Էջմիածնի քաղաքապետարանը քաղաքացիներին, ովքեր իրենց տների դիմաց թթենիներ ունեն, հորդորել է կտրել դրանք` «խուսափելու համար վարակից, որի փոխանցման աղբյուր են հանդիսանում թթենիները, և սանիտարահիգիենիկ պայմանները պահպանելու համար»:
Այս մասին Aysor-ին տեղեկացրեցին Էջմիածնի մի շարք քաղաքացիներ, ում քաղաքապետարանը երեք օր էր տվել ծառերը հատելու համար, «այլապես` իրենք կգան, կկտրեն ու ծառերը կտանեն»: Մանսնավորապես Էջմիածնի Կարճիկյան փողոցի բնակիչներն ասում էին, որ այդպիսով իրենց փողոցն առանց ծառերի կմնա:
Տեղեկացնենք, որ Կարճիկյան փողոցի միայն մի կողմում են բնակելի տներ: Փողոցի երկանքով իրար հաջորդում են երեք գործարաններ` նախկին Շինվերանորոգման վարչությունը (գրասենյակը), Գյուղշինտրեստի արտադրամասը և «Ռեզիստոր» գործարանը: Բացի այդ` զուգահեռ փողոցի կողմից այս գործարանների հարևանությամբ է գտնվում նաև Էջմիածնի պլաստմասե իրերի գործարանը: Այս գործարաններն այսօր մասամբ են շահագործվում, բայց, օրինակ, նախկին Շինվերանորոգման վարչությունում այժմ աղյուսներ են պատրաստում, որի պատրաստման ժամանակ փողոցը փոշով է պատվում:
Կարճիկյան փողոցում բացառապես թթենիներ են, որոնց պատմությունն անցնում է 40 տարուց: Առաջին թթենիներն այստեղ տնկվել են հենց այն ժամանակ, երբ փողոցում սկսել են մարդիկ ապրել` երկրորդ համաշխարհային պատերազմի տարիներից հետո: Հենց հսկա թթենիներն են ապահովում փողոցի էկելոգիական մաքրությունը:
Էջմիածնի քաղաքապետարանի մամուլի ծառայության բաժնի պետ Վարդան Վարդանյանը երեկ Aysor-ի հետ զրույցում ևս փաստեց, որ թթենիները կտրելու մասին քաղաքապետարանը որոշում կայացրել է` սանիտարահիգիենիկ նպատակներով:
«Նախ ամռանը հիվանդություն է անցել թթենիներին, գյուղատնտեսական տերմին է, հիմա չեմ կարող մտաբերել, թե ինչ վարակ է եղել, բացի այդ` թթենիներից աղտոտվածությունը շատ է լինում»,- պարզաբանեց Վ. Վարդանյանը:
Միևնույն ժամանակ Վ. Վարդանյանը հայտնեց, որ որոշումը վերաբերում է փողոցների մայթերին եղած թթենիներին, այլ ոչ թե տների այգիներում աճողներին: Կարելի է կարծել, որ տների այգիներում թթենիները պաշտպանված են վարակներից:
Քաղաքապետարանի մամուլի ծառայության բաժնի պետը տեղյակ չէր նաև, որ Էջմիածնի քաղաքացիներին ծառերը կտրելու համար երեք օր ժամանակ է տրվել: Այս առիթով նա ասաց` «որոշումը լինում է, և հայտնի չէ, թե այն ով և ինչ ձևով է քաղաքացիներին հասցնում» և հավելեց, որ իրեն չի թվում, թե «հարցն այդպես կտրկուկ կլուծվի, որ դնեն ու մի օրում ծառերը վերացնեն»:
«Քաղաքապետարանը վառելափայտի խնդիր չունի, իր բյուջեից արդեն ձեռք է բերել բավարար քանակությամբ վառելափայտ` սոցիալապես անապահովներին բաժանելու համար, բայց որ կտրվում է, մի բան պետք է արվի, ու դիմացի տանն ասում ենք` վերցրու քեզ ծառը, իսկ քաղաքապետարանն իր հաշվին տնկիներ է բերում և այդ թթենիների տեղում տնկում»,- հայտնեց Վ. Վարդանյանը` ի պատասխան քաղաքացիների այն մեղադրանքների, թե այդպիսով քաղաքապետարանը վառելափայտի հարց է լուծում:
Տեղեկացնենք նաև, որ երեկ լրագրողների հետ հանդիպման ժամանակ այս խնդրին անդրադարձել է նաև բուսաբանական գիտությունների դոկտոր, պրոֆեսոր, ծառագետ, Երևանի բուսաբանական այգու տնօրեն Ժիրայր Վարդանյանը: Նա նշել է, որ չնայած «ընդհանրապես ինչպես մարդկանց, այնպես էլ բույսերի մոտ լինում են համաճարակային հիվանդություններ, բայց կոնկրետ թթի համար չեմ կարող ոչինչ ասել, քանի որ տեղյակ չեմ, չգիտեմ, թե ինչի մասին է խոսքը»:
«Որպես ծառագետ կարող եմ ասել, որ ցանկացած ծառատեսակի համար հնարավոր է, բայց թթենիների պարագայում մասշտաբային հիվանդություն առաջացնող համաճարակ չկա, որի արդյունքում կարող է ծառահատում լինել»,- ընդգծել է Ժ. Վարդանյանը:
Լրացուցիչ մանրամասներ Էջմիածնի քաղաքապետարանի մամուլի բաժնի պետ Վարդան Վարդանյանը հայտնեց այսօր: Նա նշեց, որ Էջմիածնի քաղաքապետարանը 11 թթենիների վերաբերյալ է որոշում կայացրել, որոնց մեծ մասը գտնվում է Էջմիածնի Պարոնյան փողոցում, և դրանցից ոչ մեկը` Կարճիկյանում:
«Արդեն 7 թթենի կտրվել է, ու կտրված ծառը թողնվել է տերերին, որոնց փոխարեն նոր ծառեր է դրվելու: Բոլոր ծառերի մասին դիմումներին տրվել է եզրակացություններ. դրանից մեկը փթած էր և շուռ էր գալիս, մյուսի մասին դիմում ներկայացրել են տան բնակիչները, որ «բունը մտել է մեր տան մեջ, խոնավություն է գալիս» և այլն»,- Aysor-ի հետ զրույցում հայտնեց Վ. Վարդանյանը:
Վ. Վարդանյանի խոսքերով, «այն մարդիկ, ովքեր բնակիչներին հայտնել են, որ «եթե սեփական ուժերով չկտրեն ծառերը, ապա քաղաքապետարանը կկտրի դրանք ու իրեն կպահի», ինքնագլուխ են գործել»: Ըստ նրա, քաղաքապետարանը պարզել է նրանց ով լինելը, և վերջիններս համապատասխան տույժերի կենթարկվեն:
Վ. Վարդանյանը այն բնակիչներին, ովքեր վարանել են ծառերը կտրել` դրանք ափսոսելով, բայց վախենում են, թե քաղաքապետարանը կկտրի ու կտանի, կոչ է անում «հանգիստ մնալ», ու հավելում, որ քաղաքապետարանը «մարդիկ է ուղարկել այդ փողոցի բնակիչներին զգուշացնելու, որ չկտրեն ծառերը»: Ինչ վերաբերում է նրանց, ովքեր արդեն կտրել են իրենց թթենիները, Վ. Վարդանյանը նշեց. «Թող ասեն, թե ինչ ծառ են ուզում թթենիների փոխարեն, քաղաքապետարանը կբերի, կտնկի»:
Հ.Գ. – Հարկ է նշել, որ Կարճիկյան փողոցում այս երեք օրերի ընթացքում տասից ավելի ծառեր են կտրվել: Մնացած ծառերի կյանքը հաջողվել է պահպանել ոչ թե այն բանի շնորհիվ, որ քաղաքապետարանի «ոչ ինքնագլուխ» ներկայացուցիչներն արդեն հասցրել են զգուշացնել բնակիչներին, այլ բնակիչների այն հույսով, թե «մեր փողոցը այսքան լրագրող եկավ նկարեց, հարց ու փորձ արեց, ուրեմն մի բան կլինի... ծառերը չեն կտրվի...»:
