Ադրբեջանական կինոյի՞, թե՞ հիգիենայի օրեր

Հայաստանում անցկացվելիք` «Ադրբեջանական կինոյի օրեր» փառատոնը լուրջ ընդդիմություն է ստանում հայաստանյան որոշ լրատվամիջոցների, ինչպես նաև սոցիալական կայքերի շնորհիվ: Ու շատերի համար է պարզ, որ նմանօրինակ նախաձեռությամբ կարող էր հանդես գալ միայն «Խաղաղարար նախաձեռնությունների կովկասյան կենտրոն» հասարակական կազմակերպությունը` գլխավորությամբ հայտնի Գեորգի Վանյանի: Միջոցառման հովանավորն էլ պետք է լիներ մի այնպիսի կառույց, ինչպիսին Հայաստանում Ամերիկայի դեսպանատունն է:

Հիշեցնենք, որ երբ սոցիալական կայքերը սկսեցին դեմ արտահայտվել միջոցառմանը, ՀՀ մշակույթի նախարարությունն անմիջապես հանդես եկավ հայտարարությամբ ու հավաստիացրեց, որ նախարարությունը ոչ մի կապ չունի փառատոնի հետ: Այնուհետև բողոքի ալիքը հանգեցրեց նրան, որ փառատոնի կազմակերպիչները ստիպված եղան հետաձգել փառատոնի մեկնարկի օրը` նոյեմբերի 2-ը: Ու գրեթե ոչ մի ԶԼՄ-ի հայտնի չէ, թե ե՞րբ կկայանան կինոյի օրերը, կկայանան արդյո՞ք, թե՞ ոչ, կամ որտե՞ղ է անձամբ ինքը` Վանյանը:

Եթե ժամանակով հետ շարժվենք, ապա կհիշենք, որ 3 տարի առաջ` դեկտեմբերին, նույն Գ. Վանյանը` իր համախոհ Աշոտ Բլեյանի հետ, ադրբեջանական մշակույթի օրեր էր կազմակերպել «Մխիթար Սեբաստացի» կրթահամալիրում: Ամենացավալին այն է, որ այդ առիթով կրթահամալիրի սաները շարադրություններ ու բաց նամակներ էին գրել իրենց ադրբեջանցի հասակակիցներին, ու այդ գրությունները վկայում էին, որ մատաղ սերնդի հոգիներում ավերածություններ ու ստի քարոզչություն է ծավալվում ... «հայ»-ի կողմից:

Ինչևէ, միջոցառման իրականացման առիթով նույնիսկ հյուրեր էին ժամանել ադրբեջանից, և նախաձեռնությանը միակ հակահարված տվողը, թերևս, բլոգերներն էին, ովքեր ադրբեջանական մշակույթի օրերի պաշտոնական բացման օրը ներխուժել են դահլիճ և հպարտ ճառասացին` Գ. Վանյանին, օճառներ են նվիրել` «գործը փափուկ կատարելու» մաղթանքով: Ա. Բլեյանն այդ օրն այնքան լկտիություն է ունեցել, որ միջադեպի վերաբերյալ լրագրողներին ասել է. «Կրթահամալիրը միշտ էլ հիգենիկ միջոցների կարիք ունի»:

Անցած տարի նույն Ա. Բլեյանը, խոսելով ժողովրդավարությունից, ժողովրդական արժեքներ սերմանելուց, լրագրողներին փորձում էր համոզել, թե մենք պետք է հանդուրժող լինենք մյուս ազգերի ու ժողովուրդների, այդ թվում` ադրբեջանցիների ու թուրքերի հանդեպ, թե մենք պետք է տարատեսակ միջոցառումներով երկխոսության գանք, այլ ոչ թե բանակցություններով կամ արձանագրություններով: Երբ Ա. Բլեյանին հարցրի, թե արդյո՞ք նա նորից միտք ունի ադրբեջանական մշակույթի օրեր հայտարարել Հայաստանում, նա, անշուշտ վրդովվեց, ավելին` ընդգծեց, որ հենց ինձ նմաններն են, որ իշխանությունների ցանկությունն են կատարում ու էլի նմանօրինակ բաներ (այդպես էլ չհասկացա` հարցս ի՞նչ կապ ուներ իշխանությունների ցանկության հետ):

Ամիսներ անց լրագրողների ուշադրության առջև հայտնվեց Գեորգի Վանյանն ու խնդրեց բոլորին տեղեկատվության տարածմամբ սատարել իրեն, քանի որ ինքն իր օտարերկրացի, ինչպես նաև` ադրբեջանցի համախոհների հետ, ցանկանում է մեր տարածաշրջանում ստեղծել մի տարածք` «հրապարակ», որտեղ տարածաշրջանի երկրների ներկայացուցիչների հետ հանդիպումներ ու քննարկումներ կկազմակերպվեն, ինչպես նաև կնախաձեռնվեն մի շարք հասարակական ու մշակութային միջոցառումներ: Այս իրականացնելու համար, սակայն, Վանյանին ֆինանսներ կամ օճառներ էին հարկավոր, և հարկավոր էր, որ լայն հասարակությունը տեղեկացված լինի:

Իսկ գուցե փառատոնն հենց ա՞յս տարածքում է իրականացվելու ...

Այսօր Գ. Վանյանի նախաձեռնությանը հակահարված տվողների թիվն ավելացել է, ու հասկանալի և ընդունելի է բողոքի այս ալիքը, բոլոր նրանց վրդովմունքը, ովքեր անհանգստացած են այս միջոցառմամբ, ովքեր այս հարցում մեղավոր տեսնում են նաև «իշխանությունների լռությունը»:

Հասկանալի է նաև, որ բլոգերների ցանկությունը մարգարեական ուժ է ստացել: Փաստորեն, օճառներն իսկապես իրենց նշանակությունն ու դերը խաղացել են «փափուկ գործելու» առումով, և այսօր արդեն Գ. Վանյանն ու իր համախոհներն ավելի «փափուկ», ավելի մեծ ձեռնարկ` կինոփառատոն են իրականացնում:

Ու, փաստորեն, որքան էլ ընդդիմանանք, կարմիր կովն իր կաշին չի՞ փոխում ...

Իմ աշխարհ

Առցանց գրական-ստեղծագործական մրցույթ

«Ուտոպինա» կազմակերպությունը հայտարարում է առցանց գրական-ստեղծագործական մրցույթ, որին կարող են մասնակցել բոլոր ցանկացողները: Ինչպես Aysor-ը տեղեկացավ կազմակերպության մամուլի ծառայությունից, մրցույթի մասնակցության վերջնաժամկետը հոկտեմբերի 25-ն է` ժ. 12:00-ն:

Մրցույթն անցկացվում է կազմակերպության «Մայր-դուստր` եռակողմ հարաբերություն» նախագծի շրջանակներում: Մրցույթին ներկայացված ստեղծագործությունները տեղադրվում են կազմակերպության պաշտոնական կայքում, որի միջոցով էլ ցանկացողները կարող են քվեարկել` թողնելով մեկնաբանություններ:

Կազմակերպիչները հայտնում են, որ մրցույթի արդյունքներն ամփոփելիս` հաշվի են առնվելու նաև ընթերցողների ու քվեարկողների հիմնավորումները` ներկայացված այս կամ այն ստեղծագործության վերաբերյալ: Բացի այդ` քվեարկել կարող եք նաև «Facebook» սոցիալական կայքում` կազմակերպության էջի միջոցով:

20.10.2010, 18:13

Aysor.am

Երեք ֆիլմ` մեկ երեկոյի ընթացքում

Այսօր Նարեկացի արվեստի միությունը «Կինոաշուն» նախագծի շրջանակներում ներկայացնում է երեք հայկական ֆիլմ: Այս մասին Aysor-ին հայտնեց ՆԱՄ հասարակայնության հետ կապերի բաժնի պատասխանատու Նաիրա Հայրապետյանը:

Ն. Հայրապետյանի տեղեկացմամբ` այսօր 19:00-ին կինոսերները հնարավորություն կունենան դիտելու Ստեփան Գևորգյանցի «Մեծ տոն», Արտակ Մուրադյանի «Անկախության ծնունդ» և Դավիթ Մաթևոսյանի «Թշնամիներ» ֆիլմերը:

Հիշեցնենք, որ Նարեկացի արվեստի միությունը հոկտեմբերի 12-ից նոյեմբերի 9-ը Հայաստանի Ազգային կինոկենտրոնի հետ միասին ներկայացնելու է հայկական ֆիլմերի երեկոներ: Ֆիլմերը ցուցադրվելու են յուրաքանչյուր երեքշաբթի և չորեքշաբթի օրերին` երեկոյան 19:00-ին:

Տեղեկացնենք, որ ռեժիսոր Ստեփան Գևորգյանցի «Մեծ տոն» ֆիլմը պատմում է Արցախյան պատերազմի մասին, որին կամա, թե ակամա մասնակցություն են ունեցել նաև մանուկները: Այս ֆիլմը պատերազմը ներկայացնում է հենց մանուկների աչքերով:

Ռեժիսոր Արտակ Մուրադյանի «Անկախության ծնունդ» ֆիլմի գլխավոր հերոսը բալետում պարող մի երիտասարդ է: Ֆիլմը պատմում է այն մասին է, թե ինչպես է անկախության ծնունդը` երիտասարդը, հասնում իր երազանքի կատարմանը:

«Թշնամիներ» ֆիլմում ռեժիսոր Դավիթ Մաթևոսյանը սցենարի հիմք է վերցրել ռուս գրող Վսեվոլոդ Գարշինի համանուն պատմվածքը: Այն պատմում է հակառակորդ բանակներում կռվող երկու զինվորների մասին, ովքեր մահվան ճիրաններում հասկանում են, որ իրականում իրենք թշնամիներ չեն, այլ նույն ճակատագրի տեր մարդիկ, որ պատերազմի ժամանակ ոչ մեկին պետք չեն: Նրանք հասկանում են, որ կարող են իրենց լիարժեք մարդ համարել միայն այն ժամանակ, երբ հիշեն, թե ինչ է իրենից ներկայացնում իրենց սեփական մարդկային էությունը:

20.10.2010, 17:46

Aysor.am

Դեպարդյեն պատրաստ է դերեր կերտել հայ գրականությունից

«Իմ առաջին ամենասիրած դերերից է Սիրանո դե Բերժերակի ստեղծագործությունների հիման վրա խաղացած դերերը, սիրում եմ նաև Վիկտոր Հյուգոի, Ալեքսանդր Դյումայի ստեղծագործությունների հիման վրա կերտած դերարս»,- ի պատասխան Aysor-ի հարցին` հայտնեց աշխարհահռչակ դերասան Ժերար Դեպարդյեն:

Հիշեցնենք, որ դերասանը Հայաստանում է «Կարոտ» մշակութային փառատոնի շրջանակներում, որը մեկնարկել է սեպտեմբերի 2-ին և առաջին անգամ տեղի է ունենում Հայաստանում ու Արցախում: Նախորդ տարիներին փառատոնն անկացվել է Մոսկվայում և առանձնանում է նրանով, որ փառատոնին մասնակցություն են ունենում մշակութային տարբեր ոլորտների ու տարբեր երկրների ներկայացուցիչներ:

Այս տարի փառատոնին մասնակցում են 12 երկրների ներկայացուցիչներ: Այսօր փառատոնի շրջանակներում տեղի է ունենալու մրցանակաբաշխություն:

Ժ. Դեպարդյեն հայտնեց, որ սիրում է դասականների ստեղծագործությունների հիման վրա բեմականացված ֆիլմերում դերակատարություններ ունենալ: Այս առիթով նա նշեց, որ կարելի է դերեր կերտել նաև հայ դասական գրականության ստեղծագործությունների, բանահյուսության հիման վրա, նույնիսկ` Ցեսապանության թեմայով:

Ինչ վերաբերում է «Կարոտ» մշակութային փառատոնին, ապա Ժ. Դեպարդյեն նախ նշեց, որ կարոտ բառը ֆրանսերենով տարօրինակ է հնչում, քանի որ այն նշանակում է գազար: Ըստ նրա` «հայերենով այն իրական կարոտի մասին է, որը վերաբերում է արմատներին», և այդ առումով է, որ փառատոնի անունը շատ լավ է ընտրված:

«7 մլն հայ գտնում է հայաստանից դուրս և պահպանել է իր արմատները, ու ճիշտ է կազմակերպել մի փառատոն, որը գնում է դեպի այդ արմատները, վերակնգնում է հայ ժողովրդի ավանդույթներն ու հին արվեստները, մշակութային ավանդույթները»,- ամփոփելով իր խոսքը` ընդգծեց Ժ.Դեպարդյեն:

04.09.2010, 15:34

Aysor.am

Դեպարդյեն զարմացած է. Հայերը Ֆրանսիայում խոսում են հայերեն

«Շատ ուրախ եմ գտնվելու Հայաստանում` այս բազմամշակութային փառատոնին մասնակցելու համար, մի երկրում, որի մասին ես գիտեմ բավականին երկար տարիներ»,- հայտնեց ֆրանսիացի աշխարհահռչակ կինոդերասան Ժերար Դեպարդյեն, ով Հայաստանում է «Կարոտ» մշակութային փառատոնի շրջանակներում:

Հիշեցնենք, որ սեպտեմբերի 2-ից մեկնարկել է «Կարոտ» հայկական մշակութային փառատոնը, որն այս տարի առաջին անգամ անցկացվում է Հայաստանում և Արցախում: Նախորդ տարիներին փառատոնն անկացվել է Մոսկվայում և առանձնանում է նրանով, որ փառատոնին մասնակցություն են ունենում մշակութային տարբեր ոլորտների ու տարբեր երկրների ներկայացուցիչներ:

Այս տարի փառատոնին մասնակցում են 12 երկրների ներկայացուցիչներ: Այսօր փառատոնի շրջանակներում տեղի է ունենալու մրցանակաբաշխություն:

Ժ. Դեպարդյեն լրագրողների հետ հանդիպման ժամանակ հայտնեց, որ Ֆրանսիայում ծանոթ է բազմաթիվ հայերի, այդ թվում` հանրաճանաչ: Նա նշեց, որ գիտե, թե ինչու են հայերը հայտնվել Ֆրանսիայում, ինչ է նշանակում այն Ցեղասպանությունը, որը տեղի է ունեցել 1915 թ-ին:

«Ես ծանոթ եմ Ֆրանսիայում ապրող հայերի արդեն 4-րդ սերնդի ներկայացուցիչների հետ, ովքեր խոսում են և’ իրենց հայրենիքի լեզվով, և’ իրենց հովանի տված երկրի լեզով: Մի բան ինձ միշտ զարմացնում է. նրանք չեն մոռացել ո’չ իրենց ավանդույթները, ո’չ լեզուն»,- ընդգծեց դերասանն ու նշեց, որ իր կարծիքով` դա նրանից է, որ «նրանք միշտ մնում են իրենց նախնիների ստվերների հետ»:

04.09.2010, 15:18

Aysor.am

Բուհերն առանց ուսանո՞ղ, թե՞ հանուն ուսանող ունենալու

Հայաստանի հանրակրթական դպրոցների` 12-ամյա կրթական համակարգի անցնելու փաստը հաջորդ` 2012 թ-ին հանրակրթական դպրոցներին զրկում է շրջանավարտներ ունենալու հեռանկարից: Այս հանգամանքը մտահոգիչ է հատկապես բուհերի համար, որոնք, փաստորեն, հաջորդ տարի առաջին կուրսեցիներ չեն ունենալու, կամ …

Այն մասին թե ինչպե՞ս են լրացվելու դիմորդների բացը և ըստ այդմ էլ` լուծվելու առաջ եկած խնդիրները, Aysor-ը զրուցեց Հայաստանի պետական ճարտարագիտական համալսարանի ռեկտոր, պրոֆեսոր Ոստանիկ Մարուխյանի հետ: Նրա խոսքերով, այդ ուղղությամբ բուհը մի շարք քայլեր է ձեռնարկում:

«Նախնական պայմանավորածությունն այսպիսին է, որ պետական ֆինանսավորման մակարդակը չի իջնելու այս տարվա ֆինանսավորման մակարդակից»,- որպես առաջնային քայլ` նշեց Ո. Մարուխյանը:

Մյուս կողմից, ըստ համալսարանի ռեկտորի, բոլոր այն դիմորդները, ովքեր այս տարի չեն կարողացել հաղթահարել ընդունելության մրցույթը, կարող են դիմել մյուս տարի` բուհ ընդունվելու ավելի լայն հնարավորություններով:

«Օրինակ` պետպատվերի շրջանակներում մեր համալսարան ընդունվողների թիվն այս տարի բակալավրի համակարգով եղել է 253-ը, և, իմ կարծիքով, այդ թիվը հասանելի կլինի մեզ համար նաև մյուս տարի»,- ընդգծեց Ո. Մարուխյանն ու հավելեց, որ այս դեպքոմ խնդիր կառաջանա վճարովի ուսուցման համակարգում:

Վճարովի ուսուցման համակարգում ուսանողների թվի սակավությունն իր հերթին բուհի համար ֆինանսական խնդիրներ է առաջ բերելու: Այս առիթով էլ ռեկտորը խոստովանեց, որ «չնայած դրանով պայմանավորված` համալսարանը կունենա ֆինանասական լուրջ դժարություններ, սակայն նախորդ տարիներին որոշակի խնայողություններ է կատարել և կուտակած միջոցներով կմեղմի բացը»:

Ու որպեսզի սակավաթիվ դիմորդներն ընտրեն հենց Հայաստանի պետական ճարտարագիտական համալսարանի առաջարկած մասնագիտությունները, բուհը լրացուցիչ աշխատանք է կատարելու` ավելացնելու հետաքրքրությունը այդ մասնագիտությունների գծով և տալու համապարփակ տեղեկություններ` համալսարանի տված գիտելիքների ու ընձեռած առավելությունների վերաբերյալ:

Շարունակելի …

04.09.2010, 14:53

Aysor.am

Ժ. Դեպարդյե. Թուրքիան սկսել է Ցեղասպանության ճանաչումը

«Այսօր այցելել եմ Ցեղասպանության հուշարձան, որն ինձ վրա թողել է մեծ տպավորություն»,- հայտարարեց աշխարհահռչակ ֆրանսիացի կինոդերասան Ժերար Դեպարդյեն` լրագրողների հետ հանդիպման ժամանակ:

Հիշեցնենք, որ դերասանը Հայաստանում է «Կարոտ» մշակութային փառատոնի շրջանակներում, որը մեկնարկել է սեպտեմբերի 2-ին և առաջին անգամ տեղի է ունենում Հայաստանում ու Արցախում: Նախորդ տարիներին փառատոնն անկացվել է Մոսկվայում և առանձնանում է նրանով, որ փառատոնին մասնակցություն են ունենում մշակութային տարբեր ոլորտների ու տարբեր երկրների ներկայացուցիչներ:

Այս տարի փառատոնին մասնակցում են 12 երկրների ներկայացուցիչներ: Այսօր փառատոնի շրջանակներում տեղի է ունենալու մրցանակաբաշխություն:

Խոսելով Թուրքիայի կողմից Հայոց ցեղապանության ճանաչման մասին, դերասանը հավաստիացրեց, որ «Թուրքիան ճանաչման գործընթացն արդեն կամաց-կամաց սկսել է»:

«Չեմ ցանկանում քաղաքականացնել այսօրվա հանդիպումը, բայց գիտեմ, որ կան երկրներ, որոնք Ցեղասպանության ճանաչման հարցադրումը դրել են Թուրքիայի առջև»,- ընդգծեց Ժ. Դեպարդյեն ու հավելեց, որ այս գործում ևս կարևոր է մշակույթի դերը:

Ըստ նրա` «քաղաքականությունը հետաքրքրությունների ու շահերի հավասարակշռություն է, իսկ մշակույթը` ազատություն է, մարդու արտահայտման ազատութունը, ազգի արմատների ազատութունն է»: Նրա խոսքերով` հենց մշակույթը պետք է մարդկանց սովորեցնի, որ իրենք տարբեր են ու զանազան, և, որ պետք չէ վախենալ այդ տարբերությունից:

Դերասանը խոստովանեց նաև, որ Հայաստանում գտնվելու իր նպատական այն է, որ աշխարհին ներկայացնի «այնպիսի Հայաստան, որն արագ տեմպերով գնում է առաջ` առանց մոռանալու նախկին վերքերը»:

04.09.2010, 14:51

Aysor.am

Մշակութային ժառանգություն. տատերի՞ց, թե՞... պեղումներից

Հայաստանում ազատ ու բացահայտ կերպով վաճառվում են պատմամշակութային արժեք ու նշանակություն ունեցող իրեր, այդ թվում` կավե կարասներ, սափորներ ու ափսեներ, որոնք ձեռք բերելն ամենևին էլ դժվարություն չի ներկայացնում իրենից` և հասանելի են, և` մատչելի։

Սա գովազդ չէ։ Հակառակը` մտահոգություն։

Այսպես, վերջերս Aysor-ն ահազանգ ստացավ, որ Ստեփանավանի մոտակայքում վաճառում են կավե առարկաներ, որոնք մասնագետները թվագրում են Ք.Ծ.Ա. 1000-700 թթ-ներ: Այս մասին, սակայն, ՀՀ մշակույթի նախարարությունը ամենևին էլ տեղյակ չէ: Ավելին` նախարարության մամուլի վարչության պետ Գայանե Դուրգարյանը նույնիսկ վրդովվեց, որ իրենց ոչ հավաստի տեղեկատվություն ենք ներկայացնում, քանի որ «այս պահին Ստեփանավանում պեղումներ չեն իրականացվում»:

«Ստեփանավանի մոտակայքում պեղումներ այս պահին իրականացվում են միայն Թեղուտի շրջանում: Սակայն պեղումներ իրականացնող ընկերությունն է պատասխանատու պեղումների արդյունքում գտնված իրերի անվտանգության համար և հենց այդ ընկերությունն էլ ապահովում է, որպեսզի պեղումների վայրից ոչինչ չկորչի, չանհետանա»,- բացատրեց Գ. Դուրգարյանը, ում համար անհասկանալի էր, թե ինչպե՞ս հնարավոր է պեղումներ իրականացվող վայրից պատմամշակութային արժեք ներկայացնող առարկաները հայտնվեն սովորական քաղաքացիների մոտ, անկախ նրանից, թե որտեղ են պեղումներն իրականացվում:

Պեղումների ժամանակ գտնված իրերի ազատ վաճառքի փաստի առթիվ, մեր անհանգստությանն ի պատասխան, մշակույթի նախարարության մամուլի վարչության պետը հակադարձեց. «Իսկ միգուցե նա այդպիսի առարկա իր տա՞նն ուներ, ես ի՞նչ իմանամ, թե որտեղի՞ց է, որ վաճառում է. հո՞ մենք այդպիսի վերահսկողություն չենք իրականացնում»:

Թե Հայաստանում ո՞ր ընկերություններն ու կազմակերպություններն են պեղումներ իրականացնում և Հայաստանի ո՞ր շրջաններում ու վայրերում են այս պահին տեղի ընթանում պեղումներ, ՀՀ մշակույթի նախարարությունից խոստացան առաջիկայում պատասխանել, քանի որ համապատասխան ոլորտին նվիրված հաշվետվությունը ոչ միայն անհայտացել էր նախարարության պաշտոնական կայքից, այլև` այն պատրաստողների մոտից: Գտնելուն պես խոստացան հայտնել։

Մեկ շաբաթ է անցել։

Այս առիթով Aysor-ը զրուցեց նաև Հայաստանի պատմության թանգարանի տնօրեն Անելկա Գրիգորյանի հետ, ով նշեց, որ նմանօրինակ դեպքերի ականատես իրենք էլ են դառնում, սակայն որևէ իրավասություն չունեն պատմական ու մշակութային արժեք ներկայացնող իրը վաճառողից բռնագանձել կամ ասել` ինչու՞ ես վաճառում, որտեղի՞ց ես ձեռք բերել և այլն:

«Ըստ իս` թեկուզ բարոյական առումով, այդ մարդն իրավունք չունի վաճառելու, և իմ անձնական իմացության համաձայն` ամեն մի մարզում կան տեղական հուշարձանների պահպանության վերահսկողության բաժիններ և, ըստ էության, իրենք պետք է հետևեն և թույլ չտան նման դրսևորումներ»,- նշեց Ա. Գրիգորյանն ու հավելեց, որ մյուս կողմից անհնար է վերահսկում իրականացնելը, որովհետև շատերը հարմար առիթ են գտնում իրենց ձեռք բերածը իրացնելու համար:

Թանգարանի տնօրենը, կիսելով մեր մտահոգությունը, հայտնեց, որ թանգարանի աշխատակիցները հաճախ լինում են «Վերնիսաժում» և, արժեքավոր իրեր տեսնելիս` գնում են դրանք թանգարանի համար:

«Շատ հաճախ հնագույն առարկաներ տիրապետողներն ասում են, որ տվյալ առարկան իրենց է պատկանում, որ այն ժառանգություն է տատիկի կողմից, սակայն… հայտնի է, թե ինչպես է այն ձեռք բերվել»,- նկատեց Ա. Գրիգորյանն ու հավելեց, որ ոչ մեկին մեղադրել չի լինի, քանի որ «այսօրվա պայմաններից ելնելով` մարդիկ իրենց ունեցածն են վաճառում, էլ ուր մնաց` ձեռքն ընկածը չվաճառեն»:

Թանգարանի տնօրենի կարծիքով` չպետք է վախեցնել այդ մարդկանց, որովհետև ինքն ուրիշ եղանակ կգտնի դրանք իրացնելու` այնպես, որ ոչ ոք էլ չի տեսնի: Նա ներկայացրեց թանգարանի օրինակը` «մենք գերադասում ենք հորդորել, որպեսզի գտնողը բերի` գնենք, որովհետև կան իրեր, որոնք անհրաժեշտ է ունենալ»:

Տեղեկություն. «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» ՀՀ օրենքի «Հնագիտական պեղումներ ձեռնարկողը» խորագրով 27-րդ հոդվածն ասում է. «Հետախուզում և հնագիտական պեղումներ ձեռնարկողն աշխատանքների համալիր ծրագրի ամբողջական իրագործման ֆինանսավորողը և կազմակերպողն է: Նա սահմանված կարգով պատասխանատու է աշխատանքների ընթացքում հուշարձանների անվթարության ապահովման և պեղումներով հայտնաբերված հուշարձանների ամրակայման, գիտական վավերագրման և նյութերի ու արդյունքների հրապարակման համար: Հետախուզում և հնագիտական պեղումներ ձեռնարկող կարող են լինել Հայաստանի Հանրապետության և այլ պետությունների իրավաբանական ու ֆիզիկական անձինք …»:

«Հետախուզման և հնագիտական պեղումների ղեկավարը» խորագիրը կրող 28-րդ հոդվածն էլ ասում է. «Հետախուզման և հնագիտական պեղումների ղեկավարը տվյալ հուշարձանը պեղելու համար թույլտվություն (բաց թերթիկ) ունեցող մասնագետն է:

Հետախուզման և հնագիտական պեղումների ղեկավարը պատասխանատու է ինչպես աշխատանքների արդյունավետության, այնպես էլ ամբողջ գործաշրջանի ընթացքում հուշարձանի պահպանությունը և անվթարությունն ապահովելու համար»:

Նշենք նաև, որ ՀՀ Պատմության թանգարանի տնօրենը շեշտեց` նույն օրենքի համաձայն` պեղումների արդյունքում հայտնաբերված իրերը պեղումների իրականացնողները, համապատասխան ուսումնասիրություն, տպագրում կատարելուց հետո, 2 տարվա ընթացքում պարտավոր են հանձնել թանգարանին:

31.07.2010, 13:08

Aysor.am

«Տեր-Պետրոսյանի քաղաքականությունը իրեն արդարացնելու համար է»

«Իր ամբողջ քաղաքական գործունեության ընթացքում` կապված վերջին ընտրությունների և հետընտրական զարգացումների հետ, Լևոն Տեր-Պետրոսյանը, հիմնականում, հետապնդել է ավելի շատ ինքնաարդարացման նպատակ, քան նորից իշխանության գալու»,- հայտարարեց ՀՅԴ խորհրդարանական խմբակցության ղեկավար Վահան Հովհաննիսյանը` անդրադառանալով ՀՀՇ-ի 16-րդ համագումարի ընթացքում առաջին նախագահ Լևոն Տեր-Պետրոսյանի ելույթին` «դեմոգրաֆիկ խնդիրների մասին, որոնք սկիզբ են առել 11-րդ դարից»:

Վ. Հովհաննիսյանի մեկնաբանությամբ` Լ. Տեր-Պետրոսյանը «նախ փորձ արեց ապացուցել, որ հայկական վերջին ժամանակների պատմության մեջ ինքը չի եղել տիրան, բռնակալ, ինչն արեց նույնիսկ մարդկանց մարտիմեկյան զոհաբերության տանելով»: Բացի այդ` ըստ պատգամավորի` նախկին նախագահը «փորձում է ապացուցել, որ կլանային համակարգը` կլանային տնտեսությունը, կաշառակերությունը, կոռուպցիան, ստվերային տնտեսությունը, իր ժամանակ ամենավատը չի եղել, և այլ հարց է, որ դրա հիմքերն իր ժամանակ են դրվել»:

«Այս 2-ը նա համարում է, որ ապացուցել է, և հիմա պետք է ձերբազատվել ամենակարևոր պիտակից: Այն ժամանակները, որ մենք անվանում ենք մութ և ցուրտ տարիներ, երբ 1 միլիոն մարդ արտագաղթեց Հայաստանից, փորձ է անում ցույց տալ, որ այդ կատաստրոֆիկ երևույթն իր ռեժիմի, իր ադմինիստրացիայի, իր կառավարման հետ չի կապված, այլ` երևույթ է, որը գալիս է 11-րդ դարից, որը մենք պետք է գիտակցենք` որպես ռեալ փաստ, որ պետք է հասկանանք, թե գոյություն ունի` անկախ որևէ մեկի կառավարման մեթոդից»,- նշեց Վ. Հովհաննիսյանն ու ընդգծեց. «Սա ամենավտանգավոր ծուղակն է, որ նա մեր ժողովրդի առջև լարում է, որովհետև իրականությունը բոլորովին այդ չէ. մեր պատմությունը վկայում է, որ 11-րդ դարում արտագաղթը անիրավ, անարդար, խարդախ ու անգրագետ հայ իշխանավորների գործունեության հետևանք էր, այնպես, ինչպես 1990-ականների արտագաղթը` գողության, կաշառակերության ու անարդարության հետևանք էր»:

Վ. Հովհաննիսյանը վստահ է, որ հայ ժողովուրդը ֆիզիկական ու նյութական դժվարություններին` լույսի, հացի պակասին, հիվանդությանը կդիմանա, սակայն չի դիմանում միայն անարդարությանը` սեփական իշխանություններից եկող անարդարությանը: Նրա համոզմամբ` Լ. Տեր-Պետրոսյանի ելույթի ժամանակ ներկայացված «պատմական էքսկուրսը քողարկում է այն նպատակը, որ դրված է այս երևույթի մեջ` ցույց տալու, որ արտագաղթի մեղավորը ինքը չէ, որ այն օբյեկտիվ երևույթ է»:

«Իսկ այսօրվա արտագաղթի մեղավորը օլիգարխներն են, այն ոստիկաններն են, որոնց ժողովուրդը դադարել է հավատալ, այն դատավորներն են, որոնց անարդար դատավճիռներից կարող է արտագաղթ լինել, դա Հայաստանի այն մթնոլորնտ է, որտեղ քաղաքացին իրեն քաղաքացի չի զգում, իրեն պաշտպանված չի զգում և դադարում է հայրենիքը դիտել` որպես հայրենիք, և սկսում է որոնել տարածք, որտեղ իր նկատմամբ ավելի արդար կլինեն»,- ամփոփելով իր խոսքը` հայտարարեց խմբակցության քարտուղարը:

23.07.2010, 17:34

Aysor.am

«Հայաստանը շիզոֆրենիկներին հերոսի կոչում չի շնորհում»

«Հերոսն այնպիսի կոչում է, որ շռայլել և տալ այնպիսի շիզոֆրենիկների, ինչպիսին է հարձակվող ադրբեջանիցին, կամ քնած մարդուն կացնահարողը, չի կարելի. նման շիզոֆրենիայի դեպքեր Հայաստանում չեն կարող գրանցվել»,- հայտարարեց ՀՅԴ խմբակցության ղեկավար Վահան Հովհաննիսյանը` անդրադառնալով օրերս Ադրբեջանի նախագահ Իլհամ Ալիևի կողմից Մուբարիզ Իբրագիմովին ազգային հերոսի կոչում շնորհելու փաստին:

Հիշեցնենք, որ ենթասպա Մուբարիզ Իբրագիմովն այն դիվեսանտներից էր, որոնք այս տարվա հունիսի 18-ին, Չայլու գյուղի ուղղությամբ հատել էին ԼՂՀ սահմանը և մարտի բռնվել ՊԲ առաջատար ստորաբաժանումների հետ, ինչի արդյունքում ադրբեջանցի դիվերսանտը սպանվել էր:

«Հայաստանում հերոսի կոչման նկատմամբ շատ ավելի զգուշավոր և ճիշտ կեցված է ընդունված: Մենք քիչ, բայց իսկապես ազգային հերոսներ ունենք»,- ամփոփելով իր խոսքը` ընդգծեց Վ. Հովհաննիսյանը:

23.07.2010, 16:10

Aysor.am

«Հայաստանը զիջողական քաղաքականություն չի որդեգրելու»

«Ղարաբաղյան հարցում այլ լուծում որոնելու համար, ինչ տեսակի լուծում էլ այն լինի` իրավական, քաղաքական, թե ուժային, ինչպիսի նոր մեթոդաբանություն էլ կիրառվի, պետք է նշանակի նոր քաղաքականություն Հայաստանի ներսում, որովհետև այսօրվա Հայաստանը իր քաղաքական ու տնտեսական համակարգով, իր հարաբերություններով, ընդունակ չէ ուրիշ ճանապարհների վրա լուծում որոնել, որովհետև, ի վերջո, հասկանալի է, որ Հայաստանն անիմաստ զիջողական քաղաքականություն չի որդեգրելու»,- հայտարարեց ՀՅԴ խմբակցության ղեկավար Վահան Հովհաննիսյանը:

Վ. Հովհաննիսյանի խոսքերով, նախ պետք է հստակ պատասխան տրվի Լևոն Տեր-Պետրոսյանին ու նրա պես մտածողներին, ովքեր ինչպես 15 տարի առաջ, այնպես էլ հիմա, ասում էին` «Սերգո ջան, ախպեր ջան, լավ չես ապրի, մինչև չզիջենք, չտանք ու չպրծնենք Ղարաբաղի գլխացավանքից»:

«Նույն բանն ասում են այսօր, ով մի փոքր քաղաքական հասունություն ունի և հիշում է այն ժամանակվա Լևոն Տեր-Պետրոսյանի ելույթները, հասկանում է, որ ասվածը բացարձակապես նույնն է, նրա համար ոչինչ չի փոխվել. չպետք է մոռանալ, որ այդ տրամադրությունները նրա մոտ էին և’ 1991, և’ 1992, և’ 1993, և’ 1994 թ-ին, երբ կնքվեց զինադադարի պայմանագիրը, երբ հաղթական Հայկական բանակը և Ղարաբաղի ինքնապաշտպանության ուժերը, հաղթելով, պարտադրեցին խաղաղություն, և Ադրբեջանն էր այն ժամանակ միջնորդներ որոնում, որ այդ զինադադարը կնքի»,- մանրամասնեց Վ. Հովհաննիսյանն ու հավելեց. «Ահա այդ ժամանակ, եթե Լևոն Տեր-Պետրոսյանի և շատերի տրամադրություններն այսպիսին չլինեին, զինադադարի տեսքն էլ ուրիշ կլիներ, և, միգուցե, արդեն ամեն ինչ ավարտված լիներ, որովհետև զինադադրի պահին մենք կարող էինք շատ ավելին ստանալ, եթե տրամադրված լինեինք վերջնական հաղթանակի»:

Պատգամավորի դիտարկմամբ` հենց այդ պատճառով էլ հետագա բոլոր բանակցություններն ընթացել են սխալ ուղով: Միևնույն ժամանակ, նա համոզված է, որ այդ հանգամանքը չի արդարացնում հետագա բանակցություները վարողներին, որովհետև վերջիններս պետք է գոնե փորձ անեին այդ ուղղությունից դուրս գալու, մինչդեռ «մեր վզին փաթաթվեց քաղաքական ոլորտում հարցը լուծելու եղանակը, այնինչ` հարցն ամբողջությամբ իրավական էր»:

«Եվ հիմա, երբ մեր իշխանությունները փորձ են անում վերադառանալու դրան` ասելով, որ կան ուրիշ ճանապարհներ, պետք է նախ և առաջ վերագնահատել ամբողջ ճանապարը, որպեսզի հնարավոր լինի սխալները շտկել»,- ամփոփելով իր խոսքը` ընդգծեց Վ. Հովհաննիսյանը:

23.07.2010, 15:17

Aysor.am

Ոչ թե Հայաստանը, այլ Ադրբեջանը պետք է դիմի միջազգային դատարան

«Հայաստանն ինքը չպետք է դիմի Հաագայի դատարան»,- հայտարարեց ՀՅԴ խմբակցության ղեկավար Վահան Հովհաննիսյանը, ով լրագրողների հետ հադնիպման ժամանակ անդրադառնալով Հաագայի Արդարդատության միջազգային դատարանի` Կոսովոյի անկախության օրինականության վերաբերյալ վճռին, բացատրեց, որ Կոսովոյի դեպքում դատարան դիմողը Սերբիան էր, և եթե զուգահեռներ անցկացնենք, ուրեմն` Արցախի պարագայում` պետք է միջազգային դատարան դիմի Ադրբեջանը:

«Ադրբեջանը, սակայն, այդ քայլին չի գնում ու չի գնա երբեք, որովհետև ուրիշ միջոցներով Լեռնային Ղարբաղը և նրա շուրջ գնվող ազատագրված տարածքները վերադարձնելու ծրագիր ունի»,- ընդգծեց Վ. Հովհաննիսյանը:

Ինչ վերաբերում է Սերբիային, ապա, պատգամավորի կարծիքով, Սերբիան էլ չէր գնա այդ քայլին, բայց երբ 60-ից ավելի երկրներ ճանաչել էին Կոսովոյի անկախությունը, Սերբիան ուրիշ ելք չուներ, քան դատարան գնալը:

«Այդ առումով Հայաստանը միջազգային դատարան գնալու պատճառ չունի»,- եզրափակեց Վ. Հովհաննիսյանը:

23.07.2010, 14:29

Aysor.am

«Նոր գործիք»` Արցախի Հանրապետության միջազգային ճանաչման համար

Հաագայի Արդարադատության միջազգային դատարանի վճիռը` Կոսովոյի անկախությունն օրիանական ճանաչելու վերաբերյալ, ՀՅԴ խմբակցության ղեկավար Վահան Հովհաննիսյանը ողջունելի համարեց` մեր ազգային ու համաշխարհաին շահի տեսանկյունից, որովհետև «վճռի մեջ հստակ ասված է, որ ինքնուրույն ու միակողմանի կերպով անկախություն հայտարարելը չի կարող դիտվել անօրինական»:

«Անկախություն հայտարարելն օրինական է, ուրեմն` օրինական է բոլորի համար: Դրա համար, իհարկե, պետք է նախադրյալներ լինեն, իսկ այդ նախադրյալները Արցախն ապահովել է եթե ոչ ավելի, քան Կոսովոն, ապա առնվազն` Կոսովոյից ոչ պակաս»,- հայտարարեց Վ. Հովհաննիսյանն ու հավելեց. «Մենք հիմա ստանում ենք նոր գործիք ու նոր հարավորություն` պայքարելու ԼՂՀ միջազգային ճանաչման համար»:

Միևնույն ժամանակ Վ. Հովհաննիսյանն անդրադարձավ վճռի հրապարակումից առաջ դրա շուրջ ստեղծված «խաղերին, որոնք մտահոգիչ են»:

«Երբ մի գերտերություն` ԱՄՆ-ը, ասում է, որ անկախ այդ վճռից, ես ողջունելու եմ Կոսովոյի անկախությունը, սա արդեն մտահոգիչ է, այդ դեպքում նշանակում է, որ դատական միջամտությունները միջազգային մակարդակի վրա այլևս արժեզրկվում են»,- մանրամասնեց Վ. Հովհաննիսյանն ու ընդգծեց. «ԱՄՆ-ի հայտարարությունը անհեթեթություն է, ճիշտ մոտեցում չէ, քանի որ այսպես խարխլվում են միջազգային իրավունքի հիմքերը: Սա նշանակում է, որ միջազգային իրավունքի տակ ռումբ է դրվում»:

23.07.2010, 14:22

Aysor.am

«Ոսկե ծիրանը» նշում է Ա. Յավուրյանի 75-ամյակը

«Ոսկե ծիրան» միջազգային 7-րդ կինոփառատոնի շրջանակներում նշվում է օպերատոր Ալբերտ Յավուրյանի 75-ամյակը: Միջոցառմանը ներկա են կինոգործիչներ, որոնցից շատերն աշխատել ու ապրել են Ա. Յավուրյանի կողքին, ինչպես նաև` օպերատորի կինն ու նրա ուսանողները:

Ուսանողական տարիներին համալսարանական թերթում առիթ ունեցանք շնորհավորել Խ. Աբովյանի անվան ՀՊՄՀ-ի Հեռուստատեսության և կինոյի ամբիոնի վարիչի Ա. Յավուրյանի 70-ամյակը, որն օպերատորը նշեց ուսանողադասախոսական կազմի հետ: Երբ այս առիթով զրուցեցինք Ա. Յավուրյանի հետ, նա պատմեց, որ իր ծննդյան օրը միշտ փոփոխական է եղել:

Օպերատորը ծննդյան օրվա փոփոխական լինելը կապում էր մոր միամտության հետ, ում համար տարօրինակ է եղել, որ որդին ծնվել է ոչ թե 9 ամիս տևած հղիությունից հետո, այլ` 8 ամիս: Այդ պատճառով էլ օպերատորի ծննդյան օրը նշվում էր ինչպես հենց ծնվելու օրը, այնպես էլ` հետագա մի ամսվա ընթացքում որևէ օր:

«Երբ պահարաններից մեկում հայտնաբերում էի մորս կողմից նախապես գնված ու թաքցված կոշիկը, այդ օրն էլ համարվում էր իմ ծնունդը»,- ժպտալով պատմում էր օպերատորը, ով հիշում էր, որ իր մանկության տարիներին մեծ խնդիր էր նոր կոշիկ ունենալը, իսկ քանի որ ինքը ծնվել է աշնանը, ապա իր ծնունդին միշտ մոր կողմից` որպես նվեր կոշիկ էր ստանում:

Այսօր` Ա. Յավուրյանի ծննդյան օրը նշվում է նրա մասին հիշողությունների պահարանից պատմություններ հանելով ու նրա արվեստը վերագնահատելով: Այս առիթով «Ոսկե ծիրան» փառատոնը նախաձեռնել է նաև մեծանուն օպերատորի ու նրա ստեղծագործական ուղու մասին գրքի հրատարակությունը, որի շնորհանդեսը նույնպես տեղի է ունեցավ օպերատորի հոբելյանական հուշ երեկոյի ընթացքում:

Նշենք, որ միջոցառման ընթացքում ցուցադրվեց օպերատորի «Աշուղ Ղարիբ» ֆիլմը` ռեժիսոր` Սերգեյ Փարաջանով:

15.07.2010, 20:10

Aysor.am

Ռեժիսորը մարդկանց հետ շփվել կարողանում է կինոյի միջոցով

«Ոսկե ծիրան» միջազգային 7-րդ կինոփառատոնի երևանյան պրեմիերաներից է նաև լեհ կինոռեժիսոր Քշիշտոֆ Զանուսիի «Փոխայց» ֆիլմը, որն այս րոպեներին ցուցադրվում է «Մոսկվա» կինոթատրոնում:

Ֆիլմը պատմում է Զանուսիի` 70-ականների ֆիլմերի` «Ընտանեկան կյանքի» (1971), «Քողարկման» (1976), «Հաստատուն գործոնի» (1980) դերակատարների հետագա ճակատագրերի մասին: Ի՞նչ է կատարվել նրանց հետ: Որտե՞ղ են: Ինչպե՞ս են ապրել այն տասնամյակաների ընթացքում, որոնք մեզ բաժանում են այդ ժամանակներից: Ֆիլմը ձևով հարցազրույց է:

Մինչ ֆիլմի ցուցադրումը` լրագրողները հնարավորություն ունեցան հանդիպել ռեժիսորի հետ: Ռեժիսորի խոսքերով, անսպասելի, բայց տրամաբանական է իր` հայ ժողովրդի ու հայկական մշակույթի հետ ունեցած կապը:

«Ես ծագումով իտալացի եմ։ Իմ ծնողները Վենետիկից են, որտեղ հայկական համայնք կա։ Ես այնտեղ եղել եմ դեռ 70-ական թվականներին, հայերն ինձ հրավիրել են տեղի սփյուռքի հետ հանդիպման։ Նրանց հետաքրքիր էր, թե ինչպես է Լեհաստանում ապրում հայկական սփյուռքը»,- պատմեց ռեժիսորը:

Ռեժիսորը խոստովանեց նաև, որ մարդկանց հետ շփման դժվարությունն ու նրանց հասկանալու անկարողությունն է, ինչ-որ առումով, պատճառ դարձել, որպեսզի փորձի դա անել կինոարվեստի միջոցով:

«Կինոյի միջոցով դա կարող եմ լավ անել: Այսպես եմ շփվում, այլ ճանապարհ չգտա»,- ամփոփելով խոսքը` ընդգծեց Ք. Զանուսին:

15.07.2010, 18:10

Aysor.am

«Ոսկե ծիրան»-ի 3 առանձնահատկությունները

«Ոսկե ծիրան» միջազգային կինոփառատոնն ունի 3 կարևոր առանձնահատկություն, որով տարբերվում է մյուս միջազգային կինոփառատոններից և, որոնց շնորհիվ էլ տարեց տարի ընդլայնում է իր հյուրերի քանակն ու մասնակից երկրների աշխարհագրության ծավալները: Այս մասին լրագրողների հետ հանդիպման ժամանակ հայտարարեց փառատոնի տնօրեն Հարություն Խաչատրյանը:

«Առաջին առանձնահատկությունն այն է, որ փառատոնի աշխատակազմը չունի վատ վերաբերմունք ո’չ կինոյի, ո’չ հյուրի հանդեպ, այլ` բոլորը զարմանալի, ռոմանտիկ ու բարի մարդիկ են, ովքեր սիրահարված են կինոյին»,- նշեց Հ. Խաչատրյանը, ում համոզմամբ, հենց այս հատկանիշն է, որ գրավում է հյուրերին ու մասնակիցներին. «Նրանք զգում են, որ իրենց կինոյին հարգալից են վերաբերում»:

Մյուս կարևոր առանձնահատկությունն այն է, որ գործունեության 7 տարիների ընթացքում փառատոնը հստակեցրել է իր ուղղվածությունը: Հ. Խաչատրյանի խոսքերով, «փառատոնը հեղինակային կինոյի կենտրոն է»:

Երրորդ առանձնահատկությունը Հ. Խաչատրյանը բացատրեց հեղինակային կինոյի ընկալմամբ ու կինոսեր հասարակության ձևավորմամբ:

«Շատերը հիշում են, որ առաջին տարիներին փառատոնի ֆիլմերը դիտում էին 5-6 մարդ, սակայն հիմա ֆիլմեր կան, որ նույնիսկ նստելու տեղ չկա»,- ընդգծեց Հ. Խաչատրյանը, ով նշեց նաև, որ այս տարիների ընթացքում ձևավորվել է մի հանդիսատես, որը սիրում է փառատոնում ներկայացված ֆիլմերը և սպասում է փառատոնի մեկնարկին:

15.07.2010, 18:20

Aysor.am

Քաղաքապետի տված խոստումը հույսեր է առաջացրել

«Մեր ղեկավարները նույնպես սկսել են համոզվել, որ կինոն շատ կարևոր զենք է երկրի համար, շատ կարևոր է միջոց է` խոսելու մեր մասին, մեր ինքնության, մշակույթի ու թերությունների մասին»,- լրագրողների հետ հանդիպման ժամանակ նշեց «Ոսկե ծիրան» միջազգային կինոփառատոնի տնօրեն Հարություն Խաչատրյանը:

Հ. Խաչատրյանի համոզմամբ` կինոարվեստին շատ լուրջ ուշադրություն պետք է հատկացվի: Այս առիթով նա առանձնացրեց հատկապես կինոնախագծերի ֆինանսավորման խնդիրը, ինչի հետևանքով շատ ու շատ «հրաշալի նախագծեր այդպես էլ չեն հասնում հանդիսատեսին»:

Խոսելով «Ոսկե ծիրան» միջազգային կինոփառատոնի խնդիրներից` փառատոնի տնօրենը շեշտադրեց Երևանում կինոթատրոնների սակավության վրա: Նա նշեց, որ կինոթատրոնների սակավաթիվ լինելն ու տեխնիկական համապատասխան սարքավորումների բացակայությունը մեծ խնդիրներ են ստեղծում` փառատոնում ցանկալի ֆիլմերը ներկայացնելու համար:

«Մենք նաև տարածքի խնդիր ունենք. մենք չենք ցանկանում սեփական տարածք ունենալ, թող լինի պետական, ուղղակի մեզ տրվի երկարաժամկետ շահագործման պայմանով»,- նշեց Հ. Խաչտրյանը ու հույս հայտնեց, որ այս մասին Երևանի քաղաքապետի տված խոստումն իրականություն կդառնա:

15.07.2010, 15:13

Aysor.am

Աշխարհի հայերը ստեղծելու են կինոմատոգրաֆիստների ասոցիացիա

Աշխարհով մեկ սփռված սփյուռքահայ ռեժիսորները շատ հաճախ իրենց ինքնությունն են մոռանում, փոխում են անուն ու ազգանուն, ինչպես նաև ազգություն, որպեսզի ֆիլմ նկարահանելու համար օգնություն ստանան այս կամ այն կառույցից: Այս մասին այսօր իր մտահոգությունը հայտնեց «Ոսկե ծիրան» միջազգաին կինոփառատոնի ռեժիսոր Հարություն Խաչատրյանը, ով լրագրողներին տեղեկացրեց, որ այդ խնդիրը լուծելուն է ուղղված Աշխարհի հայ կինոմատոգրաֆիստների ասոցիացիա ստեղծելու գաղափարը:

«Ալան Թերզյանի կողմից առաջարկություն եղավ` ստեղծելու Աշխարհի հայ կինոմատոգրաֆիստների ասոցիացիա և այսօր երեկոյան հրավիրել ենք բոլոր սփյուռքահայերին` քննարկելու առաջարկը»,- նշեց Հ. Խաչատրյանն ու հավելեց. «Այսօր դրվելու է Աշխարհի հայ կինոմատոգրաֆիստների ասոցիացիայի հիմքը, որպեսզի ամեն մի հայ, ով ապրում է արտերկրում, ամեն մի հայ, ով ունի օգնության կարիք, իրեն միայնակ չզգա. զգա, որ կա մի հավաքական ուժ, որը պատրաստ է իրեն օգնել` ընթանալու այս բարդ ճանապարհով»:

Ասոցիացիայի նպատակը, ըստ Հ. Խաչատրյանի, պետք է լինի այն, որ այսուհետ հայերը ոչ թե խուսափեն իրեն ինքությունից` հաջողության հասնելու համար, այլ` հայերի համար շատ ձեռնտու լինի իրենց հայ լինելը, հայկական անունը պահելը, հայ կինոմատոգրաֆիստ լինելը, հայկական կինո ստեղծելը:

Ասոցիացիայի կենտրոնը, Հ. Խաչատրյանի խոսքերով, կլինի Հայատանում, իսկ տարբեր երկրներում հայտնի հայ ռեժիսորները կգլխավորեն այդ երկրում գործող ասոցիացիայի մասնաճյուղերը: Նրա պատկերացմամբ` ասոցիացիան նախ կգործի հիմնադիր անդամների միջոցներով ու կապերով, այնուհետև պետք է ստանա պետական և մասնավոր աջակցություն:

15.07.2010, 14:05

Aysor.am

«Error»-ի ռեժիսորն իր ասելիքն հայտնում է առանց խոսքերի

«Երբեմն խոսքերը քանդում են այն ամենը, ինչ ուզում ես ցույց տալ, խանգարում տեղ հասցնել քո ասելիքը, իսկ երբ ամեն ինչ նայում ես ու փորձում ես հասկանալ զգալով, ապա դա խոսքերից առավել է»,- երիտասարդ ռեժիսոր Դավիթ Էնֆենջյան Aysor-ի հետ զրույցում այսպես բացատրեց իր «Error» ֆիլմն առանց խոսքի նկարելու նպատակը:

Տեղեկացնենք, որ Դ. Էնֆենջյանի «Error» կարճամետրաժ ֆիլմը ներառված է «Ոսկե ծիրան» միջազգային 7-րդ կինոփառատոնի «Հայկական համայնապատկեր» մրցութային ծրագրում: Ռեժիսորն առաջին տարին չէ, որ մասնակցում է փառատոնին. անցած տարի նրա «Վթար» ֆիլմը ևս ցուցադրվել է փառատոնի շրջանակներում:

Ֆիլմը առաջին անգամ ցուցադրվում է Հայաստանում, այն չի մասնակցել որևէ այլ փառատոնի և չի ցուցադրվել արտերկրում, ինչը ռեժիսորի ցանկությունն է: Նրա խոսքերով` հայաստանյան պրեմիերայից հետո միայն այն կներկայացվի տարբեր երկրներում անցկացվող կարճամետրաժ ֆիլմերի փառատոներին:

«Ֆիլմն էքսպերիմենտալ է և, անկեղծ ասած, ես ունեմ կարծիքների կարիք»,- նշեց Դ. Էնֆենջյանն ու հավելեց, որ իր կարծիքով` փառատոնները հենց նրա համար են, որ երիտասարդ ռեժիսորները հասկական, թե ինչ ուղղությամբ են շարժվում, լսեն տարբեր կարծիքներ և կողմնորոշվեն իրենց ընտրության ու հետագա աշխատաոճի առումով:

Երիտասարադ հերոսի սիրո, աշխարհի հետ ունեցած հակասությունների ու պայքարի մասին պատմող ֆիլմը կարող եք դիտել նաև հուլիսի 15-ն, ժ. 17:00-ին` «Մոսկվա» կինոթատրոնի փոքր դահլիճում:

14.07.2010, 12:28

Aysor.am

«Մաեստրո». պայքար ներսի ու դրսի խաղաղության համար

«Այս ֆիլմի կարևոր ասելիքն այն է, որ մարդը երջանիկ է, երբ նրա դուրսն ու ներսը խաղաղ է»,- այսպես ներկայացրեց իր «Մաեստրո» ֆիլմը ռեժիսոր Վիգեն Չալդրանյանը նախօրեին:

Տեղեկացնենք, որ «Մաեստրո» ֆիլմը «Ոսկե ծիրան» միջազգային 7-րդ փառատոնում ներկայացված է «Հայկական համայնապատկեր» և «Միջազգային խաղարկային» մրցույթների ծրագրում: Այն ռեժիսորի վերջին ֆիլմն է, որի երևանյան պրեմիերան տեղի է ունեցել նախորդ տարվա հոկտեմբերին:

Նախքան ՀՀ նախագահի կողմից «Մովսես խորենացու» անվան հուշամեդալ ստանալը` ֆիլմի գլխավոր դերակատարը` Մաեստրոն, խաղաղ էր ապրում դրսի աշխարհի ու իր ներսի` հոգևոր աշխարհի հետ: Սակայն այդ օրվաից հետո կարծես ամեն ինչ փոխվում է. դրսում աղմուկում ու նրան դավաճան արվեստագետ են անվանում ցուցարարները, աշխատանքի վայրում ծաղրում են ու համարում միջակություն, կնոջ հետ հարաբերություններում ծնվում է կասկածը, իսկ հոգին չի կարողանում խաղաղություն գտնել նույնիսկ մենակության ժամանակ:

Մաեստրո Ա. Տիգրանյանի հոգու բախումը դրսի ու ներսի աշխարհների հետ, ինչպես նաև քաղաքում տեղի ունեցող իրադարձությունները` 2008 թ-ի հետընտրական զարգացումներն են ընկած ֆիլմի հիմքում: Ռեժիսորը հարցերի պատասխաններ չի տալիս` ամեն ինչ թողնելով հանդիսատեսի գնահատականին:

Ֆիլմի ցուցադրությունն անցավ լեփ-լեցուն դահլիճում. այն դիտելու էին եկել հարյուրավոր կինոսիրողներ ու արվեստի տարբեր ոլորտների ներկայացուցիչներ: Հայտնենք, որ «Ոսկե ծիրան» կինոփառատոնի շրջանակներում ֆիլմը կցուցադրվի նաև հուլիսի 15-ին, ժ. 11:30-ին` «Մոսկվա» կինոթատրոնում:

14.07.2010, 11:46

Aysor.am

Ֆ. Աքինի. Թուրքիայում «վախից դրդված շատ հոգիներ են խժռվել»

Ազգությամբ թուրք, բայց իրեն գերմանացի համարող ռեժիսոր Ֆաթիհ Աքինի «Հոգու խոհանոց» ֆիլմի երևանյան պրեմիերան տեղի ունեցավ նախօրեին «Մոսկվա» կինոթատրոնում: Դիտումն անցավ լեփ-լեցուն դահլիճում. շատերը ֆիլմը դիտում էին գետնին նստած:

Նշենք, որ ռեժիսորի խոսքերով` սա իր միակ ֆիլմն է, որը չի պատմում իր հայրենիքի` Թուրքիայի մասին: Այս ֆիլմը մի ռեստորանատերի մասին է, ում ընկերուհին, աշխատանքի հրավեր ստանալով, լքում է իրեն: Ռեստորանատերը նախ որոշում է վաճառել ռեստորանը և հետևել ընկերուհուն, ապա դեպքերի զարգացումով պայմանավորված` ամեն ինչ անում է, որպեսզի այն պահպանի:

Նշենք, որ ֆիլմի ցուցադրումից առաջ լրագրողները առիթ ունեցան հանդիպելու Ֆ. Աքինի հետ: Հայ-թուրքական դարավոր խնդիրների մասին տեղյակ ռեժիսորը վստահ է, որ երկու ժողովուրդների միջև հարաբերությունները կնորմանանան, երբ «հաղթահարվի ճշմարտությանն ուղիղ նայելու վախը»: Ըստ նրա` «արվեստը կարող է բռնել մարդու ձեռքը ու տանել ճշմարտության մութ սենյակներով»:

«Իմ հայրենիքում վախից դրդված շատ հոգիներ են խժռվել: Չգիտեմ, ես խոսում եմ որպես հայր, թե որպես մարդ, բայց հուսով եմ, որ մենք այդ վախը կհաղթահարենք և խնդիրները կլուծվեն, ու հուսով եմ, որ ես էլ այդ կտեսնեմ»,- բացատրեց ռեժիսորը:

Տեղեկացնենք, որ «Հոգու խոհանոց» ֆիլմը Վենետիկի միջազգային կինոփառատոնի ժյուրիի հատուկ մրցանակի ու «Երիտասարդ կինո» մրցանակի, ինչպես և Համբուրգի կինոփառատոնի «Բարձրարվեստ կինո» մրցանակի դափնեկիր է: Այն կարող եք դիտել նաև հուլիսի 15-ին, 19:00-ին` «Նաիրի» կինոթատրոնում:

14.07.2010, 11:33

Aysor.am

Ժամանակակից աշուղները` համերգային ծրագրով

Ժամանակակից աշուղների արվեստին երաժշտասերները կարող են ունկնդիր դառնալ հուլիսի 1-ին Արամ Խաչատրյանի անվան համերգասրահում: Ինչպես լրագրողների հետ հանդիպման ժամանակ հայտնեց համերգի կազմակերպիչ, «Սայաթ-Նովա» աշուղական երգի անսամբլի գեղարվեստական ղեկավար, երգիչ Թովմաս Պողոսյանը` համերգը կրում է «Մեր ժամանակի աշուղները» խորագիրը:

Տեղեկացնենք, որ համերգն իրականացվում է ՀՀ մշակույթի նախարարության և «Սայաթ-Նովա» մշակութային միության կողմից: Ժամանակակից հայ աշուղների մասնակցությամբ տեղի ունեցող համերգի գործիքային մասի ղեկավարն է ՀՀ վաստակավոր արտիստ, կոմպոզիտոր Արտեմ Խաչատուրը:

«Եթե դուք գաք համերգասրահ, կհամոզվեք, թե ինչ մղումներով են մարդիկ գալիս, դահլիճները լեցո՞ւն են, թե՞ դատարկ»,- հակադարձեց Թ. Պողոսյանը` ի պատասխան այն հարցին, թե արդյո՞ք հասարակության մեջ մեծ է պահանջը աշուղական արվեստի նկատմամբ:

Թ. Պողոսյանը համոզված է, որ հայ հասարակությունը կարիք ունի աշուղական արվեստի, սակայն համերգներ կազմակերպելու և աշուղական արվեստը լայն շրջանակներին հասու դարձնելու համար անհրաժեշտ է պետական ու մշակութային քաղաքականություն:

«19-րդ դարի վերջերին արդեն խոսում էին այն մասին, որ Ջիվանին վերջին հայ աշուղն է, 20-րդ դարասկզբին ասում էին` Շերամով փակվում է հայ աշուղական արվեստի գիրքը, սակայն 20-րդ դարասկզբին մենք ունեցանք 3 հսկաներ` Հավասի, Աշոտ, Շահեն և բազմաթիվ այլ տաղանդավոր աշուղներ, չնայած նորից հայտնվեցին մարդիկ, ովքեր կարծում էին, որ աշուղական արվեստն իր դարն ապրեց և ավարտվում է Հավասիով, Աշոտով ու Շահենով»,- խոսելով աշուղական արվեստի հետագա զարգացմն հնարավորությունների մասին` պատմեց Թ. Պողոսյանն ու հավելեց. «Ինչպես մեր ժողովուրդը տեղյակ է, այսօր էլ ունենք աշուղներ, որոնց երգերը սիրված ու ճանաչված են և ունենք երիտասարդ սերնդի աշուղներ, որոնք հայ աշուղական արվեստի վաղվա օրն են»:

Այս առիթով երգիչը նշեց նաև, որ, օրինակ, Ջիվանու անվան աշուղական դպրոցում սովորում է 200 հոգի:

26.06.2010, 15:37

Aysor.am

Թ. Պողոսյան. Աշուղական արվեստը հոգածության կարիք ունի

«Պետք է պետական լուրջ հոգածություն լինի ազգային աշուղական արվեստի և բոլոր ժանրների նկատմամբ: Այդ ուշադրությունը պետք է լինի համամասնորեն, ոչ թե ծանրանա որևէ տեսակի կամ որևէ ժանրի վրա, ինչպես այսօր է»,- կարծում է «Սայաթ-Նովա» աշուղական երգի անսամբլի գեղարվեստական ղեկավար, երգիչ Թովմաս Պողոսյանը:

Նրա խոսքերով, այսօր ուշադրությունը հիմնակաում ծանրացել է թեթև, էժան վաճառվող ապրանքների վրա, որը ոչինչ չի տալիս մեր մշակույթին և փրփուրի արժեք ունի:

Երաժշտական արվեստի մեջ մնայուն ու հավերժ արժեքներ համարելով Սայաթ-Նովային ու Կոմիտասին` Թ. Պողոսյանը նշեց, որ աշուղական արվեստը պահպանելու համար 1970 թ-ից սկսած բանահավաքչությամբ է զբաղվում:

«Այսօր երբ ունենք աշուղների միություն, ունենք նաև աշուղագիտական կենտրոն, որտեղ զբաղվում են ժամանակակից աշուղների ստեղծագործությունները գրանցելով, վերծանելով, արխիվավորելով և հրատարակելով»,- մանրամասնեց Թ. Պողոսյանը:

Երգչի տեղեկացմամբ` միությունը հասցրել է թողարկել մի քանի աշուղների ժողովածուներ, միևնույն ժամանակ ունի մի քանի լուրջ և արժեքավոր ծրագրեր: Նա նշեց, որ նախատեսվող ծրագրերն ի վիճակի են լինում կյանքի կոչել բարերարների աջակցությունների շնորհիվ, այն դեպքում, երբ կցանկանային, որ այդ ամենն արվեր պետական աջակցությամբ:

26.06.2010, 16:25

Aysor.am

«Ոսկե ծիրանի» ֆիլմերը` հասանելի բոլորի համար

Այս տարի նախորդ տարվա նման «Ոսկե ծիրան» միջազգային 7-րդ փառատոնի շրջանակներում ցուցադրվող ֆիլմերը հասանելի կլինեն կինոսերներին ընդամենը 300 դրամ արժողությամբ տոմսերով: Այս մասին ի պատասխան Aysor-ի հարցին հայտնեց փառատոնի ծրագրերի տնօրեն Միքայել Ստամբոլցյանը:

«Ավելին, մենք նախատեսում ենք նաև լրացուցիչ ցուցադրություն կազմակերպել այն ֆիլմերի համար, որոնց մուտքը հրավիրատոմսերով է լինելու»,- մանրամասնեց Մ. Ստամբոլցյանը:

Հիշեցնենք, որ անցած տարի շատերին չէր հաջողվում դիտել հրավիրատոմսերով ցուցադրվող ֆիմերը, ավելին` շատերը կինոդահլիճ հասնելուն պես էին բացահայտում, որ իրենց ցանկացած ֆիլմի համար տոմսեր չեն վաճառվում:

Հենց այս խնդիրը լուծելու համար է փառատոնը լրացուցիչ ցուցադրություն է կազմակերպում: Մ. Ստամբուլցյանը նշեց նաև, որ բոլոր այն հրավիրատոմսով ֆիլմերի համար, որոնք չի հաջողվի ցուցադրել ևս մեկ անգամ, կվաճառվեն նաև տոմսեր, որպեսզի «դահլիճի կեսը լինի հրավիրատոմսերով, կեսն էլ` տոմսերով»:

Նշենք նաև, որ «Ոսկե ծիրան» կինոփառատոնի գլխավոր հովանավորն է «ՎիվաՍել-ՄՏՍ» ընկերությունը:

26.06.2010, 12:06

Aysor.am

«30 տարի ու 3 օր» և «Մեծ տոն» ֆիլմերի պրեմիերաները` մեկ տեղում

Այսօր հանդիսատեսի դատին է ներկացվում Վահե և Ստեփան Գևորգյանցների «30 տարի և 3 օր» և «Մեծ տոն» ֆիլմերը, որոնց պրեմիրան տեղի է ունենում «Մոսկվա» կինոթատրոնում:

Տեղեկացնենք, որ երկու ֆիլմերի սցենարների հեղինակը հայտնի ռեժիսոր Գևորգ Գևորգյանցն է` ռեժիսորների հայրը:

«Ֆիլմերից մեկը Արցախյան պատերազմի մասին է, գլխավոր հերոսները երեխաներ են` հայ և ադրբեջանցի, մյուս ֆիլմը` մի հայի մասին է, ով 30 տարի չի եղել Հայաստանում և 3 օրով եկել է, որ ծնողների աճյունը տեղափոխի Ամերիկա»,- մանրամասնեց Գևորգ Գևորգյանցը:

Անդրադառնալով «Մեծ տոն» ֆիլմին` Գ. Գևորգյանցը նշեց` «պատերազմի ժամանակ զոհվել է մոտ 1800 երեխա, բայց երեխաները մեղք չունենա, որ պատերազմ է. ֆիլմում պատերազմը ներկայացվում է երեխաների աչքերով»: Նա նշեց, որ այս ֆիլմը արդեն 4 միջազգային փառատոնների մասնակցելու հրավեր է ստացել:

«Միշտ էլ ապագա սերնդից է ամեն ինչ կախված: Ես համոզված եմ, որ եթե Ադրբեջանի ղեկավարությունը խելամիտ լինի, կհասկանա, որ դե ֆակտո կայացել է այն, որ ազատագրված հողերը երբեք չեն պատկանելու ադրբեջանցիներին, իրենք պետք է ուղղակի իրենց ժողովրդին ճշմարտությունն ասեն»,- ամփոփելով իր խոսքը` ընդգծեց Գ. Գևորգյանցը:

Տեղեկացնենք, որ ֆիլմերի պրեմիերային ներկա էին հայտնի արվեստագետներ ու հասարակական գործիչներ, այդ թվում` ԱԻՄ նախագահ Պարույր Հայրիկյանը,Կամերային թատրոնի գեղարվեստական ղեկավար Արա Երնջակյանը, Նկարիչների միության նախագահ Կարեն Աղամյանը, դերասան Ռաֆայել Քոթանջյանը, «Էրեբունի» արգելոց-թանգարանի տնօրեն Դավիթ Մուրադյանը, կինոգետ Մելիք Կարապետյանը և այլք:

25.06.2010, 20:40

Aysor.am

Նորաոճ ծրագրեր` «Ոսկե ծիրան» կինոփառատոնի շրջանակներում

«Ինչպես ամեն տարի, այս տարի ևս «Ոսկե ծիրան» միջազգային փառատոնի մեկնարկը տրվելու է ծիրանի օրհնությամբ, որն այս տարի անցկացվելու է Ս. Զորավոր եկեղեցում` հունիսի 11-ին` 15:00-ին»,- հայտնեց «Ոսկե ծիրան» միջազգային 7-րդ կինոփառատոնի միջոցառումների կազմակերպիչ Վարդան Հակոբյանը:

Վ. Հակոբյանը նշեց, որ 11-ի երեկոյան` ժ. 19:00-ից ակսած «Մոսկվա» կինոթատրոնի հարակից Շարլ Ազնավուրի հրապարակում կկազմակերպվի փոքրիկ համերգային ծրագիր, որին կհաջորդի փառատոնի պաշտոնական բացումը:

«Այս տարի մենք ունենք այն, ինչ վաղուց ցանկանում էինք ունենալ. այս տարի մենք նախատեսում ենք կինոերաժշտության ջազ փառատոն, որը փառատոնի օրերին երեկոյան ժամերին կհնչի Շարլ Ազնավուրի անվան հրապարակում»,- տեղեկացրեց Վ. Հակոբյանը:

Փառատոնի շրջանակներում ջազ փառատոնի անցկացման կազմակերպիչը կլինի ջազմեն Լևոն Մալխասյանը: Ծրագիրը մրցութային ձևաչաթում է իրականացվելու և փառատոնի ավարտին ընտրվելու են լավագույն կատարողները:

Վ. Հակոբյանը հայտնեց նաև, որ այժմ բանակցություններ են ընթանում ևս երկու նորաոճ ծրագրերի իրականացման ուղղությամբ: Այսպես` փառատոնը նախատեսում է փառատոնի օրերին երեկոյան ուշ ժամերի` սկսած 23:00-ից, ֆիլմերի բացօթյա ցուցադրություններ կազմակերպել Երևանի Սիրահարների այգում: Բացի այդ` նախատեսվում են նաև ակումբային ցուցադրություններ, որոնք, հավանաբար, կիրականացվեն Ուլիխանյան ակումբում:

Տեղեկացնենք նաև, որ այս տարի փառատոնի շրջանակներում իրականացվող հետահայաց ցուցադրությունների ծրագիրը տեղի կունենա Ա. Բաբաջանյանի անվան ֆիլհարմոնիկ համերգասրահում: Այստեղ կանցկացվեն նաև ռեժիսոր Հենրիկ Մալյանի 85 և օպերատոր Ալբերդ Յավուրյանի 75-ամյակներին նվիրված միջոցառումները, փառատոնի հյուրերի հետ հանդիպումները, ինչպես նաև` վարպետության դասերը:

25.06.2010, 19:45

Aysor.am

«Ոսկե ծիրանի» հյուրերից է «Մայրիկ» ֆիլմի գլխավոր դերակատարուհին

Այս տարի «Ոսկե ծիրան» միջազգային 7-րդ կինոփառատոնը հարուստ է հետհայաց ցուցադրությունների ծրագրերով: Այս մասին լրագրողների հետ հանդիպման ժամանակ հայտնեց փառատոնի միջազգային բաժնի ղեկավար Տաթևիկ Մանուկյանը:

«Մեզ մոտ մեծ ոգևորություն է առաջացրել ֆրանսահայ հայտնի կինոռեժիսոր Անրի Վերնոյին նվիրված հետահայաց ցուցադրություների ծրագիրը, ում «Մայրիկ» ֆիլմով է տեղի ունենալու այս տարվա փառատոնի բացումը»,- հայտնեց Տ. Մանուկյանը, ով տեղեկացրեց, որ այս առիթով փառատոնն անակնկալ ունի` ներկա կլինի և ռեժիսորի ֆիլմերը կներկայացնի Անրի Վերնոյի որդին` Պատրիկ Մալաքյանը, ինչպես նաև` փառատոնի պատվավոր հյուրերի շարքում կլինի «Մայրիկ» ֆիլմի գլխավոր դերակատարուհի` Կլաուդիա Կարդինալեն:

Կլաուդիա Կարդինալեն փառատոնի կողմից կստանա մրցանակ` կինոարվեստում ցուցաբերած վաստակի համար, բացի այդ` տեղի կունենա հանդիպում-քննարկում դերասանուհու հետ:

Ինչ վերաբերում է ֆիլմերի հետհայց ցուցադրությանը, ապա նշենք, որ ծրագրի շրջանակներում ցուցադրվելու են Ա. Վերնոյի «Կովը և գերին», «Սարսափ քաղաքում» և «Աննշան մարդիկ» ֆիլմերը: Եվս 2 ֆիլմ ցուցադրելու համար դեռևս բանակցություններ են ընթանում:

Այս տարի փառատոնի շրջանակներում նշվելու է փառատոնի նախագահ Ատոմ Էգոյանի 50-ամյակը, ինչի կապակցությամբ էլ տեղի է ունենալու ռեժիսորի «Հարազատներ», «Ընտանեկան դիտում», «Օրացույց», «Էկզոտիկա», «Ֆելիսիայի ուղևորությունը», «Լուսավոր գալիք» և «Ապահովագրական գործակալը» ֆիլմերի ցուցադրությունը:

Փառատոնի շրջանակներում տեղի կունենան նաև ռեժիսորներ Թեոդորոս Անգելոպուլոսի, Ֆրիդրիք Թորի, Ֆրիդրիքսոնի, Քլեր Դընիի և Ֆաթիհ Աքինի ֆիլմերի հետահայաց ցուցադրությունները:

25.06.2010, 19:39

Aysor.am

«Իտալացին յալվա՞ր է` գա Հայաստանում միջպետական դպրոց ստեղծի»

«Օրինաց երկիր» կուսակցությունն ի սկզբանե կողմ է եղել այլընտրանքային կամ օտրալեզու դպրոցներ հիմնելու նախաձեռնությանը: Այս մասին լրագրողների հետ հանդիպման ժամանակ հայտնեց կուսակցության ղեկավար, Ազգային անվտանգության խորհրդի քարտուղար Արթուր Բաղդասարյանը, ով նշեց նաև, որ կուսակցությունը դեռևս 2005 թ-ին հանդես է եկել օրենսդրական նախաձեռնությամբ` միտված դպրոցներում օտար լեզվի դասավանդման որակի ու մակարդակի բարձրացմանը` հենց առաջին դասարանից, որը չի ընդունվել:

«Մենք գտնում ենք, որ որքան հանրակրթության մեջ օտար լեզվի դասավանդման որակը բարձրացվի, այնքան շահելու են մեր երեխաները, և չենք ընդունում այն պարզամիտ շահարկումները, թե օտար լեզվի ուսուցումը կատարվելու է մայրենիի հաշվին. մայրենին` մայրենիի տեղն ունի, օտար լեզուն` օտար լեզվի»,- մանրամասնեց Ա. Բաղդասրայանն ու իր տեսակետը հիմնավորեց նրանով, որ զարգացած երկրների քաղաքացիները տիրապետում են միաժամանակ մի քանի օտար լեզվի` փայլուն իմանալով իրենց մայրենին:

ԱԱԽ քարտուղարը նկատեց, որ հարցը արհեստական շահարկումների և քննարկումների արժանացավ: Նա նշեց, որ ՕԵԿ-ը գտնում է` «1500-ից ավելի հանրակրթական դպրոցների կողքին 2 մասնավոր դպրոցների գոյությունը Հայաստանի ազգային ավտանգությանն ամենևին վտանգ չի սպառնում, մենք խոհեմ որոշում ենք կայացրել, մանավանդ, որ այդ դպրոցներում օտար լեզվով ուսուցումը կատարվելու է 7-րդ դասարանից»:

«Նախ, հայրենակիցներ, դուք պետք է գտնեք 9 կառավարություն, որոնք ցանկություն կունենան Հայաստանում միջպետական պայմանագրով դպրոց ստեղծել, գիտեք դա այդքան հե՞շտ է, իտալացին յալվա՞ր է` գա Հայաստանում միջպետական դպրոց ստեղծի, էլ դարդ ու ցավ չունի՞, ուրիշ երկիր չկա՞»,- հարցրեց Ա. Բաղդասարյանը, ով բացատրեց նաև, որ «խոսքը հնարավորություն տալու մասին է, որ մեր հայրենակիցն այդ հնարավորությունը գտնի այս երկրում, ոչ թե հարևան Վրաստանում, իսկ հնարավորություն տալը չի նշանակում դեմ գնալ ազգի անվտանգությանը»:

Ա. Բաղդասարյանի դիտարկմամբ` խնդրի վերաբերյալ կան 2 տեսակի խմբավորումներ` շահարկողներ և իրական մտահոգվածներ:

«Իմ ուղերձը իրապես մտահոգվածներին է ուղղված. չմտահոգվե'ք, հայրենակիցնե'ր, որովհետև 1500 դպրոցի կողքին 2 դպրոցը վնաս չէ, իսկ շահարկողներին ինչ էլ ասես, միևնույն է, շահարկելու են, Աստված իրենց հետ»,- ամփոփելով իր խոսքը` ասաց Ա. Բաղդասարյանը:

25.06.2010, 19:30

Aysor.am

Ա. Բաղդասարյան. Հայաստանը նույնպես կաջակցի Ղրղզստանին

«Հայաստանը` որպես ՀԱՊԿ-ի լիիրավ անդամներից մեկը, իր աջակցությունը կցուցաբերի Ղրղզստանին»,- հայտնեց Հայաստանի Ազգային անվտանգության խորհդրի քարտուղար Արթուր Բաղդասարյանը:

Ա. Բաղդասարյանը հիշեցրեց, որ մեկ շաբաթ առաջ տեղի է ունեցել ՀԱՊԿ անվտանգության խորհրդի արտահերթ նիստ, որտեղ Ղրղզստանին օժանդակություն ցուցաբերելու հետ կապված պայմանագիր է ստորագրվել անդամ պետությունների ներկայացուցիչների կողմից: Նա նշեց, որ ընդունվել է որոշում` բաղկացած շուրջ 9 կետերից, և Հայաստանը հավատարիմ է այդ որոշման դրույթներին:

Թե ինչ ծավալներով և ինչպիսի աջակցություն կտրամադրի Հայաստանը Ղրղզստանին, Ա. Բաղդասարյանի խոսքերով, առայժմ ուսումնասիրման փուլում է:

25.06.2010, 18:53

Aysor.am

Հայաստանը բարձրացնում է անվտանգության ապահովման մակարդակը

«Այսօր գլոբալացվող ու մրցակցող աշխարհում ազգերին և հասարակություններին հետաքրքրում են 3 հիմնական խնդիր` հատկապես ՀՀ-ին և մեր երկրի քաղաքացիներին` առաջինը` մարդկանց առողջությունն է, երկրորդը` մարդկանց անվտանգությունը և երրորդը` սոցիալական բարեկեցությունը»,- լրագրողների հետ հանդիպման ժամանակ հայտարարեց Հայաստանի Ազգային անվտանգության խորհրդի քարտուղար Արթուր Բաղդասարյանը:

Ա. Բաղդասարյանի խոսքերով, այս 3 խնդիրների ուղղությամբ լուրջ հայեցակարգեր են մշակվելու` ՀՀ ժողովրդագրական անվտանգության, պարենային անվտանգության, սոցիալական անվտանգության ուղղությամբ, որտեղ նախանշվելու են միջոցառումներ, որոնց իրականացումը կբարձրացնի համալիր անվտանգության իրավիճակը:

ԱԱԽ քարտուղարը հայտնեց նաև, որ այս տարի աշնանը Հայաստան-ՆԱՏՕ համագործակցության շրջանակներում արտակարգ իրավիճակների ոլորտում լինելու են խոշոր զինավարժություններ` «Արմենի 2010» անվանումով, որը ծրագրված միջոցառում է և միտված է արտակարգ իրավիճակների ոլորտում ՆԱՏՕ-ի չափանիշներին համապատասխան զինավարժություններ իրականացնելուն և այս ոլորտում համագործակցությունը խորացնելուն:

«Խոսք է գնում, թե Հայաստանը լայն դիվերսիկացված քաղաքականություն է իրականացնում, և երբ հարցնում են, թե չի՞ խանգարում համագործակցությունը ՀԱՊԿ-ի հետ` ՆԱՏՕ-ի հետ ունեցած համագործակցությանը, ես պատասխանում եմ` ՀԱՊԿ-ի հետ մենք ռազմաքաղաքական դաշինքի անդամ ենք, իսկ ՆԱՏՕ-ի դեպքում` մենք իրականացնում ենք գործընկերային խորացված համագործակցություն, որը նույնպես մեր անվտանգության համակարգի բաղկացուցիչ տարրերից է, այսինքն` բարեկամի հետ` բարեկամություն, հարևանի հետ` հարևանություն»,- ամփոփելով իր խոսքը` հայտնեց Ա. Բաղդասարյանը:

25.06.2010, 18:13

Aysor.am

«Հայաստանը պատրաստ է զարգացման ցանկացած սցենարի»

«Ժողովրդական առածը չպետք է մոռանանք` «Խաղություն ես ուզում, պատերազմին պատրաստ եղիր». մենք այսօր պատրաստ ենք զարգացման ցանկացած սցենարի, բայց ես չեմ պաշտպանում մեր հասարակության մեջ տարածվող այն արհեստական ասեկոսներն ու լուրերը, թե շուտով պատերազմ է լինելու, ընդհակառակը` ես դատապարտում եմ նման հայտարարությունները»,- հայտարարեց Հայաստանի Ազգային անվտանգության խորհրդի քարտուղար Արթուր Բաղդասարյանը լրագրողների հետ հանդիպման ժամանակ և հավելեց. «Ուղղակի մենք պետք է հասկանանք, որ ապրում ենք բարդ տարածաշրջանում, ունենք չկարգավորված հակամարտություն, և սա նշանակում է, որ քանի դեռ տիրում է այս հարաբերական խաղաղության ժամանակաշրջանը, մեր զինված ուժերը պետք է պատրատ լինեն ցանկացած ագրեսիայի դիմակայման»:

Ա. Բաղդասարյանն իր խոսքում նաև մեկ այլ թևավոր մեջբերում կատարեց, առ այն, որ ընդունված է ասել` պատերազմներից հետո են հուշարձաններ դրվում, այն դեպքում, երբ խաղաղությունը շատ ավելի թանկ արժե, քան պատերազմը:

«Չնայած, որ խաղաղության համար հուշարձան չեն դնում, բայց մեր երկրի քաղաքական ղեկավարության ջանքերն ուղղված են, որպեսզի մենք կարողանանք հաստատել արժանապատիվ խաղաղություն` մեր տարածաշրջանում, և ապահովենք ԼՂՀ հիմնախնդրի արդարացի լուծում, որը ենթադրում 3 գործոնի առկայություն, որի շրջանակներում էլ բանակցային գործընթացը շարունակվում է»,- ընդգծեց Ա. Բաղդասարյանը:

ԱԱԽ քարտուղարը հիշեցրեց, որ երեք գործոններն են` ԼՂ կարգավիճակի ճշգրտումը կա'մ անկախ Ղարաբաղ, կա'մ Հայաստանի հետ մավորված Ղարաբաղ, երկրորդ` ուղիղ ցամաքային կապ, այն է` միջնորդավորված կապի բացակայում Լեռնային Ղարաբաղի Հանրապետության և Հայաստանի Հանրապետության միջև, և երրորդ` անվտանգության համալիր միջոցառումների երաշխիքների առկայություն:

«Մենք պետք է մեր հնարավորությունները մաքսիմալ օգտագործենք` անվտանգության ռեալ երաշխիքներն ունենալու համար, և վերջին միջադեպը ցույց տվեց այս պնդման հիմնավորումը»,- ամփոփելով իր խոսքը` հայտնեց Ա. Բաղդասարյանը:

25.06.2010, 12:58

Aysor.am

«Մենք լրջորեն դատապարտում ենք տեղի ունեցած միջադեպը»

«Մենք լրջորեն դատապարտում ենք այն միջադեպը, այն սադրանքը, որը տեղի ունեցավ, բայց ոչ մի անհրաժեշտություն չենք տեսնում, թե այդ միջադեպը կարող է խոչընդոտ հանդիսանալ հետագա բանակցային գործընթացի շարունակության համար»,- հայտարարեց Հայատանի Ազգային անվտանգության խորհրդի քարտուղար Արթուր Բաղդասարյանը` լրագրողների հետ հանդիպման ժամանակ անդրադառնալով հունիսի 18-ին Լեռնային Ղարաբաղի Հանրապետության տարածք ադրբեջանական դիվերսիոն խմբի ներխուժմանը:

Ա. Բաղդասարյանը հայտնեց նաև, որ ինքն այդ մասին հայտնել է նաև Եվրամիության հատուկ ներկայացուցչի հետ տեղի ունեցած հանդիպման ժամանակ:

«Հայաստանը հավատարիմ է խաղաղ բանակցային գործընթացը շարունակելուն և մենք գտնում ենք, որ չպետք է տուրք տանք տարաբնույթ սադրանքներին, կազմակերպված դիվերսիոն գործողություններին»,- ընդգծեց Ա. Բաղդասարյանն ու հավելեց. «Նաև անընդունելի ու դատապարտելի ենք համարում, երբ մի կողմից բանակցում են, մյուս կողմից նման սադրանքների են դիմում»:

ԱԱԽ քարտուղարը նշեց, որ բազմիցս ասվել է, որ «մեր զինված ուժերը գտնվում են բավարար մարտունակ վիճակում»: Նա հայտնեց, որ Հայաստանում տեղի են ունենում ռազմավարական ոլորտի բարեփոխման լուրջ աշխատանքներ, և «մեր երկիրը հնարավորինը պետք է անի` ընդհանուր անվտագության մակարդակը բարձրացնելու և խաղաղ բանակցային գործընթացը շարունակելու ուղղությամբ»:

25.06.2010, 12:35

Aysor.am

Ա. Բաղդասարյան. Մեր սահմանները պետք է լինեն առավել անառիկ

Հայաստանի Ազգային անվտանգության խորհուրդը ակտիվորեն համագործակցում է ՀԱՊԿ անդամ երկրների հետ: Համագործակցության առանցաքային խնդիրներից է մեր երկրի սահմաների անառիկության և սահմանային անվտանգության մակարադակի բարձացումը: Այս մասին վերջին մեկ տարվա ընթացքում կատարած աշխատանքների հաշվետվական ասուլիսի ժամանակ հայտարարեց Հայաստանի Ազգային անվտանգության խորհրդի քարտուղար Արթուր Բաղդասարյանը:

«Այսօր ՀՀ սահմանները, ցավոք, չեն գտնվում այն վիճակում, որով կարող են ապահովել անվտանգության բարձր մակարդակ, և մենք ձեռնամուխ ենք եղել Հայաստանում սահմանային անվտանգության խնդիրների լուծմանը»,- ընդգծեց Ա. Բաղդասարյանն ու նշեց, որ այս կապակցությամբ ստեղծվել է հատուկ միջգերատեսչական հանձնաժողով, որը զբաղվում է ՀՀ սահմանային անվտանգության խնդիրներով:

ԱԱԽ քարտուղարի հաղորդած տվյալների համաձայն` վերջին 6 ամսվա ընթացքում կարտավել է մեծ ծավալի աշխատանք: Ա.Բաղդասարյանը հույս հայտնեց, որ այս տարվա ավարտին կունենաք Հայաստանի սահմանային անվտանգության վիճակի բարելավման համալիր միջոցառումների փաթեթ, որը հնարավորություն կտա «մի կողմից բարելավել մեր սահմանային ենթակառուցվածքները, մյուս կողմից` բարձրացնել սահմանային անվտանգության մակարդակը, հաշվի առնելով, որ մենք գտնվում ենք բավականին բարդ տարածաշրջանում, և սահմանային խնդիրները համարվում են գերակա»:

«Մենք գտնում ենք, որ մեր սահմանները պետք է լինեն առավել անվտանգ, առավել անառիկ, և մեր սահմանային ենթակառուցվածքները պետք է արդիականացվեն»,- ընդգծեց Ա. Բաղդասարյանն ու հավելեց. «Մեր սահմանային ենթակառուցվածքները, սահմանային անցակետերը, ցավոք, չեն համապատասխանում միջազգային չափանիշներին, մենք ունենք լրջագույն խնդիրեր և ձեռնամուխ ենք եղել այդ խնդիրների լուծմանը. ունենք կատարված մեծ ծավալի աշխատանք և կունենաք լավ արդյունքներ»:

ԱԱԽ քարտուղարը նշեց նաև, որ Ռուսաստանի Դաշնությունը և Եվրամիությունը նույնպես ներգրավված են Հայաստանի սահմանային ենթակառուցվածքների արդիականացման և սահմանային անվտանգության բարձրացան աշխատանքներում:

25.06.2010, 12:25

Aysor.am

«Արցախն իմ աչքերով»` լուսանկարչական ցուցահանդես-մրցույթ

Լեռնային Ղարաբաղի Հանրապետության մշակույթի և երիտասարդության հարցերի նախարարությունը կազմակերպում է լուսանկարչական ցուցահանդես-մրցույթ: Ինչպես Aysor-ի հետ զրույցում հայտնեց նախարարության երիտասարդության հարցերով բաժնի պետ Տիգրան Աթանեսյանը, ցուցահանդեսն իրականացվելու է օնլայն (online) ձևաչափով և կրելու է «Արցախն իմ աչքերով» խորագիրը:

Տ. Աթանեսյանի խոսքերով` ցուցահանդեսին կարող են մասնակցել բոլոր նրանք, ովքեր երբևէ լուսանկարել են Արցախը` իր այս կամ այն դրսևորումով` բնապատկեր, հուշարձան, մարդիկ և այլն: Առաջնահերթությունը տրվելու է սիրողական լուսանկարներին, քանի որ, ըստ Աթանեսյանի, «պրոֆեսիոնալ լուսանակարն արդեն իսկ դատապարտված է հաջողության»:

Ցուցահանդեսը օնլայն ձևաչափով անցկացնելու հանգամանքը թույլ է տալիս մասնակցություն` ինչպես Հայաստանից, այնպես էլ աշխարհի ցանկացած վայրից: Մասնակցել ցանկացողները կարող են իրենց նախընտրած լուսանկարը տանել ԼՂՀ մշակույթի և երիտասարդության հարցերով նախարարություն կամ Տեղեկատվական տեխնոլոգիաների զարգացման կենտրոն, այնպես և JPEG ձևաչափով ուղարկել arcaxit@gmail.com էլեկտրոնային հասցեով` լուսանկարին կցելով հեղինակի և լուսանակարի մասին տեղեկատվություն և նկարագրություն` որտե՞ղ է նկարահանվել, ե՞րբ է նկարահանվել և այլն:

«Նմանօրինակ ցուցահանդես մենք կազմակերպում ենք առաջին անգամ: Օնլայն ձևաչափով ցուցահանդեսի իրականացումն ունի մի քանի դրդապատճառներ»,- հայտնեց Տ. Աթանեսյանն ու հավելեց, որ այն նախ հնարավորություն է տալիս ինտերնետից, հատկապես` սոցիալական ցանցերից, օգտվող լայն զանգվածների հասանելի դարձնել ներկայացված աշխատանքներն ու ցուցահանդես-մրցույթի իրականացումը, ինչպես նաև` թույլատրում է միջոցներ խնայել:

Հայտնենք նաև, որ ցուցահանդեսի մասնակցության հայտերն ընդունվում են մինչև հուլիսի 6-ը: Ցուցահանդես-մրցույթին ներկայացված աշխատանքների գնահատումը ևս կիրականցվի օնլայն ձևաչափով: Լուսանկարաները կտեղադրվեն բոլորին քաջ հայտնի սոցիալական կայքերում, այդ թվում` Facebook, Odnoklassniki, Vkontakte, MySpace, Twitter և այլն, որտեղ էլ կիրականացվի քվեարկությունը: Արդյունքներն ամփոփելուց հետո լուսանակարները կտեղադրվեն առանձին կայքում:

Տ. Աթանեսյանը տեղեկացրեց նաև, որ ցուցահանդես-մրցույթի հաղթող աշխատանքները նախարարության կողմից խորհրդանշական դրամական պարգևների կարժանանան` առաջին տեղի համար 20 հազար դրամ, երկրորդի` 15 հազար դրամ և երրորդի` 10 հազար դրամ արժողությամբ:

«Կոչ եմ անում բոլորին մասնակցել ցուցահանդեսին և ներկայացնել Արցախը` ձեր աչքերով»,- զրույցի վերջում` նշեց Տ. Աթանեսյանը, ով նկատեց, որ նմանօրինակ միջոցառումները միտված են Արցախի մասին տեղեկատվության քարոզմանը, ինչն այսօր, հաշվի առնելով տեղեկատվական պատերազմը Արդբեջանի հետ, անհրաժեշտ է Արցախին, և հավելեց. «Արդբեջանն անընդհատ իր սուտն է կրկնում: Մենք սուտ ասելու կարիք չունենք, սակայն մենք էլ աշխարհին պետք է ցույց տանք այն, ինչ ունենք»:

25.06.2010, 10:43

Aysor.am

«Տգետներին պետք է բացատրվի, թե ինչ է ազգային դպրոցը …»

Ըստ երգիչ, երգահան Վահան Արծրունու` զարմանալի է, եթե որևէ մեկը չարձագանքի օտարալեզու դպրոցների վերաբացման նախաձեռնությանը: Ավելին` լրագրողների հետ հանդիպման ժամանակ նա նշեց, որ իր շրջապատում բոլորը դեմ են նախաձեռնությանը:

«Իմ շրջապատում շատերը, նույնիսկ ես, ունենք ռուսական կրթություն, և պետք է որ մենք կողմ լինեինք այս նախաձեռնությանը, բայց զարմանում եմ, որ կան մարդիկ, ովքեր, կարծես թե, կրթվել և ձևավորվել են ազգային դպրոցի և ազգային հասկացողությունների ներքո, ինձ համար անհասկանալի կերպով, որոշել են ստեղծել մի զանգված` մի ոտատեղ, որտեղ հետագայում կկարողանան ապահովել բազմակողմ կրթություն իրենց երեխաների ու զավակների համար»,- հայտնեց Վ. Արծրունին:

Ըստ երաժշտի` նախաձեռնությունը «սոցիալական տարաձայնությունների և սոցիալական խորացող շերտավորման խնդիր է»: Ըստ նրա` այն խավը, որը հնարավորություն ունի դրական փոփոխություններ անելու, որովհետև մտահոգված է, թե ինչ միջավայրում պետք է մեծանան ու կրթվեն իրենց երեխաները, իրենց «նեղ խավային խնդիրը դարձրել են ազգային խնդիր և առաջացրել են հսկայական ալեկոծություներ ու տարաձայնություններ` հատկապես մտավորականության շրջանում»:

«Բնական է, քանի որ անկիրթ մարդը չի կարող խորապես գիտակցել, որ այս որոշումը կարող է խարխլել ամենահիմնավոր հասկացողությունները` և’ պետականության, և’ ազգային մտածողության, և’ ազգային նկարագրի»,- ընդգծեց Վ. Արծրունին:

Երգչի խոսքերով, սակայն, իրավիճակն այնքան էլ անհուսալի չէ, քանի որ «ազգային խնդիրների վերաբերյալ մեր ազգը ռեֆլեքս ունի և ճշգրիտ պահերին ճշգրիտ ձևով է դրսևորվում»:

«Ես հավատում եմ դրան և բազմիցս ականատես եմ եղել նման դրսևորումների, հիմա պետք է պարզապես փաստել, որ դեռ գտնվում եք այնպիսի շրջանում, որ որոշ տգետների պետք է որերորդ անգամ բացատրվի, թե ինչ է ազգային դպրոցը, ինչ է հայոց լեզուն և ինչ է նշանակում ազգային պետությունը»,- ամփոփելով իր խոսքը` նշեց Վ. Արծրունին:

21.06.2010, 18:00

Aysor.am

«Ադոյանի գրությունն արդեն օրե՞նք է մեր Հանրապետությունում»

«Համերգի անցկացման մերժումը անհիմն է, քանի որ հիմք է ընդունվել 22.04.2010 թ-ի «Մոսկվա» կինոթատրոնի գլխավոր տնօրենի` Մարտուն Ադոյանի կողմից ներկայացված մի գրություն, ըստ որի` Մ. Ադոյանը խնդրում է քաղաքապետարանին թույլ չտալ զանգվածային միջոցառումներ իրականացնել «Մոսկվա» կինոթատրոնին հարակից` Շառլ Ազնավուրի անվան հրապարակում»,- այս մասին լրագրողների հետ հանդիպման ընթացքում հայտնեց «Մենք դեմ ենք օտարալեզու դպրոցների վերաբացմանը» նախաձեռնողական խմբի անդամ Արայիկ Հարությունյանը` անդրադառնալով Երևանի քաղաքապետարանի կողմից հունիսի 19-ին Շառլ Ազնավուրի անվան հրապարակում «Ընդդեմ օտարալեզու դպրոցների վերաբացմանը» խորագիրը կրող համերգը կազմակերպելու մերժման որոշմանը:

Նշենք, որ համերգին մասնակցելու պատրաստակամություն էին հայտնել տասնյակից ավելի երաժիշտներ, այդ թվում` Վահան Արծրունին, Ռուբեն Հախվերդյանը, Էդուարդ Զորիկյանը, Շուշան Պետրոսյանը, Դավիթ Ամալյանը, «Արմենոիդս» խումբը և այլոք: Հայտնենք նաև, որ համերգի կամակերպիչներին չի առաջարկվել համերգն անցկացնել մեկ այլ վայրում:

Ա. Հարությունյանը տեղեկացրեց, որ նախ համերգի անցկացումը մերժվել է` պայմանավորելով աղբահանության խնդիրներով, այնուհետև «ի հայտ է եկել Մ. Ադոյանի գրությունը»:

«Եթե այդ տրամաբանությամբ գնանք, ապա ցանկացած մշակութային կառույցի կամ այլ օբյեկտի տնօրեն կարող է դիմել քաղաքապետարանին` արգելելու ցանկացած զանգվածային միջոցառման անցկացում»,- նշեց Ա. Հարությունյանն, ով նկատեց նաև, որ նույնիսկ քաղաքապետարանի կողմից ընդունված Մ. Ադոյանի գրությունն է «աշխատում բացառիկ դեպքերում, քանի որ այս պահին «Մոսկվա» կինոթատրոնի հարակից Շառլ Ազնավուրի հրապարակում տեղի են ունենում համերգի նախապատրաստության աշխատանքներ»:

«Մենք խնդրեցինք քաղաքապետարանի ներկայացուցչին բացատրել, թե ո՞ր օրենքով են կարգավորելու մեր հարաբերությունները, ո՞ր օրենքով ենք մերժվելու, քանի որ «Զանգվածային միջոցառումներ մասին» ՀՀ օրենքի համաձայն` քաղաքապետարանը 72 ժամվա ընթացքում պետք է քննարկի հարցը և պատասխան ներկայացնի, մինչդեռ նա` Գագիկ Բաղդասարյանը հայտնեց, որ «համերգը չի կարգավորվում «Զանգվածային միջոցառումների անցկացման մասին» ՀՀ օրենքով, փոխարենը` կարգավորվելու է ընկերական հարաբերություններով ու տրամաբանությամբ»»,- հայտնեց Ա. Հարությունյանը, ով ամփոփելով իր խոսքը` ընդգծեց. «Մերժման փաստաթղթում ոչ մի օրենքի վրա հղում չկա, հղումը մեկ գրության վրա է, այսինքն` Ադոյանի գրությունն արդեն օրե՞նք է մեր Հանրապետությունում»:

Ա. Հարությունյանը հայտնեց նաև, որ քաղաքապետարանի որոշումը նախաձեռնողական խումբը բողոքարկելու է համապատասխան ատյաններում:

21.06.2010, 15:28

Aysor.am

Գյուղում մեկ եկեղեցի և մեկ քահանա` ամբողջ շրջանի համար

Ջավախքի Սաթխա գյուղի բնակիչները հպարտանում են, որ իրենց գյուղում հայկական եկեղեցին գտնվում է բարեկարգ վիճակում, մինչդեռ վրացականը` «անտերության մատնված` փլատակների է վերածվելու»:

«Որտեղ հայ` այնտեղ եկեղեցի» արտահայտությունը բնորոշ է նաև Ջավախքին: Ինչպես ամեն տեղ, այնպես էլ Ջավախքում, հայերն առանձնահատուկ դերակատարում ու կարևորություն են տալիս Հայ Առաքելական եկեղեցուն:

Այնուամենայնիվ, շուրջ 5500 բնակչություն ունեցող Սաթխա գյուղի համար կա մեկ գործող եկեղեցի, սակայն քահանան էլ մեկն է` ամբողջ շրջանի համար: Գյուղի բնակիչները ստիպված շրջանի քահանային այլ բնակավարից կանչում են` ցանկացած ծես կատարելու համար, իսկ եկեղեցական գլխավոր տոների ժամանակ` քահանան ստիպված է մեկ օրվա ընթացքում մի քանի շրջանում տարբեր ժամերի պատարագ մատուցել:

Aysor-ի հետ զրույցում Ջավախքի Սաթխա գյուղի բնակչուհի տիկին Արուսյակը նշեց, որ, չնայած հոգևորականի պակասը լրացվում է, սակայն ինքը դեմ չէր լինի, որ գյուղի հոգևորականը լիներ հենց գյուղից:

«Հավանաբար մեր գյուղից ոչ մեկ չի ցանկացել ճեմարանում ուսում ստանա, հետո գա ու այստեղ քահանայություն անի, թե չէ հենց մեր գյուղից կլիներ մեր քահանան»,- քահանայի բացակայության հանգամանքը մեկնաբանեց տիկին Արուսյակը:

Աղանդավորական խմբեր կան նաև Ջավախքում: Տիկին Արուսյակը չի սրտնեղվում դրանից, քանի որ «ամեն մեկն իր պաշտամունքն ունի, և իրեն ոչինչ չի կարող ստիպել, որ ինքն իր հավատը փոխի` աղանդավոր դառնա»:

Նշենք, որ Նինոծմինդա շրջանի, այդ թվում Սաթխա գյուղի հոգևոր սպասավոր տեր Արմաշ քահանա Պողոսյանը, հրաժարվեց Aysor-ի հետ խոսել Ջավախքում առկա հոգևոր խնդիրներից, ինչպես նաև այն խոչընդոտներից, որոնք առաջանում են Վրաստանում` մինչ օրս Հայ առաքելական եկեղեցու պետականորեն գրանցված չլինելու հանգամանքից ելնելով:

Հիշեցնենք, որ Հայ առաքելական եկեղեցու` Վրաստանում պետականորեն գրանցում ստանալու խնդիրը կարևորվում է ոչ միայն հոգևոր, այլև մշակութային ժառանգությանը տեր կանգնելու տեսանկյունից: Եզակի չեն այն դեպքերը, երբ Վրաստանում հայկական եկեղեցիները վերանորոգելու պատրվակով, դրանցում հայերեն մակագրությունները հիմնովին ոչնչացվում են, քանդվում է հայկական եկեղեցիներին բնորոշ բեմը և եկեղեցին վերջնականապես վրացականացվում է, շատ դեպքերում էլ հիմնահատակ ոչնչացվումեն հայկական եկեղեցիներն ու դրանց շրջապատող ցանկացած հայկական տարր` սկսած խաչքարերից մինչև հայկական մակագրություններով գերեզմանաքարեր:

Լիլիթ Բունիաթյան

05.06.2010, 13:43

Aysor.am

Ջավախքցին աշխատանք է սիրում … որտե՞ղ գտնի

Ջավախքի Սաթխա գյուղը, որն ունի շուրջ 5500 բնակչություն և 700 տնտեսություն, իր օրվա ապրուստը վաստակում է անասնապահությամբ ու գյուղատնտեսությամբ: Բնակիչների խոսքով նաև` այստեղ խնդիր կարելի է գտնել ցանկացած ոլորտում:

«Մերն ապրելիք չէ, քաշելիք է. ամեն պրոբլեմ էլ կա, ի՞նչ ունենք որ. ոչ մի բան էլ չունենք, մի հատ հավի ու կովի ապրուստով ենք մնացել»,- Aysor-ի հետ զրույցում նշեց գյուղի բնակիչ 44-ամյա Սպիրիդոն Ստեփանյանը, ով ներկայացավ որպես «գյուղի տրակտորիստ»:

Ս. Ստեփանյանի խոսքերով, սակայն, իրենց չի հաջողվում նույնիսկ բավարար պայմաններով գյուղատնտեսությամբ զբաղվել, քանի որ «ոչ մեկը չկա, որ օգնության ձեռք մեկնի»: Այսպես, օրինակ, 20 լ վառելիք գնելու դիմաց, ըստ նրա, 1 կով են պահանջում (նույն գինն է):

«4 մեշոկ կարտոշկա կտանինք Թիֆլիս, 2-ը ձեռքներիցս կառնեն, Հայաստան կուգանք` Հայաստանում ռաստամոժկա կուզեն, էլ ինձ որտեղի՞ց 60 լարի, որ 4 մեշոկ կարտոշկա ռաստամոժկա անեմ»,- նկարագրեց Ս. Ստեփանյանն ու հավելեց, որ իրենց վիճակը «2 քարի արաքից էլ է բեթար. հետևը սուր, առաջը թուր, չգիտեն` ի՞նչ պետք է անեն»:

Գյուղացին ասաց, որ ոչ մի լավ բան չեն տեսնում և ոչ մի լավ բանի հույս էլ չունեն: Գյուղում վերջին 22 տարվա ընթացքում տեղի ունեցած միակ փոփոխությունը, ըստ նրա, ոռոգման ջուրն է, որը եթե չլիներ «գյուղում միայն չոր գերեզմանները կմնային»:

«Մեր պրոբլեմն առաջին հերթին դակումենտերն են: Մեզ ո’չ Հայաստանն է պետք, ո’չ Վրաստանը, մեզ մի դակումենտ տան` գնանք Ռուսաստան, մեր ապրուստը կճարինք, ուրիշ ոչ մի բան պետք չէ»,- հայտնեց Ս. Ստեփանյանը, ով արտագնա աշխատանքի մեջ է միայն տեսնում գյուղի բնակչության խնդիրնների լուծումը, և հավելեց. «Մենք պետք է դուրս գանք, մենք աշխատավոր ժողովուրդ ենք, մենք ջավախքցի ենք, մենք կռիվ չենք սիրե, մենք աշխատանք ենք սիրում»:

Ըստ նրա` համապատասխան փաստաթղթեր տրամադրելու հարցում իրենց կարող է օգնել միայն վրացական իշխանությունը, քանի որ «Հայաստանն իր անելիքն արել է` ջավախքահայերին տալով երկքաղաքացիության իրավունք»: Այս առիթով նա նշեց, որ գյուղից շուրջ 670 երիտասարդ, երկքաղաքացիություն ստանալով, կարողացել է մեկնել Ռուսաստան` արտագնա աշխատանք կատարելու: Իսկ առհասարակ փաստաթուղթ ստանալու համար էլ, Ս. Ստեփանյանի խոսքերով` «100 լարի են պահանջում, որով մի ընտանիքը 2 ամիս կարող է ապրել»:

«Խոսք են տվել, բայց արդեն 5 ամիս է մեզ ոչ մի դակումենտ չեն տվել: Երեխաս բանակի տարիքին է, էլի բանակից չենք խուսափի, բայց տղես Վրաստանի քաղաքացի է, իսկ մենք Վրաստանից ոչինչ չենք տեսնի, ու՞մ համար ծառայի»,- սրտնեղվեց գյուղացին, բայց հավելեց, որ եթե բանակից խուսափող լիներ, կամավոր կերպով չէր մասնակցի Արցախի ազատագրական հերոսամարտին:

65-ամյա Նազիկ Բրոյանը, սակայն, չի դժգոհում իրենց վիճակից, չնայած, իր խոսքերով, գյուղում ապրում են ինքն ու ամուսինը` երկու թոշակառու, ովքեր իրենց թոշակով ոչինչ չեն կարողանում անել:

«Երեխաներս Ռուսաստան կապրին` 4-ը, մեր ամբողջ ապրուստն էնտեղից կուգա: Ամեն ամառ թոռներս կուգան մեզ մոտ արձակուրդ, հայրենի գյուղի գետերը, լեռները, այս լավ վայրերը տեսնելու»,- թոռների գլուխը շոյելով պատմեց տիկին Նազիկը:

Տիկին Նազիկի խոսքերով` գյուղում գրեթե չկա մի ընտանիք, որում արտագնա աշխատանք կատարողներ չլինեն: Մինչդեռ գյուղի բնակչուհի Ռուզաննա Ստեփանյանը նշեց, որ յուրաքանչյուրն ինքն է որոշում ի՞նչ աշխատանք և որտե՞ղ կատարի: Նա համոզված է, որ ցանկության դեպքում` մարդիկ այդ նույն աշխատանքը կարող են գտնել ինչպես Վրաստանում, այնպես էլ Հայաստանում: Միևնույն ժամանակ նկատեց, որ գյուղից հեռանում են հիմնականում երիտասարդները, ովքեր «Սաթխայում ապագա չեն տեսնում»:

Անկախ խնդիրներից` բոլորը միակարծիք էին այն հարցում, որ գյուղն աջակցության կարիք ունի, և եթե գյուղում էլ ստեղծվեն ապրելու, սովորելու ու գործելու պայմաններ` «ոչ ոք էլ ոչ մի տեղ չի գնա»:

Լիլիթ Բունիաթյան

05.06.2010, 13:32

Aysor.am