«Վրացիները սկսել են աշխատել ոչ թե Թբիլիսիում, Ախլցխայում կամ ուրիշ բնակավայրերում, այլ սկսել են սողոսկել մեր ձորերը, լեռները, անտառների մեջ, և այսօր մենք կորցնում ենք մեր լեռներում ու ձորերում գտնվող հուշարձանները, լեռների միջից էլ են ջնջում մեր հետքը»,- հայտնեց հուշարձանագետ Սամվել Կարապետյանը` լրագրողների հետ հանդիպման ժամանակ:
Ս. Կարապետյանը հայտնեց, որ տարիներ շարունակ ինքը բարձրաձայնում է Վրաստանի տարածքում գտնվող հայկական հուշարձանների ոչնչացման մասին, սակայն մինչ օրս ոչ մի արձագանք չի ստացել, ոչինչ չի փոխվել:
Հուշարձանագետը տեղեկացրեց, որ դեռևս 1998 թ-ին հրատարակել է «Հայ մշակույթի հուշարձանները և վրաց պետական քաղաքականությունը» խորագրով աշխատությունը, որտեղ 100-ից ավելի ականատեսների վկայություններ են և բազմաթիվ լուսանկարներ, թե տվյալ մշակութային արժեքն ինչպիսին էր նախքան «վերանորոգման» աշխատանքները, և դրանից հետո: Ըստ նրա` այդպիսով ինքը հույս է ունեցել, որ կարող է կանխել հայկական մյուս հուշարձանաների` նմանօրինակ ճակատագրի արժանանալու հանգամանքը:
«Ես կարծում էի, որ այն չարագործ ձեռքը, որը կարծել է, թե ինչ-որ յուրացրել, ջնջել է, իրեն հաջողվել է աննկատ անել, կհասկանա, որ այդ ամենը լուսանկարվել և արձանագրվել է և իր հանցանքն այլևս հայտնի է աշխարհին: Բացի այդ` ինձ թվում էր, որ եթե մեր պետական մարմինները տեղյակ չէին, կտեղեկանային, և նրանք, ովքեր ի պաշտոնե կոչված են ամեն մի չարագործություն պատասխանատվության ենթարկել, ձեռքի տակ կունենային բավարար փաստեր` գործին լծվելու համար»,- մանրամասնեց Ս. Կարապետյանն ու ընդգծեց, որ իր «միամիտ հույսերը լիուլի չեն արդարացել»:
Ս. Կարապետյանը հայտնեց նաև, որ նախատեսում է անգլերեն տարբերակով վերահրատարակել վերը նշված աշխատությունը` լրացումներով և իր ներկա ծավալից 3-4 անգամ ավելի մեծ` «աշխարհին ցույց տալու և վրացու դիմակը պատրելու նպատակով ու այն հույսով, որ, գուցե, աշխարհը հուզվի»:
«Մենք մեր հուշարձանները կարող ենք պաշտպանել միայն մի դեպքում, եթե հանցագործության համար հանցագործին պատասխանատվության ենթարկենք, այսինքն` դատական հայցեր հարուցենք»,- ամփոփելով իր խոսքը` հայտնեց Ս. Կարապետյանն ու ընդգծեց. «Քանի դեռ մեր պետությունը` Կառավարության մակարդակով, միջազգային ատյաններում դատ չի հարուցել, հանցագործն իր ձեռքերը ետ չի քաշի մեր հուշարձաններից»:
27.04.2010, 20:17
No comments:
Post a Comment