Ամանորյա հեռուստահաղորդումները բավարարել են ոչ բոլորի պահանջմունքները: Այս մասին լրագրողների հետ հանդիպման ժամանակ հայտնեց երգչուհի Լիլիթ Պիպոյանը` վկայակոչելով իր շրջապատի մարդկանց, ովքեր դժգոհ են մնացել 2010 թ-ի ամանորյա հաղորդումներից:
Չնայած այն բանին, որ Լ. Պիպոյանը մոնիթորինգի չի ենթարկել հայկական հեռուստաընկերություններով ցուցադրվող ամանորյա հաղորդումները, այնուամենայնիվ, հասցրել է նկատել, որ երաժշտական հաղորդումները գերակշռում էին, որոնք էլ «ռեստորանային» մակարդակի էին:
«Եթերը լցնել միայն այդ կարգի երաժշտությամբ, չի կարելի, քանի որ տեղ չի մնում մյուսների համար, վերջապես բազմազանություն պետք է լինի, չէ՞ որ մեր հասարակությունը բազմաթիվ շերտերից է բաղկացած»,- կարծում է Լ. Պիպոյանը:
Երգչուհու կարծիքով, չի կարելի ասել նաև, որ «բավարար են մի քանի հեռուստաընկերություններով ցուցադրվող դասական երաժշտության համերգները», քանի որ, ըստ Պիպոյանի, «միայն դասականը բավարար չէ, երբ եթերից դուրս են մնում մյուս բոլոր ժանրերը»:
«Ռեստորանը վատ բան չէ, բայց այժմ այն համարվում է անճաշակության մարմնավորում», - մանրամասնեց երգչուհին ու ընդգծեց. «Ես հիասթափված եմ այս տարվա եթերից»:
Փոխարենը, Լ. Պիպոյանի կարծիքով, կարելի էր Ամանորին ցուցադրել ամբողջ տարվա ընթացքում եղած լավագույն հաղորդումները կամ երաժշտական կատարումները:
11.01.2010, 15:32
No comments:
Post a Comment