Այսօր Ռազմավարական և ազգային հետազոտությունների հայկական կենտրոնում (ՌԱՀՀԿ) տեղի ունեցավ քննարկում` «Ղրղզստանում տեղի ունեցած խռովություններ. դա՞ս Հայաստանի համար» խորագրով: Քննարկմանը զեկույցներով հանդես եկան ԵԱՀԿ գրասենյակի ռազմաքաղաքական հարցերով բաժանմունքի ներկայացուցիչ Գրիգոր Միխալսկին, ՌԱՀՀԿ ավագ փորձագետ Մանվել Սարգսյանը: Քննարկումն ամփոփելու է ՌԱՀՀԿ տնօրեն Ռիչարդ Կիրակոսյանը, այնուհետև տեղի է ունենալու հարց ու պատասխան ձևաչափով քննարկում:
Բացման խոսքում ՌԱՀՀԿ վարչական տնօրեն Կարապետ Կալենչյանը նշեց, որ Ղրղզստանը, չնայած հետխորհրդային երկրներից ամենաաղքատներից մեկն է, սակայն զբաղեցնում է աշխարհաքաղաքական կարևոր դիրք: Այս առումով էլ երկրում տեղի ունեցած իշխանափոխությունը հետաքրքրական է տարածաշրջանի մյուս երկրների համար:
«Շատ կարևոր է այն հանգամանքը, որ Ռուսաստանն առաջին անգամ ոչ թե կողմնակից եղավ իշխանություններին, այլ ընդդիմությանը»,- ընդգծեց Կ. Կալենչյանը` հիշեցնելով, որ հյուսիսում Ղրղզստանը ընդհանուր սահման ունի Ղազախստանի հետ, որտեղից գազամուղները և նավթամուղները, այդ թվում նաև Ռուսաստանի գազամուղներն ու նավթամուղները, անցնում են դեպի Չինաստան, իսկ Հարավում` ընդհանուր սահման ունի Չինաստանի Սինդյան տարածքի հետ:
Եվս մեկ անգամ նշելով, որ Ղրղզստանն աղքատ երկիր է, որի աշխատուժը հիմնականում աշխատանք է գտնում Ռուսաստանում, շեշտելով, որ երկրի նախագահ Կուրմանբեկ Բակիևը երկիրը ղեկավարում էր իր ընտանիքի անդամներով, ինչպես նաև, որ Ղրղզստանը ՀԱՊԿ անդամ է և ունի ռուսական ու ամերիկյան բազաներ, բանախոսը ուրվագծեց, թե ինչու՞ է հատկապես կարևոր այստեղ տեղի ունեցած իշխանափոխությունը, և զեկուցողներին առաջարկեց պարզաբանել, թե ի՞նչն էր այնուամենայնիվ պատճառը խռովությունների, ինչպե՞ս եղավ իշխանափոխությունը և այն «ի՞նչ դաս կարող է տալ» Հայաստանին:
29.04.2010, 13:00
No comments:
Post a Comment