Երգիչ-երգահան Ռուբեն Հախվերդյանը լրագրողների հետ հանդիպման ժամանակ հայտնեց, որ նախատեսում է հանդես գալ մի շարք համերգներով: Նա նշեց, որ մի քանի փոքր համերգներ կունենա «Ակումբ» ակումբում, իսկ մեծ համերգով հանդես կգա սեպտեմբերին` Հայաստանի ֆիլհարմոնիկ համերգասրահում:
Խոսելով համերգների մասին` երգիչը հիշեցրեց, որ ինքը 1988 թ-ից հիմնականում տվել է բարեգործական համերգներ: Նա հայտնեց, որ այն ժամանակ ՀՀ սոցիալական ապահովության նախարարության շնորհիվ իրենք կարողացել են այդ բարեգործական համերգներից այնքան փող հավաքել, որ վեց ամիս աղքատների ճաշարան են պահել:
Երգիչը խոստովանեց նաև, որ բազում համերգներ է տվել զոհվածների ազգականների համար, իսկ գումար վաստակել է արտասահմանում` Ֆրանսիայում, Ամերիկայում, Բեյրութում և այլուր:
Ռ. Հախվերդյանը, այնուամենայնիվ, կարծում է, որ ինքը մտավորական չէ, այլ «կատարում է իր աշխատանքը»:
«Ես կարող եմ միայն հպարտանալ, որ իմ գրած որոշ երգերը մարդկանց բավարարել են, և շատ-շատերը երգում են այդ երգերը»,- բացատրեց երգահանը:
Անդրադառնալով երգարվեստին և երգեր գրելուն` Ռ. Հախվերդյանը հայտնեց, որ «ինքը թեմատիկ երգեր չի գրում, քանի որ երգը մտածողություն է, իսկ երբ երգ է գրում, 1 տարի չի երգում, որ ջուրը գնա մեջից»:
«Ես ինքս էլ չգիտեմ, թե ինչպես եմ գրում: Սկզբում մի բառ է շրխկում ակորդի վրա, հետո` մյուսը, հետո բառն իր հետևից տանում է, և դառնում է նախադասություն: Ես երբեք, երբ երգը գրում եմ, չգիտեմ, թե այն ինչի մասին է, մինչև վերջին տողը չեմ գրում»,- բացատրեց Ռ. Հախվերդյանը:
Ռ. Հախվերդյանը տարանջատում է նաև երգեր գրելը երգեր կատարելուց: Ըստ նրա` դրանք տարբեր էներգիաներ են պահանջում, և «եթե երգ կատարելը կարելի է համեմատել երկար դիստանցիայով վազքի հետ, ապա երգ գրելը կարճ դիստանցիայով վազք է»:
Ամփոփելով խոսքը` երգիչը հայտնեց, որ ինքը «միշտ ամոթ եմ համարել երգելու համար փող աշխատելը, սակայն իմ համերգներին տոմսեր եմ վաճառում, քանի որ պետք է տուն պահեմ»:
03.08.2009, 20:20
No comments:
Post a Comment