Թե ովքե՞ր են մասնակցելու Համահայկական երիտասարդական յոթերորդ համաժողովին, հայտնի կդառանա այսօր: Ինչպես Aysor-ին տեղեկացրեց Համահայկական երիտասարդական միջազգային կենտրոն հիմնադրամի ծրագրերի կազմակերպիչ և յոթերորդ համաժողովի համակարգող Քրիստինե Ասատրյանը` ընտրված մասնակիցներն այսօր կստանան համապատասխան ծանուցագրեր:
«Մենք ունենք նաև սպասողների ցանկ: Եթե ընտրված մասնակիցները չհաստատեն իրենց մասնակցությունը, ապա վերջինների փոխարեն մասնակցության հրավեր կստանան սպասողների ցանկում գտնվողները»,- տեղեկացրեց Ք. Ասատրյանը:
Տեղեկացնենք, որ Համահայկական երիտասարդական միջազգային կենտրոն հիմնադրամը Համահայկական երիտասարդական յոթերորդ համաժողովն անցկացնելու է օգոստոսի 10-15-ին: Հիմնադրամը համաժողովին մասնակցելու հրավեր է արել Հայաստանի, Սփյուռքի և Արցախի երիտասարդական կամ երիտասարդության խնդիրներին սերտորեն առնչվող բոլոր շահագրգիռ կազմակերպություններին` իրենց ակտիվ մասնակցությունը ցուցաբերելու:
Ք. Ասատրյանի հաղորդած տվյալների համաձայն` հայտերի ընդունման ժամանակն արդեն լրացել է, և արդյունքում համաժողովին մասնակցելու համար ներկայացվել է 185 դիմում-հայտ, այդ թվում` Սփյուռքից մոտ 50 հայտ, որոնցից 25-ը միայն Իրանի Իսլամական Հանրապետությունից:
Հիմնադրամի ծրագրերի կազմակերպչը հայտնեց, որ շատ են եղել այնպիսի հայտերը, որոնք ներկայացված են եղել միևնույն բնակավայրից կամ միևնույն կազմակերպությունից: Այս պարագայում առաջնահերթությունը տրվել է բնակավայրերի ու կազմակերպությունների բազմազաննությանն ու մասնակցության աշխարհագրության ընդլայնմանը:
Ք. Ասատրյանի խոսքերով, սակայն, ավելի մեղմ պայմաններով են ընտրվել Սփյուռքից ստացված հայտերը, քանի որ իրականացվող միջոցառման հիմնական նպատակներից է Սփյուռքի երիտասարդների հետ համագործակցությունը: Նա նշեց, որ մերժվել են միայն Իրանից ստացված հայտերը, քանի որ դրանք մեծ թիվ են կազմել, և ստացված 25 հայտերից համաժողովին կմասնակցեն 10-ը:
Ի պատասխան Aysor-ի այն հարցին, թե արդյոք մասնակցիներն անդամավճար վճարու՞մ են, ինչպես այդ մասին զգուշացված է հայտարարության վերջում (մեջբերում` «Կախված մասնակիցների թվից` հնարավոր է, որ մասնակիցները վճարեն մասնակցության անդամավճար (մինչև 100 ԱՄՆ դոլարին համարժեք դրամ), որի մասին Համաժողովի մասնակիցները կտեղեկացվեն պաշտոնական հրավերը ստանալու ժամանակ»), Ք. Ասատրյանը հայտնեց, որ ի սկզբանե` տարիներ շարունակ, նշվել է անդամավճարի մասին, սակայն, նրա խոսքերով, այս բոլոր տարիների ընթացքում չի եղել այդպիսի դեպք, որ ինչ-որ մեկը վճարի:
«Փառք Աստծո, մենք մինչև 110 հոգու կարող ենք հրավիրել համաժողովին, և դեռևս չի եղել մի դեպք, երբ ինչ-որ մեկը մասնակցության համար վճարի»,- մանրամասնեց Ք. Ասատրյանը:
Հիմնադրամի ծրագրերի համակարգողը հստակեցրեց նաև, որ սույն նախազգուշացումը վերաբերում է հատկապես նրանց, ովքեր չեն ընտրվել, սակայն ունեն մասնակցության մեծ ցանկություն կամ վստահ են, որ անելիք ունեն համաժողովում, և պատրաստ են վճարելու:
«Չնայած նման փորձ ևս չենք ունեցել, քանի որ բոլոր նրանք, ում` համաժոովին մասնակցելու ցանկությունն իսկապես մեծ է եղել, հայտը շատ լավ լրացրել են և ընտրվել են»,- ասաց Ք. Ասատրյանը:
Ք. Ասատրյանը հայտնեց նաև, որ արդեն հստակեցվել են այն թեմաները, որոնց շուրջ քննարկումներ են իրականացվելու համաժողովի ընթացքում:
«Դրանցից առաջինը տեղեկատվական տեխնոլոգիաներն են, մասնավորապես` բլոգը, բլոգի կառավարումը, կառավարման էթիկան, ինչպես նաև` ինտերնետային ռեսուրսների օգտագործումը Հայաստան-Սփյուռք համագործակցության կոնտեքստում»,- տեղեկացրեց Ք. Ասատրյանը:
Մյուս քննարկման թեման տուրիզմի զարգացումն է, այսինքն` Սփյուռքի դերը Հայաստանի տուրիզմի զարգացման գործում: Երրորդը` երիտասարդության և երիտասարդական կազմակերպությունների դերը Հայաստան-Սփյուռք համագործակցությունում:
Ք. Ասատրյանի տեղեկացմամբ` քննարկումները վարելու են մոդերատորները, ովքեր նաև անհրաժեշտ տեղեկություններ են տրամադրելու:
«Օրինակ, տեղեկատվական տեխնոլոգիաներ բաժնի մոդերատորը լինելու է բլոգերի ոլորտում բավական փորձառություն ունեցող Էդգար Բարսեղյանը: Վերջինս իր հմտությունները կփոխանցի մասնակիցներին, կտեղեկացնի, թե ինչպե՞ս վարել բլոգը, ինչպե՞ս կազմակերպել, ինչպե՞ս անել, որ այն հետաքրքրի բոլորին և այլն»,- բացատրեց Ք. Ասատրյանը:
Տեղեկացնենք, որ համաժողովների արդյունքում ծնվում են նախագծեր, որոնք համատեղ իրականացնում են Հայաստանի և Սփյուռքի երիտասարդները: Որպես համագործակցության հաջողված ծրագիր, որը սկիզբ է առել Համահայկական երիտասարդական համաժողովից, Ք. Ասատրյանը նշեց «ԱՐՄՌՈԲՈՏԻՔՍ» նախագիծը, որն արդեն մի քանի տարի շարունակ ռոբոտների պատրաստման մրցույթներ է անցկացնում: Նա հայտնեց նաև, որ համաժողովի ընթացքում ևս մշակվում են ծրագրեր` հետագայում իրականացնելու համար:
