Սահակյանը:

Այնուամենայնիվ Գ. Սահակյանն ընդգծեց, որ Հանրապետական խմբակցությունը` «մանավանդ կոալիցոիոն ուժերի հետ միասին, ցանկացած օրինագիծ կարող է անցկացնել»:

«Այնպես որ` խնդիրը ոչ թե դրան է վերաբերում, այլ լուրջ քննարկումներին, առավել ևս, որ փաթեթի առումով բավականին կանխակալ էր մամուլում հրապարակել, որ Կառավարությունը հրաժարական կտար կամ քաղաքական ուժերն առճակատման են գնում», - բացատրեց Գ. Սահակյանն ու հիշեցրեց, որ «քաղաքական մեծամասնությունը և Կառավարությունը մի թիմ են և յուրաքանչյուրն իր գործն է անում` Կառավարությունն իր կառավարման մեխանիզմներն է առաջարկում, խորհրդարանն իր քաղաքական գնահատականներն է տալիս»:

Խմբակցության ղեկավարը նշեց, որ մի խնդրում բոլոր քաղաքական ուժերը կողմ են Կառավարության դիրքորոշմանը, այն է` ստվերից պետք է դուրս գա մեր տնտեսությունը: Սակայն, ըստ Գ. Սահակյանի, «ձևն ու գործիքները պետք է կարողանանք այնպիսի որոշակիորեն ընդունելի դարձնել, որ օրենքը գործի»:

12.06.2009, 15:21

Aysor.am

Գերմանական երաժշտությունը թևածում էր ԱԺ շենքում

Այսօր ԱԺ-ում «Գերմանիայի շաբաթներ» ծրագրի շրջանակներում տեղի ունեցավ դասական երաժշտության համերգ և լուսանկարչական ցուցահնդես: Միջոցառմանը ներկա էին ԱԺ մի շարք պատգամավորներ, Հայաստանում Գերմանիայի դեսպանատան աշխատակիցներ:

Տեղեկացնենք, որ միջոցառման նախաձեռնությունն ու կազմակերպումը պատկանում է Հայաստանում Գերմանիայի Դաշնային Հանրապետության դեսպանությանը և Հայաստանի Հանրապետության մշակույթի նախարարությանը:

Ներկաներին դասական երաժշտության հիանալի մեղեդիներ նվիրեց գերմանացի տենոր Քրիստոֆ Շեբենը և դաշնակահար Ստյուարտ Էմերսոնը:

Տեղեկացնենք նաև, որ լուսանկարչական ցուցահնդեսը նվիրված էր Հայաստանին: Այն ներկայացնում էր Հայաստանում Գերմանիայի նախկին դեսպան Հանս-Վուլֆ Բարթելսի լուսանկարները, որոնք պատկերում են Հայաստանի բնությունը, տեսարժան վայրերն ու մարդկանց:

12.06.2009, 14:50

Aysor.am

Գ. Սահակյան. «Համաներման մասը շուտով կքննարկվի ԱԺ-ում»

«Շատ գնահատելի է, որ հասարակության մեջ քննարկվում է համաներման հարցը, բայց դա, ըստ էության, իրավաբանական փաստաթուղթ է, որի քաղաքական գնահատականը տալու է Ազգային ժողովը», - լրագրողների հետ ունեցած ճեպազրույցի ժամանակ հայտարարեց ԱԺ-ում Հանրապետական խմբակցության ղեկավար Գալուստ Սահակյանը:

Գ. Սահակյանի կարծիքով`համաներման մասին հարցն «առաջիկա քննարկումներից հետո նաև ԱԺ-ն հնարավորություն կունենա այս ամսվա վերջին կամ մյուս ամսվա սկզբներին քննարկել»:

Թե ինչպիսի՞ սպասելիքներ ունի Հանրապետական կուսակցությունը ԵԽԽՎ ամառային նստաշրջանից, Գ Սահակյանը դժվարացավ պատասխանել` նշելով, որ ինքը տեղեկացված չէ: Ինչ վերաբերում է ԱՄՆ-ի պետդեպարտամենտի տարեկան զեկույցին, որում ասվում է, թե Հայաստանի 2008 թ-ի նախագահական ընտրությունները հանգեցրել են քաղաքական ճգնաժամի, խմբակցության ղեկավարաը նշեց, որ «ամերիկայի կոմղը միշտ է ոչ թե անդրադառնում է ընտրություններին, այլ դրանք օրեր շարունակ վերլուծում է և համընկեցնում է Հայաստան-Ամերիկա միջպետական փոխհարաբերությունների հետ»:

«Ի տարբերություն եվրոկառույցների կամ դիտորդական առաքելություն ունեցող խմբերի, որոնք անմիջապես գնահատեցին համայնքային ընտրությունները` որպես համայնքային ընտրություններ, ամերիկյան կողմը ոչ թե կոնկրետ ընտրություններն է գնահատում, այլ փորձում է քաղաքական գնահատականներ տալ միջպետական հարաբերությունների կարգավիճակով», - մանրամասնեց Գ. Սահակյանը:

Գ. Սահակյանն, անդրադառնալով Երևանի ավագանու ընտրություններին, հայտնեց այն կարծիքը, որ ընտրություններն «ավելի ամբողջացրեցին և ավելի ուժեղացրեցին կոալիցիոն գործընթացները»:

«Մենք միշտ շփոթում ենք և համայնքային ընտրությունները բերում, կապում ենք երկրի քաղաքական ճակատագրի հետ: Սա համայնքային ընտրություններ էին և այստեղ այն, թե կոալիցիոն ուժերից ով ինչ ձայն ստացավ, ինչպիսի՞ հնարավորություններով ունեցավ, մեր երկրի քաղաքական դիրքորոշումների վրա ազդեցություն ունենալ չեն կարող»,- հայտնեց Գ. Սահակյանն ու ընդգծեց. «Այնպես որ` կոալիցիան, կարծում եմ, ավելի միասնական կգործի»:

12.06.2009, 14:17

Aysor.am

«Որակը չի ապահովվում, քանի որ սպառողը դրան հետամուտ չէ»

«Այս օրինագիծը աշակերտակենտրոն է և ժողովրդավար: Սա մի օրենսդրություն է, որի դրական և բացասական կողմերը յուրաքանչյուրս մեր ընտանիքներում զգալու ենք»,- հայտնեց ՀՀ կրթության և գիտության նախարար Արմեն Աշոտյանը` ԱԺ այսօրվա նիստում ներկայացնելով «Հանրակրթության մասին» և մի շարք այլ օրենքներում փոփոխություններ և լրացումներ կատարելու մասին օրինագիծը:

Ա. Աշոտյանը հայտնեց, որ օրինագիծ ստեղծելու նախաձեռնությունը եղել է մի քանի շարժառիթներով, նախևառաջ այն հանգամանքով պայմանավորված, որ «մենք պետք է ունենանք որակյալ հանրակրթական մեխանիզմներ, որպեսզի ապահովենք նաև գիտելիքային այն տնտեսությունը, որին ձգտում ենք բոլորս»:

«Հանրակրթության որակ ասելով, մենք մի քանի բաղադրիչներ ենք հասկացել, որոնցից մեկն է կառավարության արդյունավետությունը, որտեղ լավ իմաստով հեղափոխություն է արված, մասնավորապես, դպրոցական խորհուրդների գործունեության հետ կապված, այդ խորհուրդներում ներգրավված մարդկանց պատասխանատվության հետ կապված: Մասնավորապես, կառավարման համակարգում պարտադիր է աշակերտական խորհուրդ կոչվածը, որն իրականում դպրոցը վերադրձնում է աշակերտին»,- մանրամասնեց նախարարը:

Նախարարի խոսքերով, օրինագծում կա մի նորամուծություն, ըստ որի, ավագ դպրոցների պատասխանատուն ՀՀ կրթության և գիտության նախարարությունն է, քանի որ ավագ դպրոցը «մեր կրթական բարեփոխումների հիմնասյուներից է և բավականին ծախսատար կառույց»:

«Պետությունը ավագ դպրոցների կայացման պատասխանատվությունը պետք է պահանջի մեկ գերատեսչությունից: Այդ պարտավորությունը մենք վերցրել ենք մեր վրա, ինչը ոչ թե վարչական լծակներ ունենալու ցանկություն է, այլ որակի պատասխանատվության ցանկություն»,- հայտնեց Ա. Աշոտյանը:

Ա. Աշոտյանն անդրադարձավ նաև կրթության ոլորտի որակի ապահովման խնդրին: Նա նշեց, որ կրթական համակարգում կա «մի արատավոր ինստիտուտ, մի մշակույթ, որը հակաշուկայական է»:

«Սա ինձ հայտնի միակ ոլորտն է, որտեղ միակ սպառողն ինքը որակի հիմնական վերահսկիչը չէ և շահագրգռված չէ որակի մեջ: Քանի դեռ հիմնական սպառողը` աշակերտը, ծնողը հետամուտ չէ որակի ապահովման հարցում, որևէ գերնախարարություն կամ գերազգային ժողով չի կարող այդ որակի ապահովման երաշխավորը լինել»,- բացատրեց Ա. Աշոտյանը:

Նախարարի կարծիքով, այնքան ժամանակ, մինչև դիմորդները, աշակերտները, ուսանողները «շահագրգռված են ֆորմալիզմի, ոչ թե բովանդակության մեջ, մենք որակի վերահսկողության ամենաարդյունավետ ու պարզունակ գործիքը չենք կարող ունենալ»:

11.06.2009, 20:12

Aysor.am

Նախարարը ներկայացրեց պատվովճարների մասին օրինագիծը

ՀՀ կրթության և գիտության նախարար Արմեն Աշոտյանն այսօր ԱԺ նիստում պատգամավորներին ներկայացրեց ««Գիտական և գիտատեխնիկական գործունեության մասին» ՀՀ օրենքում փոփոխություններ և լրացումներ կատարելու մասին» ՀՀ օրենքի նախագիծը, որը վերաբերում է գիտական գործունեություն ծավալողների պատվոգրերի վճարման մեխանիզմների հստակեցմանը:

Ա. Աշոտյանը մանրամասն բացատրեց, որ Հայաստանի Գիտությունների ազգային ակադեմիան իրավունք ունի բաշխել համապատասխան պատվովճարներ, որոնք սահմանվում են Կառավարության կողմից Ակադեմիայի թղթակից և իսկական անդամների համար: Առաջարկի տրամաբանությունն է` հստակեցնել մոտեցումները և պատվովճարի հատկացումը կապել ՀՀ-ում գիտական գործունեություն իրականացնելու հետ կամ ՀՀ-ից որոշակի ժամկետով բացակայելու հետ:

«Այդ մեխանիզմի անկատարության պատճառով մենք ունենք բազում դեպքեր, երբ մեր վաստակաշատ գիտնականները չեն աշխատում մեր հանրապետությունում կամ երկարաժամկետ գործուղումների մեջ են, և տարիներով կուտակված իրենց պատվովճարի խնդիրը բարձրացնում են մեր պետության առջև` նաև դատական կարգով, և պետությունը ստիպված վճարում է բավականին մեծ գումարներ այն մարդկանց, որոնք չեն աշխատում ի նպաստ ՀՀ գիտությանն ու տնտեսությանը», - բացատրեց Ա. Աշոտյանը:

Նախարարը նշեց, որ օրինագիծը քննարկվել է ԱԺ գիտության, կրթության, մշակույթի, երիտասարդության և սպորտի հարցերով մշտական հանձնաժողովում և ստացված առաջարկները հաշվի կառնվեն մինչ օրինագիծը կներկայացվի երկրորդ ընթերցման: Նա հայտնեց նաև, որ առաջարկներից մեկն այն է, որ օրենքով սահմանվի, որ Հայաստան վերադարձից հետո մենք վերադարձնում ենք այդ գիտնականների պատվովճարից օգտվելու հնարավորությունը, և բացակայության ժամանակը հստակեցնել` դարձնելով 3 ամիս:

11.06.2009, 15:48

Aysor.am

Ե՞րբ է Արցախի իրական քարտեզը դրվելու շրջանառության մեջ

«Ժառանգություն» խմբակցության պատգամավոր Լարիսա Ալավերդյանը այսօրվա նիստում Կառավարությանը հարց ուղղելու համար նիստերի դահլիճ էր բերել Լեռնային Ղարաբաղի Հանրապետության քարտեզներ: Պատգամավորը, ցուցադրելով առաջին քարտեզը, որը 2007 թ-ին տպագրվել է Հայաստանի կադաստորային պետական կոմիտեի կողմից, հայտնեց, որ այն ցուցադրվում է միայն «ԱԼՄ» հեռուստաընկերությամբ:

Լ. Ալավերդյանը հշեցրեց, որ մնացած բոլոր հեռուստաընկերություններով, բացառությամբ «Երկիր Մեդիայի», որն ընդհանրապես քարտեզ ցույց չի տալիս, ցուցադրվում են «իրականությանը չհամապատասխանող քարտեզներ»: Այդ թվում, նա նշեց, որ նույնիսկ ՀՀ նախագահի պաշտոնական կայքում է տեղադրված 1989 թ-ի դեկտեմբերի 1-ի դրությամբ ճիշտ քարտեզ:

«Պետական բոլոր մարմինները պարտավոր են հետևել այն քարտեզին, որը տպվել է ՀՀ կադաստրի կողմից: Ե՞րբ է ՀՀ-ում դուրս մղվելու իրականության հետ որևէ առնչություն չունեցող քարտեզները»,- հարցրեց Լ. Ալավերդյանը:

Փոխվարչապետ Արմեն Գևորգյանը` ի պատասխան խոստացավ, որ առաջիկայում Լ. Ալավերդյանի հետ միասին հարցը կքննարկի Կադաստրային պետական կոմիտեի հետ, և «կփորձեն հասկանալ այն բոլոր իրավական հիմքերը, որոնցով հնարավոր է հարցը կարգավորել, և որոնցով մեր պետական մարմինները չեն առաջնորդվում, եթե այդպիսիք կան»:

Լ. Ալավերդյանը, չբավարարվելով ստացած պատասխանից, նշեց, որ «ավելի քան 10 տարի մենք ոտնահարում ենք ոչ միայն ԼՂՀ օրեսդրությունը, Սահմանադրությունը, այլև սեփական երկրում ընդունված գործընթացը»: Եվ հստակեցրեց իր հարցը, թե «ե՞րբ է այս քարտեզը` որպես կառավարության կողմից պատրաստված փաստաթուղթ, մտնելու շրջանառության մեջ Հայաստանում»:

Ա. Գևորգյանը նշեց, որ այն արդեն իսկ շրջանառության մեջ է, քանի որ տպագրվել է Կառավարության կողմից, և կրկնեց, որ «իր առաջարկությունն ուժի մեջ է»:

Այս առնչությամբ ԱԺ նախագահ Հովիկ Աբրահամյանը արձագանքեց` ասելով, որ «մենք ոչ ոքին թույլ չենք տա Արցախի լիազորությունները ոտնահարել»:

10.06.2009, 20:34

Aysor.am

Զ. Փոստանջյանը հարցադրումներ արեց «գաղտնի» ոլորտից

«Մարտի 1-ին ովքե՞ր են օգտագործել այդ մարտական զենքը և հատուկ միջոցը: Այդ անձանց նկատմամբ մեղադրանք առաջադրվե՞լ է, թե՞ ոչ: Ինչու՞ են կիրառել այդ մարտական զենքը: Այդ մարտական զենքից մեր կառավարությունն ու՞նի, թե՞ ոչ, և ե՞րբ է պատրաստվում այն կիրառել»,- այս հարցադրումներով ԱԺ այսօրվա նիստում Կառավարությանը դիմեց «Ժառանգություն» խմբակցության պատգամավոր Զարուհի Փոստանջյանը:

Հարցի սկզբում Զ. Փոստանջյանը հիշեցրեց, որ «Մարտի 1-ի ողբերգական դեպքերից հետո զոհվեց 10 մարդ, որոնցից 3-ը զոհվել է ոստիկանության կողմից կիրառված մարտական զենք` հատուկ կարաբինի և հատուկ միջոցներ` «Չերյոմուխա 7-ի» օգտագործմամբ:

Հարցին պատասխանող ՀՀ արդարադատության նախարար Գևորգ Դանիելյանը հայտնեց, որ «չի պատրաստվում հանգամանորեն անդրադառնալ հարցադրումների բոլոր բաղադրիչներին, քանի որ պատգամավորի բարձրացրած բոլոր հարցերն այժմ գտնվում են նախաքննություն իրականացնող մարմինների տեսադաշտում»:

«Նախաքննության նյութերի գաղտնության մասը ես չեմ ուզում ձեզ իրազեկել, և դրանք այն չափով, որ չափով այդ մարմինները հնարավոր կգտնեն, կհրապարակեն: Մնացած հարցերը գտնվում են ԱԺ-ի կողմից ստեղծված հանձնաժողովում և քննական առարկա են»,- բացատրեց Գ. Դանիելյանը:

Գ. Դանիելյանը ընդգծեց, որ «Կառավարությունն այսօր իրավասու չէ որևէ նյութ տրամադրել, թեկուզ այդ հարցերի մեծ մասն արդեն հրապարակվել է»:

Զ. Փոստանջյանը միայն ցանկացավ ճշտել` կա՞ն ոստիկաններ, որոնք մեղադրվում են նման զենք կիրառելու մեջ, որի իրավասությունն իրենք չեն ունեցել: Ի պատասխան` Գ. Դանիելյանը հայտնեց, որ գործը գտնվում է քննչական հատուկ ծառայության վարույթում: Նա խոստացավ հարցում կատարել քննչական հատուկ ծառայությանը, և եթե այդ հարցին իրենք իրավասու լինեն պատասխանել, ինքն էլ պատգամավորներին կպատասխանի:

10.06.2009, 19:16

Aysor.am

Մեկնարկում է «Ժանգոտ դդում» կինոփառատոնը

Այսօր տեղի է ունենալու «Ժանգոտ դդում» այլընտրանքային կինոփառատոնի բացումը: Այն կմեկնարկի երաժշտական ներկայացումով և կտևվի մինչև հունիսի 13-ը:

Հիշեցնենք, որ կինոփառատոնի նախաձեռնությունը Երևանի «Մխիթար Սեբաստացի» կրթահամալիրի կինո-ֆոտո դպրոցինն է: Դեռևս մարտից կինոփառատոնի կազմակերպիչները հայտարարություն էին տարածել` փառատոնին մասնակցելու վերաբերյալ: Ինչպես Aysor-ին տեղեկացրել էր կինոդպրոցի տնօրեն Սոնա Աբգարյանը, հայտեր ներկայացնողները, ֆիլմերը պետք է ներկայացնեն AVI, DVD ձևաչափերով, որոնք կարող են նկարահանված լինել բջջային հեռախոսի տեսձայնագրիչով կամ ֆոտոխցիկով` ցանկացած ժանրում, թեմայով և տևողությամբ:

Տեղեկացնենք նաև, որ փառատոնի մասնակիցների աշխատանքները գնահատելու է ժյուրին: Ժյուրիի կազմում ներկայացված են արվեստագետներ Կարինե Մացակյանը, Գրիգոր Խաչատրյանը, Սոնա Աբգարյանը, Վահրամ Աղասյանը, Արման Գրիգորյանը, Գագիկ Չարչյանը, Սուսաննա Ամուջանյանը, Նազարեթ Կարոյանը, Եվա Խաչատրյանը, ռեժիսորներ Գագիկ Ղազարեն և Միկա Վաթինյանը։

Փառատոնին մասնակցության հայտ են ներկայացրել շուրջ 35 հոգի: Նրանց աշխատանքները ցուցադրվելու են այսօր և վաղը:

Նշենք նաև, որ փառատոնի շրջանակներում նախատեսված է անցկացնել վարպետության դաս ուսանողների համար` ռեժիսոր Գագիկ Ղազարեի գլխավորությամբ: Մրցանակաբաշխության արարողությունից հետո կազմակերպվելու է պարային երեկույթ` դիսկոտեկ:

10.06.2009, 17:32

Aysor.am

«Փաստահավաք խմբի լուծարումը հանձնաժողովի ցանկությունը չէր»

«Ես չեմ կարող արդարացված կամ ոչ արդարացված համարել նախագահի կարգադրությունները, քանի որ դրա իրավասությունները չունեմ», - հայտարարեց ԱԺ նախագահի տեղակալ, Մարտի 1-2-ի իրադարձություններն ուսումնասիրող ժամանակավոր հանձնաժողովի նախագահ Սամվել Նիկոյանը` լրագրողների հետ զրույցի ժամանակ անդրադառնալով Փաստահավաք խմբի լուծարման մասին ՀՀ նախագահի հրամանագրին:

Ս. Նիկոյանը նշեց, որ ինքը կարող է միայն արտահայտել իր ցանկությունները: Նա հայտնեց, որ ի սկզբանե «շատ ճիշտ է համարել Փաստահավաք խմբի ստեղծումը, հատկապես հաշվի առնելով այն, որ այնտեղ կար և ընդդիմության ներկայացուցիչը, և իշխանության ներկայացուցիչը, և մարդու իրավունքների պաշտպանի ներկայացուցիչը, և, որ ամենակարևորն է, այդ մարդիկ համապատասխան մասնագետներ էին և հիմնականում զբաղվում էին դրանով»:

«Ես կուզենայի, որ նրանք կարողանային պահպանել աշխատանքի և համակեցության կանոնները և մինչև վերջ աշխատեին, որովհետև իրենց տված նյութերը հանձնաժողովի համար շատ օգտակար կլինեին»,- իր կարծիքը հայտնեց Ս. Նիկոյանը:

Անդրադառնալով Փաստահավաք խմբի ներքին մթնոլորտին` Ս. Նիկոյանը հայտնեց այն տեսակետը, որ «նման իրավիճակում, փաստահավաք խումբը դժվար թե համընդհանուր և հավասարակշռված տեսակետ կարող էր ունենալ` մարտի 1-ի իրադարձությունների վերաբերյալ»:

«Ինքը` Փաստահավաք խումբը, մարտի մեկյան դեպքերն է ուսումնասիրում, բայց հենց Փաստահավաք խմբում հակասությունների, անհանդուրժողականության և սպառնալիքի մթնոլորտ է ստեղծվում, և հասկանալի է, որ այդ մթնոլորտով անհնար է վերլուծել այն մթնոլորտը», - բացատրեց հանձնաժողովի նախագահը:

Ս. Նիկոյանի կարծիքով` Փաստահավաք խմբի յուրաքանչյուր անդամ «պետք է զգար իր պատասխանատվության չափը և թույլ չտար իրեն առաջադրած քաղաքական ուժերին իր աշխատանքը քաղաքական նպատակով իրականացնելու համար»:

Ափոփելով իր խոսքը Սամվել Նիկոյանն ընդգծեց. «Սա, որ այսպես ստացվեց, հանձնաժողովի ցանկությունը չէ»:

10.06.2009, 15:40

Aysor.am