«Ղարաբաղի հակամարտության կարգավորման գործընթացում մեզ շատ երկար ճանապարհ է սպասում անցնելու, որպեսզի մոտեցումները լինեն այնպիսին, որ հնարավոր լինի ստեղծել մի փաստաթուղթ»,- հայտարարեց ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը:
Գ. Մինասյանը խնդրի կարգավորման գործում արագ լուծումներ ակնկալելն անտրամաբանական համրեց: Այս առիթով նա նշեց նաև, որ «մի կողմից մենք ունենք Ղարաբաղյան սառեցված կոնֆլիկտ, որն ամեն րոպե կարող է բռնկվել, մյուս կողմից` ադրբեջանական իշխանությունների հստակ ռազմատենչ հայտարարությունները, որոնք թույլ չեն տալիս մեզ մոտ ապագայում հասնել այն իրավիճակին, որ ադրբեջանական հասարակությունը պատրաստ լինի փոխզիջումների»:
Միևնույն ժամանակ Գ. Մինասյանը համոզված է, որ «ցանկացած վատ բանակցություն շատ ավելի լավ է, քան ռազմական գործողությունները»:
«Մենք հետևողականորեն պետք է մեր ադրբեջանցի հարևանների հետ տանենք աշխատանք` նպատակ ունենալով նրանց բերել քաղաքակիրթ, աշխարհի համար ընկալելի լուծումների, իսկ դրանք առանց ուժի կիրառման ու առանց սպառնալիքի լուծումներն են և փոխզիջումային տարբերակը», - բացատրեց Գ. Մինասյանն ու հավելեց. «Ղարաբաղի խնդրի կարգավորումը պետք է երեք սկզբունքների բավարարի` ցամաքային սահմանը Հայաստանի հետ, ԼՂՀ անկախ կարգավիճակը և անվտանգության երաշխիքները»:
Հանձնաժողովի նախագահը, ամփոփելով իր խոսքը, մեջբերեց Լեռնային Ղարաբաղի Հանրապետության նախագահ Բակո Սահակյանի հայտարարությունը, ըստ որի «Ղարաբաղի անկախության և անվտանգության խնդիրը բանակցություններում սակարկման առարկա չեն կարող դառնալ»:
18.01.2010, 16:03
No comments:
Post a Comment