«Այս ծառերը, որ բերվել են Արևմտյան Հայաստանից, դժվար ճանապարհ են անցել, մինչև հասել են այստեղ: Այս ծառերը կանաչ կամուրջն են մեր անցյալի, բայց նաև` ապրող ապագան են»,- հայտարարեց Վայրի բնության և մշակութային արժեքների պահպանության հիմնադրամի տնօրեն Ռուբեն Խաչատրյանը` այսօր ՀՀ Գիտությունների ազգային ակադեմիայի Ցեղասպանության թանգարան-ինստիտուտին հարող այգում խորհրդանշական ծառատունկի ժամանակ:
Խրհրդանշական ծառատունկը, որը կատարվեց Արևմտյան Հայաստանից բերված 95 ծառերով, նվիրված էր ինչպես Երկրի օրվա 40-րդ ամյակին, այնպես էլ Հայոց ցեղասպանության 95-րդ տարելիցին: Միջոցառումն անցկացվում էր «ՎիվաՍել-ՄՏՍ» ընկերության հովանավորությամբ:
«Ծիծեռնակաբերդի ամբողջ տարածքը բոլոր հայերիս համար սրբավայր է, և այն վայրն է, որտեղ բոլորիս ներուժը միավորելով պետք է կառուցենք մեր հզոր երկրի ապագան»,- ընդգծեց Ռ. Խաչատրյանը` ազդարարելով ծառատունկի մեկնարկը:
Տեղեկացնենք, որ ծառատունկին մասնակցում էին ինչպես «ՎիվաՍել-ՄՏՍ» ընկերության տնօրեն Ռալֆ Յիրիկյանը, Ցեղասպանության թանգարան-ինստիտուտի տնօրեն Հայկ Դեմոյանը, այնպես էլ քաղաքական ու հասարակական գործիչներ, արվեստի ոլորտի ներկայացուցիչներ, այդ թվում` ԱԻՄ կուսակցության ղեկավար Պարույր Հայրիկյանը, պարարվեստի մեծ վարպետ Վանուշ Խանամիրյանը, նկարչուհի, ազգագրագետ Լուսիկ Ագուլեցին, Հայաստանի ազգային պատկերասրահի տնօրեն Փարավոն Միրզոյանը, Երևանի Մնջախաղի պետական թատրոնի գեղարվեստական ղեկավար Ժիրայր Դադասյանը, Հ. Թումանյանի անվան թանգարանի տնօրեն Նարինե Թուխիկյանը և այլոք:
Ծառատունկի մեկնարկը տրվեց աղոթքներով ու օրhնության ծեսով, որը կատարվեց Արարատյան հայրապետական թեմի կողմից` գլխավորությամբ Նավասարդ արքեպիսկոպոս Կճոյանի: Մiջոցառման ողջ ընթացքում շարականներով ու հայ հոգևոր երգերով հանդես եկավ Արարտյան հայրապետական թեմի «Ծաղկազարդ» երգչախումբը:
Նշենք նաև, որ խորհրդանշական ծառատունկը Ծիծեռնակաբերդի հուշահամալիրի տարածքում հիմնադրեց «Հիշողության պուրակ»-ը, որի վերաբերյալ այգում տեղադրվելու է նաև համապատասխան մակագրությամբ ցուցանակ:
ԱՅՍՕՐ, 13:53
No comments:
Post a Comment