Ղրղզստանում տեղի ունեցած դեպքերը, դրանց վերաբերյալ արձագանքը հետխորհրդային տարածաշրջանների երկրներում, ինչպես նաև դեպքերի վերաբերյալ գնահատականներն ու վերլուծությունները, ըստ ՌԱՀՀԿ ավագ փորձագետ Մանվել Սարգսյանի, մեծ հետաքրքրություն են վայելում:
Հիշեցնենք, որ այսօր Ռազմավարական և ազգային հետազոտությունների հայկական կենտրոնում տեղի ունեցավ քննարկում` «Ղրղզստանում տեղի ունեցած խռովություններ. դա՞ս Հայաստանի համար» խորագրով: Քննարկմանը զեկույցով հանդես եկավ նաև ԵԱՀԿ գրասենյակի ռազմաքաղաքական հարցերով բաժանմունքի ներկայացուցիչ Գրիգոր Միխալսկին:
Մանվել Սարգսյանն իր խոսքում հիշեցրեց, որ Ռուսաստանի Դաշնության նախագահը մի քանի անգամ է անդրադարձել Ղրղզստանում տեղի ունեցած դեպքերին ու հայտնել է իր մտահոգությունը, բացի այդ, գնահատականներով հանդես են եկել նաև Բելառուսի ու Ռուսաստանի նախագահները, իսկ Հայաստանում խնդրին անդրադարձել են ՀՀ Ոստիկանությունից ու Մարդու իրավունքների պաշտպանության գրասենյակից: Այս ամենը հաշվի առնելով, ըստ բանախոսի, կարելի է ասել, որ «Ղրղզստանի դեպքերը շատ մտահոգիչ են բոլորի համար, քանի որ սա սովորական` գունավոր հեղափոխություն չէր, և կապ չուներ ընտրությունների հետ: Չնայած դրան, նա ընդգեց, որ տեղի ունեցածից հետո «փլուզվեց և´ պետական համակարգը, և´ հասարակությունը»:
«Այսօր մեծ արագությամբ կատարվող միջազգային գործընթացները, ըստ էության, թիրախ են ստեղծում առանձին պետական համակարգերում: Կան պետություններ, որոնք այս կամ այն պահին ուղղակի փլուզվում են, քանդվում են. կամ իշխանական, պետական համակարգն է փլուզվում, կամ` տնտեսությունը»,- ասաց Մ. Սարգսյանն ու ավելացրեց, որ այս երևույթները պետք է կապել մինյանց հետ, քանի որ դրանք արտաքին ու ներքին գործընթացներ են, ու բացարձակ նշանակություն չունի, թե ում շահից էր բխում Ղրղզստանում անկայունություն ստեղծելը:
Մյուս կողմից ավագ փորձագետը համոզված է, որ «ոչ ոք չի կարող փլուզել մի պետություն, եթե այն արդեն իսկ փլուզման եզրին չէ»: Միևնույն ժամանակ Մ. Սարգսյանը նշեց, որ «Ղրղզստանում տեղի ունեցածն իսկապես բողոք էր` բունտ, և ոչ թե քաղաքական գործընթաց, քանի որ այսօր ձևական իշխանություն կազմած ուժերը քիչ ազդեցություն ունեն այդ երկրի ու հասարակության վրա»:
29.04.2010, 13:17
No comments:
Post a Comment