Վերջերս ՀՀ սպորտի և երիտասարդության հարցերի նախարարությունը կազմակերպել էր «Երիտասարդության դերը թրաֆիքինգի կանխարգելման գործում» խորագրով քառօրյա սեմինար: Սեմինարին մասնակցում էին Հայաստանի բոլոր մարզերի երիտասարդական կենտրոնների ակտիվ անդամները:
Սեմինարի նպատակն էր Հայաստանի մարզերի երիտասարդական կենտրոնների ակտիվ անդամներին պատրաստել` որպես սեմինարավարներ, որպեսզի վերջիններս էլ թրաֆիքինգի ու դրա կանխարգելման վերաբերյալ սեմինարներ կազմակերպեն իրենց մարզերում ու բնակավայրերում, և համայնքի երիտասարդությանը տեղեկացնեն թրաֆիքինգի և թրաֆիքինգի դեմ մղվող պայքարի միջոցների մասին:
«Սեմինարի շնորհիվ տեղեկացանք միջազգային օրենսդրական մարմինների հոդվածներին` նվիրված թրաֆիքինգի դեմ պայքարին, մանրամասն սովորեցինք, թե ինչպես կարելի է պայքարել թրաֆիքինգի դեմ, իմացանք զոհերի բազմաթիվ իրավունքների մասին»,- Aysor-ի հետ զրույցի ժամանակ հայտնեց սեմինարի մասնակից, Վայոց Ձորի մարզի Եղեգնաձորի երիտասարդական կենտրոնի կամավոր Անի Հակոբյանը:
Ա. Հակոբյանը տեղեկացրեց նաև, որ, չնայած իրենք սեմինարի ավարտից հետո դեռ չեն ստացել համապատասխան վկայականները, սակայն առաջիկա երկու ամիսվա ընթացքում պետք է Եղեգնաձորում նմանատիպ սեմինար կազմակերպեն:
Տեղեկացնենք, որ յուրաքանչյուր մարզից սեմինարին մասնակցել է 4 երիտասարդ: Վերջինները պարտավոր են առաջիկա երկու ամիսների ընթացքում նման սեմինարներ վարել իրենց բնակավայրերում: Սպորտի և երիտասարդության հարցերի նախարարությունն էլ հետևելու է սեմինարների ընթացքին ու արդյունքներին:
«Կարծում եմ Հայաստանում թրաֆիքինգի առկայության պատճառը երիտասարդների ոչ լիարժեք տեղեկացվածությունն է»,- ընդգծեց Ա. Հակոբյանը` կարևորելով նման միջոցառումների անցկացումը հատկապես Հայաստանի շրջաններում:
Նշենք նաև, որ մարզերում կազմակերպվելիք սեմինարներին կարող են մասնակցել տվյալ մարզի տարբեր շրջանների երիտասարդական կենտրոնների անդամները և կամավորները: Յուրաքանչյուր մարզում կազմակերպված սեմիներին կարող է մասնակցել առավելագույնը 20 երիտասարդ:
05.08.2009, 20:25
No comments:
Post a Comment