Այն հանգամանքը, որ միևնույն ժամին երևանյան երկու տարբեր մամուլի ակուբներում ասուլիս են հրավիրել «Ժառանգություն» խմբակցության երկու պատգամավորներ Ստյոպա Սաֆարյանն ու Վարդան Խաչատրյանը, Ս. Սաֆարյանը համարում է կազմակերպչական խնդիրների հետևանք:
«Մեր գործընկեր Վարդան Խաչատրյանը բացակայել է Երևան քաղաքից: Առանց տեղյակ լինելու, որ կուսակցության մամուլի ծառայությունը նախօրոք նախապատրաստում է ասուլիս` ինքը համաձայնություն է տվել մեկ այլ ակումբի»,- մանրամասնեց Ս. Սաֆարյանը` պատասխանելով Aysor-ի հարցին:
Բացի այն, որ Վարդան Խաչատրյանը ասուլիսի մասին չի տեղեկացրել և այն չի համաձայնեցրել կուսակցության լրատվական ծառայության հետ, մեկ այլ տեխնիկական սխալ էլ թույլ է տվել մյուս մամուլի ակումբի ասուլիսավարը:
«Ցավոք, մյուս ակումբի ասուլիսավարը, ով մշտապես նախկինում մեր մամուլի բաժնի հետ էր համաձայնեցնում, այս անգամ չի զանգել և մամուլի բաժնին չի տեղեկացրել, թե ինչպիսին է պատգամավորների գրաֆիկը»,- բացատրեց պատգամավորը:
Ս. Սաֆարյանն ասուլիսի ժամանակ խոսեց գերտերությունների հարաբերությունների, տարածաշրջանում ունեցած դերակատարության, մասնագետների վերլուծությունների, վերջին ժամանակներս տեղի ունեցած նշանակալի իրադարձությունների, ու դրանց` Հայաստանի վրա ունեցող անդրադաձի մասին:
Գալով Լեռնային Ղարաբաղի հակամարտության խնդրին` Ս. Սաֆարյանը նշեց, որ «ստեղծվել է մի տեղապտույտ, տեղատվություն այս գործընթացում, բայց հասկանալի պատճառներով թե’ Մինսկի խմբի համաանախագահները, թե’ որևէ մեկը չի ցանկանում դրա մասին բարձրաձայն խոսել»:
«Աշնանը Ղարաբաղյան խնդրի կարգավորման ուղղությամբ լուրջ տեղաշարժեր չեն արձանագրվի»,- եզրակացրեց բանախոսը:
Այն, ինչ կատարվում է այսօր, ըստ Ս. Սաֆարյանի, «փորձեր են` հանգստացնելու Թուրքիային, որ Ղարաբաղյան խնդրի կարգավորման գործընթացը շարժվում է առաջ այնքանով, որքանով այն կախված է Մինսկի խմբի համանախագահ երկրներից, իսկ եթե Թուրքիան ցանկանում է արագացնել գործընթացը, ապա կարող է անել դա` կարգավորելով հայ-թուրքական հարաբերությունները»:
«Կարծում եմ` աշնան թիվ մեկ իրադարձությունը լինելու է հայ-թուրքական հարաբերությունների կարգավորումը»,- ընդգծեց Ս. Սաֆարյանը:
Նա հավելեց, որ այդ առումով կարևոր հարցադրումները լինելու են` սահմանը բաց կլինի՞, թե՞ չի լինի, Հայաստանի նախագահը կգնա՞ ֆուտբոլ դիտելու, թե՞ ոչ:
Այնուամենայնիվ Ս. Սաֆարյանը կարծում է, որ ՀՀ նախագահը կգնա Թուրքիա` ֆուտբոլային խաղին մասնակցելու:
«Թուրքիան հայտնվելու է լուրջ ճնշումների տակ` կա'մ բացել սահմանը և գնալ քայլ առաջ` հայ-թուրքական հարաբերությունների նորմալացման ուղղությամբ, կա'մ ԱՄՆ կոնգրեսը կճանաչի Հայոց ցեղասպանությունը»,- մանրամասնեց Ս. Սաֆարյանն ու եզրակացրեց. «Թուրքիան կընտրի սահմանը բացելու ճանապարհը»:
11.08.2009, 18:36
No comments:
Post a Comment