Մեկնարկում է Պատկերապատման միջազգային 2-րդ փառատոնը

Այսօրվանից Երևանում մեկնարկում է Պատկերապատման միջազգային երկրորդ փառատոնը: Փառատոնի կազմակերպիչն է Հայաստանում Պատկերապատման զարգացման միությունը, որը հիմնադրվել է 2007 թ-ին ֆրանսիական Անգուլեմ քաղաքում, և որի նպատակն է խթանել պատմողական պատկերի ավանդույթի զարգացումը մեր երկրում:

Տեղեկացնենք, որ փառատոնի շրջանակում նախատեսվում են մի շարք միջոցառումներ, այդ թվում` ցուցահանդեսներ, գրքերի և ամսագրերի ներկայացում, դասընթացներ, մեկ էջանոց պատկերապատման մրցույթ, պատկերապատման հիման վրա նկարահանված մուլտֆիլմերի ցուցադրում:

Միջոցառումները, որոնք տեղի են ունենալու մինչև մայիսի 16-ը, հիմնականում անցկացվելու են Հայաստանի Նկարիչների միությունում, Նարեկացի արվեստի միությունում, որտեղ ցուցադրվելու են պատկերապատում ժանրում նկարահանված ֆիլմեր, Խնկո Ապոր անվան գրադարանում, որտեղ կազմակերպվելու են ցուցադրությունները:

Փառատոնի կազմակերպիչները համոզված են, որ պատկերապատում արվեստը արտահատչաձև է, և հայերը ևս պետք է ունենան իրենց արտահայտման ձևը:

Փառատոնը հավաքում է բոլոր այն մարդկանց, ովքեր հետաքրքրված են պատկերապատման արվեստով, ցանկանում են ոչ միայն կարդալ, այլ նաև պատմություններ գրել, ստեղծագործել:

14.05.2010, 10:44

Aysor.am

Թուրք պաշտոնյան ժողովրդավարության քարոզի՞չ

Հայաստանում աշխատանքային այցով գտնվող ԵԽԽՎ նախագահ Մևլութ Չավուշօղլուն այսօր լրագրողների հետ հանդիպման ժամանակ նշեց, որ իր պարտականությունն է «երկխոսություն սկսել այն երկրների հետ, որոնք ավելի շատ ունեն Եվրախորհրդի օժանդակության կարիքը»:

Թուրք պաշտոնյան իր նախաբանի խոսքը կառուցել էր 2008 թ-ին Հայաստանի հետընտրական զարգացումների առանցքում, և ժողովրդավարության տանող մի շարք խորհուրդներ տվեց հայաստանյան իշխանություններին:

Ընդգծելով, որ չնայած ԵԽԽՎ-ն ՆԱՏՕ-ի նման ռազմականացված կառույց չէ, որպեսզի երկրների միջև առկա հակամարտություններին ուժային միջամտություն ցուցաբերի, նա նշեց, որ այն միակ կազմակերպությունն է, որը միավորում է Եվրոպայի բոլոր երկները` բացառությամբ Բելառուսի, ուստի այն միակ կառույցն է, որը նպաստում է ԵԽ անդամ երկրների և այդ երկրների խորհրդարանների միջև երկխոսության ծավալմանը: Այս առիթով` Մ. Չավուշօղլուն առանձնացրեց Լեռնային Ղարաբաղի համակարտության հարցը և Հարավային Օսիայի խնդիրը:

Մինչդեռ` ժողովրդավարութունից ու երկխոսության կարևորությունից խոսող ԵԽԽՎ նախագահը, ով նաև Թուրքիայի պատվիրակության անդամ է, ոչ մի բառ չասաց Կիպրոսի խնդրի մասին, այն դեպքում, երբ Թուրքիան շարունակում է օկուպացված պահել այս տարածաշրջանը: Նա ոչ մի բառ չասաց նաև Թուրքիայի կողմից Հայաստանի սահմանը փակելու մասին, որը նույնպես, ըստ Եվրոպական չափանիշների, չի համապատասխանում ժողովրդավարության սկզբունքներին:

13.05.2010, 20:32

Aysor.am

Չավուշօղլուն չմեկնաբանեց իր նախկին հայտարարությունները

Այսօր ՀՀ Ազգային ժողովում լրագրողների հետ ունեցած հանդիպման ժամանակ ԵԽԽՎ նախագահ Մևլութ Չավուշօղլուն հայտնեց, որ «ԵԽԽՎ-ն դիմել է բյուրոյին` ստեղծել Լեռնային Ղարաբաղի հակամարտությունն ուսումնասիրող ժամանակավոր հանձնաժողով, որն ի թիվս այլ հարցրերի` ի մի կբերի Մինսկի խմբի մասնակից երկրների պատվիրակությունների ղեկավարների աշխատանքները` հակամարտության առաջընթացի մասին զեկուցելով Վեհաժողովին»:

Մ. Չավուշօղլուն հիշեցրեց, որ վերոնշյալ ժամանակավոր հանձնաժողովը գործում էր մինչև հանձնաժողովի նախագահ Ռասել Ջոնսթոնի մահը, որից հետո «չկա համաձայնություն առ այն, թե ո՞ր անձը կարող է լավագույնս ղեկավարել այդ հանձնաժողովը, ինչպես նաև` չկա համաձայնություն դրա հստակ ձևաչափի ու մանդատի շուրջ»: Նա նշեց, որ արդեն մեկ տարի է` հարցը գնտվում է բյուրոյի օրակարգում, և իր պարտականությունն է` որպես ԵԽԽՎ նախագահ, «հետամուտ լինել բյուրոյի օրակարգին, մինչև ընդունվի համապատասխան որոշումը» (Aysor` հանձնաժողովի նախագահ ընտրելու մասին):

Մ. Չավուշօղլուն ընդգծեց նաև, որ ԵԽԽՎ նախագահի պաշտոնը ստանձնելուց ի վեր իր պարտավորությունն է «ականջ դնել» հակամարտության երկու կողմերին էլ:

«Ես առանձնազրույցներ եմ ունեցել հայաստանյան և ադրբեջանական պատվիրակությունների ղեկավարների հետ, ինչպես նաև` շատ օգտակար հանդիպումներ եմ անցկացրել երկու պատվիրակությունների ղեկավարների հետ միաժամանակ: Մենք համաձայնության ենք եկել` շարունակել նմանօրինակ ոչ պաշտոնական հանդիպումները և դրանցում ներառել ընդդիմության մեկական ներկայացուցիչ` մինչև կհասնենք այն մոտեցմանը, որն ընդունելի կլինի երկու կողմերի համար»,- մանրամասնեց ԵԽԽՎ նախագահը:

Հնչած հարցին, թե ԵԽԽՎ-ում` որպես թուրքական պատվիրակության նախագահ, Չավուշօղլուն բազմիցս է կրկնել ադրբեջանական պատվիրակության պնդումները ու ղարաբաղյան հիմնախնդրի հարցում արտահայտել խիստ սուբյեկտիվ դիրքորոշում, ԵԽԽՎ նախագահը պատասխանեց, որի ինքը չի մեկնաբանում նախկինում արված իր հայտարարությունը և հավելեց. «Որպես ԵԽԽՎ նախագահ` պիտի ասեմ, որ բոլոր 47 երկիրները հավասար են վեհաժողովում և հավասար վերաբերմունքի պետք է արժանանան: Ես կրկնում եմ` ժամանակավոր հանձնաժողով ստեղծելու նախաձեռնությունն իմը չէ»:

13.05.2010, 20:17

Aysor.am

Մ. Չավուշօղլուն առաջնորդվում է իր անձնական դիրքորոշմամբ

«Վեհաժողովի կանոնակարգում չկա որևէ դրույթ, որը պարտադրի նախագահին այցելություն կատարել այս կամ այն վայր»,- ՀՀ Ազգային ժողովում լրագրողների հետ հանդիպման ժամանակ հայտարարեց Հայաստանում աշխատանքային այցով գտնվող ԵԽԽՎ նախագահ Մևլութ Չավուշօղլուն` ի պատասխան լրագրողներից մեկի այն հարցին, թե ինչու՞ է ԵԽԽՎ նախագահը հրաժարվել այցելել Ծիծեռնակաբերդի հուշահամալիր, այն պարագայում, երբ ԵԽԽՎ նախկին նախագահները` մասնավորապես Ռասել Ջոնսթոնը, Ռանե վան դեր Լինդենն այցելել են Ծիծեռնակաբերդ:

Հատկանշական է այն, որ Մ. Չավուշօղլուն անպատասխան թողեց լրագրողի հարցի երկրորդ հատվածը, այն է` «այս պարագայում Հայաստանի ժողովուրդը և հասարակությունն ինչպե՞ս կարող է հավատալ, որ թուրք պաշտոնյան կարող է օբյեկտիվ լինել Հայաստան-Թուրքիա և Հայաստան-Ադրբեջան հարաբերություններում` որպես ԵԽԽՎ նախագահ»:

«Երբ ես նայում են նախորդ նախագահների օրակարգին, նրանք իրենց պաշտոնական այցերի սահմաններում նույնպես չեն այցելել այդ վայրը»,- ընդգծեց Մ. Չավուշօղլուն:

Նույնիսկ այն բանից հետո, երբ լրագրողը պնդեց նախագահների այցելության մասին` փաստելով, որ Ռասել Ջոնսթոնը Ծիծեռնակաբերդի հուշահամալիր է այցելել 1999 թ-ին, իսկ Ռանե վան դեր Լինդենը` 2005 թ-ին, Մ. Չավուշօղլուն չընդունեց իր սխալը` նշելով. «Գուցե վերջիններս այցելել են, բայց` իրենց անձնական ցանկություններից ելնելով, իսկ մյուս գործընկերների այցելություների մասին տեղեկություններ չունեմ»:

13.05.2010, 19:42

Aysor.am

ԵԽԽՎ-ն դիտորդներ չի ուղարկի ԼՂՀ խորհրդարանական ընտրութուններին

Եվրոպայի խորհրդի խորհրդարանական վեհաժողովի նախագահ Մևլութ Չավուշօղլուն ՀՀ Ազգային ժողովում լրագրողների հետ ունեցած հանդիպման ժամանակ հայտնեց, որ ԵԽԽՎ Բյուրոյի անդամները որոշել են մայիսի 23-ին ԼՂՀ-ում կայանալիք խորհրդարանական ընտրություններին դիտորդական պատվիրակություն չուղարկել:

Նշենք, որ դիտորդական պատվիրակություն ԼՂՀ խորհրդարանական ընտրություններին ուղարկելու մասին առաջարկ ԵԽԽՎ-ին արվել է Արցախի Հանրապետության Ազգային ժողովի նախագահի կողմից:

«Ավանդույթն է այդպիսին` չուղարկել դիտորդական պատվիրակություններ այն երկրների ընտրություններին, որոնք սառեցված կոնֆլիկտների գոտիներում են»,- ասաց նա` նշելով, որ Բյուրոյի օրակարգում հարցի քննարկումն ընդգրկվել է իր կողմից:

13.05.2010, 19:28

Aysor.am

Ս. Գալոյան. Մենք Փարաջանովի մասին ոչինչ չգիտենք

«Մենք Փարաջանովի մասին մինչև հիմա ոչինչ չգիտենք»,- համոզված է գրող Սերգեյ Գալոյանը, ով հանճարեղ ռեժիսոր Սերգեյ Փարաջանովի կյանքի ու նրա մահվան մասին կատարած ուսումնասիրությունները պատրաստվում է համակարգել մի գիրքում` «Փարաջանով. լուսապսակ տառապանքի» վերնագրով:

Հիշեցնենք, որ Ս. Գալոյանը հեղինակ է շուրջ 30 գրքերի, որոնց թվին են դասվում Յապոնչիկի, Սվո Ռաֆի և այլ քրեական (կրիմինալ) հեղինակությունների մասին կենսագրական ծավալուն աշխատությունները, ինչպես նաև հեղինակն է Պարույր Սևակի, Մինաս Ավետիսյանի, Արշիլ Գորկու և այլ մեծությունների մասին գրքերի:

Ս. Գալոյանը, ով իր գրքում հանգամանալից ներկայացնում է, որ Փարաջանովի ձերբակալումն ու մահը նախապատրաստված է եղել խորհրդային իշխանությունների կողմից, մանրամասներ է հաղորդում նաև աշխարհահռչակ ռեժիսորի կայնքից: Մամուլի ասուլիսի ժամանակ նա նշեց, որ գրքում նկարագրում է, թե ինչպիսի ընտանիքում է ծնվել Փարաջանովը, որը հասկանալի է դարձնում ռեժիսորի այն հայտարարությունը, թե «Ես չէի կարող մեծ կինոռեժիսոր չլինել, քանի որ ծնվել եմ` որպես ռեժիսոր. անընդհատ բեմադրություններ եմ արել ու ապրել եմ բեմադրության մեջ»:

Հեղինակն իր գրքում փաստերով պատմում է նաև, թե ինչ հանգամանքներից ելնելով են ձերբակալել Ս. Փարաջանովին` խորհրդային իշխանություների համար անհասկանալի այս հանճարին, ինչպիսի տանջանքների ու ստորացումների են ենթարկել նրան բանտային կյանքում, և ինչպես է ռեժիսորը շարունակել ռեժիսոր մնալ ամեն րոպե` նույնիսկ տառապանքի մեջ «բեմադրություն տեսնելով»:

Ս. Գալոյանը հայտնեց, որ արդեն ավարտել է Ս. Փարաջանովի մասին նոր բացահայտումներ ներկայացնող գրքի աշխատանքները: Աշխատությունն ավարտին հասցնելու համար նրան օգնել են բոլոր նրանք, ովքեր լավ են ճանաչում Փարաջանովին, այդ թվում` ռեժիսորի կինը, քրոջ որդին և այլոք:

Հեղինակի ստեղծագործական միտքը, սակայն, այսքանով չի սահմանափակվում: Նա այժմ աշխատում է նաև այլ հայտնի ու նշանակալի դեր կատարած անձանց մասին աշխատություններ պատրաստելու վրա:

Թե ինչպե՞ս է հաջողում հեղինակին իր ձեռքբերած նյութրը հրապարակային դարձնել` առանց խնդիրների, պարզ գաղտիք ունի. քրական աշխարհի դեմքերի մասին իր գրքերով հայտնի Ս. Գալոյանը ոչինչ չի «թաքցնում», այլ` «տպագրում է միայն այն, ինչ կարելի է և չի տպագրում այն, ինչը չի կարելի»: Այդ իսկ պատճառով, հեղինակի խոսքերով, «կրիմինալ» աշխարհի ներկայացուցիչների հարազատների և այդ աշխարհի մյուս անդամների հետ ինքը «լուրջ խնդիրներ» չի ունենում, այլ ունենում է` «բարի խնդիրներ», քանի որ համագործակցում է վերջիններիս հետ»:

«Ինձ հետ այլ բան է պատահում: Օրինակ, վերջերս հայաստանյան թերթերից մեկը ստանձնել էր հրատարակել Վանո Սիրադեղյանի և Սերժ Վիրաբյանի մասին իմ աշխատությունը, սակայն աշխատությունից 2 հատված տպագրելուց հետո` թերթն այլևս հրաժարվեց թողարկել դրանք»,- պատմեց Ս. Գալոյանը, ում համար հասկանալի են իր աշխատանքները չտպագրելու պատճառները` «Չեն ցանկացել իրենց անցավ գլուխը դնել ցավի տակ»:

13.05.2010, 14:59

Aysor.am

Վիսոցկու մասին ելույթը ճակատագրական էր Փարաջանովի համար

Գրող, հրապարակախոս Սերգեյ Գալոյանն այսօր լրագրողների հետ հանդիպման ժամանակ խոսեց իր նոր աշխատության մասին, որով հեղինակը նոր բացահայտումներ է ներկայացնում աշխարհահռչակ կինոռեժիսոր Սերգեյ Փարաջանովի, նրա մահվան ու նրա հետ կապված քրեական աշխարհի մասին:

«Փարաջանովը Լյուբիմովի թատրոնում ներկա է գտնվել Վիսոցկու մահվան տարելիցի առթիվ կազմակերպված միջոցառմանը, որի ընթացքում իր կարծիքն է հայտնել Վիսոցկու մասին: Լուրը հասել է ԿԳԲ (Aysor` Պետական անվտանգության կոմիտե): Ձայնագրությունն ուսումնասիրելուց հետո վերջիններս որոշել են, որ Փարաջանովը պետք է մահանա որևէ բնական մահով, բայց քանի որ նա ֆիզիկապես տոկուն մարդ էր, ապա նրան պետք էր ձերբակալել», - աշխատությունից մանրամասներ ներկայացրեց Ս. Գալոյանը:

Ներկայացված դրվագի համաձայն, հաջորդ տարի` 1982 թ-ին, Փարաջանովին ձերբակալում են Թիֆլիսում` քրոջորդուն ինստիտուտ ընդունելու համար կաշառք տալու մեղադրանքով, այն դեպքում, երբ նրա քրոջորդին արդեն 4-րդ կուրսի ուսանող էր:

«Բա այն ժամանակ ինչու՞ չէին բռնել: Քանի որ այն ժամանակ նա Վիսոցկու մասին ելույթ չէր ունեցել»,- նկատեց Ս. Գալոյանը:

Շարունակելով հետաքրքիր ու նոր բացահայտումներ ներկայացնել` գրողը նշեց, որ Ս. Փարաջանովին դատապարտել են նաև` մեղադրելով արվամոլության մեջ, ինչը հեղինակի համոզմամբ` «ոչ միայն շինծու մեղադրանք է եղել, այլև դատավարությունն էլ է անցել շինծու կերպով»: Իսկ թե ինչու՞ է խորհրդային ոստիկանությանը հաջողվել ի կատար ածել շինծու մեղադրանքները, ըստ Ս. Գալոյանի, կապված է եղել Փարաջանովի բնավորության հետ, որն ամեն անգամ, երբ իրեն մեղադրել են, ոչ մի մեղադրանք չի հերքել, փոխարենն ինքնավստահ հայտարարել է. «Այս ձեր իմացածն ի՞նչ է, ես ավելին եմ արել»` ցանկանալով ընդգծել, որ «ինչ ուզում եք արեք, ինձ համար մեկ է, քանի որ ես Փարաջանովն եմ»:

Ս. Գալոյանի հեղինական աշխատությունը լույս կտեսնի այն ժամանակ, երբ «իր բարեկամները»` հովանավորները, համապատասխան միջոցներ տրամադրեն: Գիրքն արդեն ավարտվել է, սակայն, ըստ հեղինակի, նա դեռ շարունակում է նոր բացահայտումներ ստանալ Փարաջանովի մասին: Այս առիթով Ս. Գալոյանը նշեց նաև, որ եթե մինչև տպագրության օրը ոչինչ չփոխվի, ապա աշխատությունը կունենա «Փարաջանով` լուսապսակ տառապանքի» վերնագիրը:

Հեղինակը հայտնեց նաև, որ գրքում ներկայացված են նաև մանրամասներ Փարաջանովի բանտային կյանքի, այնտեղ կրած տառապանքների ու ստորացումների մասին:

13.05.2010, 14:13

Aysor.am

Համբարձման տոնին երիտասարդները վիճակի փարչ են պատրաստել

Արևը դեռ չբացված` երիտասարդները հավաքվում էին, բարձրանում լեռը` ծաղիկներ հավաքելու. 7 ծառից տերև էին հավաքում, 7 առվակից քարեր, 7 աղբյուրից ջուր և 7 տեսակի ծաղիկ: Այսպես էր, ըստ նկարչուհի Լուսիկ Ագուլեցու, կատարվում Քրիստոսի Համբարձման տոնը ժողովրդական ծիսակատարության մեջ:

«Այդ ամենը հավաքելուց հետո վերադառնում էին գյուղ և պատրաստում էին վիճակի փարչ»,- նշեց Լ. Ագուլեցին ու հավելեց, որ ծեսն այնպես էին կատարում, որ կապվեին Աստծո հետ` ծեսի ժամանակ գովերգում էին աստղեին, երկիրքը, բնությունը, ամենագեղեցիկ երևույթերը, հատկապես` սերը:

Ավանդույթի համաձայն, ըստ նկարչուհու, մայրերը հատուկ ծես էին կատարում, որպեսի իրենց երեխաներն առողջ լինեն, և ծեսի ժամանակ գովերգում էին Մարիամ Աստավածածնին:

Լ. Ագուլեցին պատմեց, որ ազգային ծեսերի համաձայն` երիտասարդները ծաղկահավաք կատարում էին ինչպես առանձին, այնպես էլ խմբերով: Առանձին ծաղկահավաք կատարում էին երիտասարդ աղջիկները, ովքեր ցանկանում էին գուշակել իրենց բախտը: Խմբային ծաղկահավաքը ուղեկցվում էր աղջիկների երգով ու պարով, որը հսկում էին տղաները: Կարևոր էր, որ փարչը գիշերը պետք է մնար լուսնի տակ, ինչը, ըստ նկարչուհու, ևս կապ էր տիեզերքի հետ:

«Տոնին ընդունված էր պատրաստել Արուս տիկնիկ ու կաթնով, որը, որպես զոհաբերություն լցնում էին դաշտերը, որ տարին առատ լինի, բերքն ու բարիքը շատ լինի, իսկ տղամարդիկ` սովորության համաձայն, զարդարում էին եզանը, որը համարվում էր առատության, բերքի, արտի խորհրդանիշ»,- մանրամասնեց Լ. Ագուլեցին:

Լ. Ագուլեցին պատմեց նաև, որ տոնի օրը երիտասարդ աղջիկները` փարչը ձեռքներին, երգով ու պարով տնետուն են գնացել, օրհնել են տունը և սնունդ են հավաքել, որով երեկոյան դաշտում խնջույք են արել ու ջանգյուլումյան երգեր երգել: Այնուհետև վիճակ են գցել` պարզելու, թե ո՞վ կամուսնանա այդ տարում և ում ինչ բախտ է սպասվում:

«Խորհուրդ եմ տալիս Համբարձման տոնին խաչ ձևավորել, ձու ներկել ու դնել սեղանին, որովհետև, ինչպես ժողովուրդն է ասում, համբարձվեց Քրիստոս, բայց մեր հոգիների մեջ է, մեզ նեցուկ է»,- ամփոփելով իր խոսքը` հայտնեց Լ. Ագուլեցին:

12.05.2010, 16:50

Aysor.am

«Քրիստոս համբարձմամբ բացեց երկնքի ճանապարհը մարդկանց առջև»

«Մեղավոր մարդու փրկության համար Աստված ինքը մարմնացավ ու աշխարհ եկավ, որովհետև մեղքը միայն պետք է քավվեր մահվան միջոցով, քանի որ մարդն ինքն իրեն չկարողացավ ազատել մեղից ու դրա հետևանքից` մահվանից»,- նշեց Արարատյան հայրապետական թեմի Արգավանդի Ս. Սարգիս հոգևոր թեմի առաջնորդ Տեր Գրիգոր քահանա Հովհաննիսյանը, ով լրագրողների հետ հանդիպման ժամանակ մանրամասն ներկայացրեց Քրիստոսի` աշխարհ գալու, հարություն առնելու և երկինք համբարձվելու խորհուրդը:

Տեղեկացնենք, որ վաղը Հայ առաքելական եկեղեցին տոնում է Քրիստոսի հրաշափառ Համբարձման տոնը: Այդ օրը եկեղեցիներում մատուցվում է Ս. Պատարագ:

Տեր Գրիգոր քահանան փաստեց նաև, որ Աստված` Քրիստոս, մարմնացավ ու ապրեց մարկանց մեջ ու մարդկանց նման` ցույց տալով փրկության տանող ճանապարհը. «Մեր մեղքերի քավությունը կատարեց, խաչվեց մեր մեղքերի քավության համար,
ինքն իրեն զոհաբերեց»:

Ըստ նրա, եկեղեցական այրերը խոսում են Քրիստոսի 3 տեսակի համբարձման մասին` համբարձում երկրի մեջ, համբարձում երկրի վրա ու համբարձում երկրից:

«Համբարձում երկրի մեջ ասելով հասկանում ենք, որ տեղի ունեցավ Քրիստոսի համբարձումն իր սրբակենցաղ, իր բարի կյանքով` նա համբարձվեց, հասավ հոգևոր բարձրության: Համբարձում երկրի վրա, երբ Քրիստոսը խաչվեց, մեր փրկության համար խաչի վրա բարձրացավ: Իսկ համբարձում երկրից ասելով հասկանում ենք, որ երկրից հրաշափառ ձվով համբարձվեց երկինք ու մտավ երկրի արքայություն»,-մեկնաբանեց քահանան:

Համբարձումը, ըստ քահանայի, խորհրդանշում է նաև, որ Քրիստոսը համբարձմամբ մարդկային բնությունը երկինք տարավ. բացեց երկնքի ճանապարհը մարդու առջև, ցույց տվեց, թե ինչպես պետք է հասնել երկինք:

12.05.2010, 15:23

Aysor.am

16 տարի է անցել. «Զինադադարը միշտ էլ խախտվել է Ադրբեջանի կողմից»

«Զինադադարի մասին միշտ էլ եղել է պայմանավորվածություն, և ամեն անգամ Ադրբեջանն այն խախտել է»,- հիշեցրեց «Ժառանգություն» խորհրդարանական խմբակցության քարտուղար Լարիսա Ալավերդյանը` անդրադառնալով ուղիղ 16 տարի առաջ այս օրը Արցախի հակամարտության վերաբեյալ կնքված զինադարին:

Լ. Ալավերդյանը նշեց, որ 1992-1994 թթ-ի ընթացքում զինանադադարի մասին միջազգայնորեն 9 փաստաթուղթ է ընդունվել, մինչդեռ բոլորն էլ խախտվել են Ադրբեջանի կողմից: Անդրադառնալով միջազգային պայմանագրերին` Լ. Ալավերդյանը նկատեց, որ «առաջին միջազգային փաստաթղթերի մեջ Հայաստանը լռեցյալ համաձայնությամբ ընդունել է, որ Լեռնային Ղարաբաղը Ադրբեջանի Հանրապետության մեջ է», և այս սխալը կրկնվել է հետագայում ևս: Միևնույն ժամանակ նա դրական համարեց այն, որ միջազգային փաստաթղթերը վկայում են, որ Լեռնային Ղարաբաղի Հանրապետությունը հակամարտության կողմ է դիտարկվել:

«Մինչև 1997 թ-ի ապրիլը Լեռնային Ղարաբաղի Հանրապետությունը համարվել է կոնֆլիկտի կողմ և մասնակցել է բանակցություններին, և միայն դրանից հետո, ցավոք սրտի, ԼՂՀ-ն ոչ միայն դուրս է հանվել, այլև` մինչ այսօր չի ճանաչվում կոնֆլիկտի կողմ»,- նշեց Լ. Ալավերդյանը, այս խնդրում ևս տեսնելով Հայաստանի մեղքը:

Մյուս կողմից խմբակցության քարտուղարը դրական բան է նկատում. «ԼՂՀ-ն ունի հնարավորություն հայտարարելու և հայտարարում է, որ քանի որ ինքը բանակցությունների կողմ չէ և որևէ համաձայնություն չի տվել ընդունված փաստաղթերին, ապա չի համաձայնվում դրանց հետ և առանց իրեն որևէ լուծում հակամարտությանը չի կարելի գտնել»:

Հակամարտության ծայրահեղ կերպով լուծելու և պատերազմական քայլերի դիմելու հանգամանքը Լ. Լաավերդյանը «աղետալի» գնահատեց Ադրբեջանի համար:

«Ես համոզված եմ, որ զինված բախման ընթացքում Ադրբեջանը չի ունենալու դրական արդյունք, և սա է այն ամենակոշտ հանգամանքը, որն Ադրբեջանին ետ է պահում ծայրահեղ քայլերից»,- հայտնեց Լ. Ալավերդյանը:

Խմբակցության քարտուղարը կարծում է նաև, որ «տեսանելի ապագայում Լեռնային Ղարաբաղի հակամարտությունը լուծում չի գտնելու»: Ըստ նրա, «խնդրի կարգավորումն այն հիմքերով, որով հանդես է գալիս, հնարավոր չէ և խնդիրը պետք է լուծել` փոխելով հիմքերը»:

12.05.2010, 14:34

Aysor.am

«Ժառանգությունը» կհանդիպի Մ. Չավուշօղլուի հետ

«Ժառանգություն» խմբակցության քարտուղար Լարիսա Ալավերդյանն այսօր լրագրողների հետ հանդիպման ժամանակ հայտնեց, որ իրենց խմբակցությունը նախօրեին որոշում է կայացրել հանդիպել ԵԽԽՎ նախագահ Մևլութ Չավուշօղլուի հետ:

Հիշեցնենք, որ Մ. Չավուշօղուն այսօրվանից երկօրյա աշխատանքային այցով գտնվելու է Երևանում: Նախատեսվում է, որ նա հանդիպումներ է ունենալու նաև ԱԺ խմբակցությունների հետ:

«Բացակայությունը տանուլ տվող քաղաքականություն է, եթե դու խուսափում ես հանդիպումից, նշանակում է` դու թույլ կողմ ես և դու տանուլ տվող կողմ ես»,- իրենց որոշումն այս կերպ մեկնաբանեց Լ. Ալավերդյանն ու հավելեց, որ «քաղաքականությունն այն վայրը չէ, որտեղ հաճելի հանդիպումներով ես միայն շարժվում»:

Լ. Ալավերդյանը նշեց նաև, որ իր ունեցած տեղեկությունների համաձայն ԱԺ-ում Հայ հեղափոխական դաշնակցություն խմբակցությունը որոշել է չհանդիպել ԵԽԽՎ նախագահի հետ` մեկնաբանելով , որ «Չավուշօղուն ոչ թե ԵԱՀԿ-ի, այլ Թուրքիայի ներկայացուցիչն է»: Այն, որ ՀՅԴ-ի մեկնաբանւթյունում առկա է նաև Չավուշօղլուի` հայկական պատվիրակության նկատմամբ ունեցած անհարգալից վերաբերմունքի հանգամանքը` Լ. Ալավերդյանը հասկանալի է համարում, մինչդեռ գտնում է` «Պետք է հանդիպել իր հետ և իրեն ասել ով` ով է և ինչն` ինչ է»:

«Մենք չպետք է թողնենք, որ նա ետ վերադառնա և ասի, որ ինձ հետ չհանդիպեցին հենց այն ուժերը, որոնք որ դեմ են հայ-թուրքական հարաբերությունների հաստատման վերաբերյալ արձանագրություններին, ինչը կնշանակի, որ իրենք դեմ են ընդհանրապես երկու պետությունների շփմանը»,- մանրամասնեց Լ. Ալավերդյանն ու ընդգծեց. «Չէ՞ որ մենք այն գլխից էլ գիտեինք, թե ու՞մ հետ գործ ունենք»:

12.05.2010, 13:04

Aysor.am